గుండె నిండా గుడి గంటలు Nov 21st, 2025 శుక్రవారం ఎపిసోడ్: బాలు చేతికి దొరికిన మనోజ్ సీక్రెట్ – మనోజ్, ప్రభావతి ప్లాన్ బయటపడ్డట్టేనా …?
ఎపిసోడ్ ప్రారంభంలో బాలు, రాజేష్ ఇద్దరూ ఒక ఫర్నిచర్ షాప్‌కి వెళ్తారు. అక్కడ ప్రతి వస్తువుపై భారీ డిస్కౌంట్లు—అదీ నేరుగా 50% ఆఫర్—కనిపించడంతో ఇద్దరూ ఆశ్చర్యపోతారు. “ఇలాంటి రేట్లు ఎక్కడ దొరుకుతాయి రా!” అని రాజేష్ ఆనందంతో ఒక బీరువాను ఎంచుకుని బిల్లు పెట్టేస్తాడు. తాము మంచి డీల్ కొట్టేశామన్న సంతోషంలో ఉంటుండగా, షాప్‌లోకి పోలీసులు దూసుకొచ్చి అందరినీ షాక్‌కి గురిచేస్తారు.
అధికారులు గట్టిగా “ఇక్కడ ఉన్న ఫర్నిచర్ అంతా దొంగిలించిన సరకే. ఎవరూ కదలకుండా అలాగే నిలబడి ఉండండి” అని అనడంతో బాలు, రాజేష్ భయపడి “మేము కొనడానికి మాత్రమే వచ్చాం, దొంగలు కాదు” అని చెప్పినా, పోలీసులు వాళ్ళ మాట నమ్మకుండా వారినీ దొంగలతోపాటు స్టేషన్‌కు తీసుకెళ్తారు. అక్కడ కూడా ఎంత చెప్పినా ప్రయోజనం ఉండదు. ఇద్దరినీ లాకప్‌లో పెట్టేస్తారు. కోపంతో తట్టుకోలేని బాలు అక్కడున్న దొంగలతో గొడవ పెట్టుకుంటాడు. రాజేష్ మాత్రం ఆపుతూ, “ఎవరితో గొడవ వద్దురా నిజం బయటపడితే మనమే బయటకు వస్తాం” అని శాంతపరుస్తాడు.
ఇదే సమయంలో షాప్ యజమానుల విచారణ కోసం వారిని స్టేషన్‌కు పిలుస్తారు. వాళ్లతో పాటు మనోజ్ కూడా అక్కడికి వస్తాడు. మనోజ్‌ని చూసిన బాలు ఒక క్షణం అవాక్కవుతాడు—అతను ఇక్కడికి ఎందుకు వచ్చాడో అర్థం కాక కంగారు పడతాడు. కానీ మనోజ్ పోలీసులకు చెప్పే మాటలు వింటూ బాలు తెలుసుకుంటాడు—అతను కూడా వారి చేతిలో మోసపోయాడని.
మనోజ్ తన ఫర్నిచర్ కనిపించడం లేదని చెబుతూ, ఏ ఏ వస్తువులు పోయాయో లిస్ట్ చెబుతాడు. “ఒక సోఫా, కుర్చీలు, మంచం…” అంటూ వివరాలు చెబుతుంటే, బాలు ఆ మాటలన్నీ ఫోన్‌లో రికార్డ్ చేస్తాడు. అనంతరం పోలీసుల ప్రశ్నలకు మనోజ్ సమాధానంగా ఒక నిజం చెబుతాడు—తాను మూడు లక్షల విలువైన ఫర్నిచర్ ఇచ్చానని, కానీ ఇంట్లో మాత్రం నాలుగు లక్షలు వచ్చాయని, ఇంకా లక్ష లాభం వచ్చింది అని అబద్ధం చెప్పానని. “మోసపోయాను అనే విషయం ఇంట్లో ఎలా చెప్పగలను?” అని కూడా అంగీకరిస్తాడు.
ఈ మాటలు విన్న బాలు ఒక్కసారిగా నిజం గ్రహిస్తాడు—మనోజ్ కూడా మోసానికి గురయ్యాడు, కానీ ఇంట్లో విషయం దాచడానికి ఒక కథ చెప్పాడు. దీనితో బాలు తన మనసులో ఉన్న అనుమానం నిజం అని పక్కాగా అర్ధం చేసుకుంటాడు. ఆ నగల మాయం చేయడం వెనుక మనోజ్–ప్రభావతి కలిసి ఉన్నారు అని బలంగా నమ్ముతాడు.
