బ్రహ్మముడి Nov 22nd, 2025 శనివారం ఎపిసోడ్: కొత్త కంపెనీ గురించి తెలుసుకున్న రాహుల్ …!!! కావ్య, రాజ్ లను అనుమానిస్తున్న స్వప్న …!!!
ఎపిసోడ్ ప్రారంభంలో కొత్త కంపెనీ పనులు తాను అనుకున్న వేగంతో సాగడంలేదని రాజ్ కోపంతో మేనేజర్ మీద అరుస్తుంటాడు. మేనేజర్ తో ఫోన్‌లో ప్రశ్నల దాడి చేస్తూ, “స్వరాజ్ కంపెనీకి ‘R’ కంపెనీకి కొంచం కూడా లింక్ ఉండకూడదు. లుక్ కూడా పూర్తిగా కొత్తగా ఉండాలి” అని గట్టిగా చెబుతాడు. మరింత సమయం కావాలని అడిగినా, చివరికి రాజ్ రెండు వారాల గడువు మాత్రమే ఇస్తూ కాల్ ముగించేస్తాడు.
ఈ మాటలన్నీ విన్న కావ్య కొంచం భయంతో రాజ్ తో, “ఇది తాతయ్యగారికి తెలిస్తే బాధపడతారు కదా. మనం వేరే కంపెనీ పెట్టడం కుటుంబానికి సమస్యలు తెస్తుందేమో” అని అంటుంది. రాజ్ మాత్రం ప్రశాంతంగా, “మనిద్దరం చెప్పకపోతే ఎవరికీ తెలియదు. కంపెనీ పనులు అన్నీ పూర్తయ్యేంత వరకూ ఈ విషయం ఇంట్లో ఎవ్వరికి చెప్పొద్దు” అని ధైర్యం చెప్తాడు. రాహుల్‌కి కంపెనీలో కొంత స్వేచ్ఛ ఇద్దామా, అక్క బాధ పడుతుంది కదా అని కావ్య అడిగినా, “ఇప్పుడేం వద్దు. అతనికి బాధ్యతలంటే ఏమిటో అర్థమయ్యే వరకూ ఇలానే ఉండాలి. స్వప్న