విచారణ పూర్తయ్యాక బాలు, రాజేష్‌లను పోలీసులు వదిలేస్తారు. బాలు ఇంటికి చేరుకున్న వెంటనే గేట్‌–డోర్‌లను లాక్ చేస్తాడు. సత్యం ఆశ్చర్యపడి అడుగుతాడు—“ఇంత మధ్యాహ్నం గేటు ఎందుకు మూసేశావు?” బాలు నవ్వుతూ “ఓ కొత్త సినిమా ట్రైలర్ వచ్చింది. అందరం కలిసి చూద్దాం అనుకున్నాను” అని చెబుతాడు.
మనోజ్ మాత్రం వెంటనే తప్పించుకోవాలని చూస్తూ “నాకు పని ఉంది షాప్‌కి వెళ్లాలి” అని మాట మార్చడానికి ప్రయత్నిస్తాడు. బాలు మాత్రం ఆపేసి, “అన్నయ్య లేకుండా ట్రైలర్ ఎలా చూపగలను? మీరు ఉండాలి కదా” అని అంటాడు. దొరికిపోయామా అన్న అనుమానం ప్రభావతి ముఖంలో కూడా కనబడుతుంది.
మీనా కూడా అడుగుతుంది—“ఫర్నిచర్ షాప్‌కి వెళ్లారు కదా, ఇప్పుడు ఈ ట్రైలర్ గోల ఏంటి?” అని. అక్కడికి వెళ్తేనే కదా ఈ సినిమా బయటపడింది అని అంటాడు బాలు. “ఆ షాప్‌లో 50% సేల్. ఈ విషయం మనోజ్‌గారికి ముందే తెల్సా?” అని అడుగుతాడు. వెంటనే ప్రభావతిని కూడా “అమ్మగారు, మీకు తెలుసా?” అని వెటకారంగా అడుగుతాడు. ప్రభావతి మాట మార్చుతూ మీనాను చిన్నబుచ్చే ప్రయత్నం చేస్తుంది. మీనా కూడా దానికి తగ్గట్లే కౌంటర్ ఇస్తుంది.
ఇంతలో బాలు అందరికీ మనోజ్ పోలీస్ స్టేషన్‌లో చెప్పిన రికార్డ్ చేసిన వీడియో చూపిస్తాడు. మనోజ్ మూడు లక్షలు పోగొట్టుకుని, ఇంట్లో మాత్రం నాలుగు లక్షలు వచ్చాయని అబద్ధం చెప్పిన సంగతులు అందరికీ బయటపడతాయి. మీనా, శృతి, రవి లాభం వచ్చింది అని చెప్పిన రోజు రోహిణి చేసిన హడావిడి గుర్తు చేసి దెప్పిపొడుస్తారు. ఆ వీడియోలో మనోజ్ మాటలు వినగానే సత్యం ఒక్కసారిగా కోపంతో మనోజ్ చెంప చెల్లుమనిపించి నిలదీస్తాడు “బ్లాక్ మనీ తీసుకొవడానికి సిగ్గు లేదా? అవి కూడా పోగొట్టుకుని ఇంట్లో అబద్దం చెప్పావా. నిజం దాచడం ఎందుకు? ఇంట్లో అబద్ధం చెప్పడం ఎందుకు? ఆ నాలుగు లక్షలు ఎక్కడ నుండి వచ్చాయి? మీనా బంగారం తీసుకున్నావా?” అని.
ప్రభావతి వెంటనే విషయాన్ని మార్చే ప్రయత్నంలో “నాలుగు లక్షలు ఎక్కడి నుంచి తెచ్చావ్? అప్పు చేసావా? నాకు కూడా చెప్పలేదు ఎందుకు రా” అని అతడికి క్లూ ఇచ్చేలా అడుగుతుంది. చివరకు మనోజ్ “ఒక స్నేహితుడి దగ్గర అప్పు తీసుకున్నా” అని చెబుతాడు. ప్రభావతి తన వైపు డౌట్ రాకుండా నటిస్తోంది. రోహిణి మధ్యవర్తిగా “మోసపోయాడు కానీ ఎవరిని మోసం చేయలేదు కదా. అంత పెద్ద రియాక్షన్ ఎందుకు?” అని మనోజ్‌ను కాపాడాలని చూస్తుంది. కానీ సత్యం అడ్డుకొని “ఇంట్లో అబద్దం చెప్పడం తప్పు కాదా. మోసం ఏదైనా మోసమే” అని స్పష్టం చేస్తాడు.
అందరూ షాక్‌లో ఉండగా, బాలు మాత్రం రవి, శృతి, మీనాలతో “ఈ కథలో ఇంకా ఏదో దాగి ఉందని. నాలుగు రోజుల్లో అసలు నిజం బయటపెట్టాలి” అని అంటాడు.
అక్కడితో ఈ ఎపిసోడ్ ముగుస్తుంది.
Source inspiration: Original story from “గుండె నిండా గుడి గంటలు” (JioHotstar). This is a personal written recap and interpretation.
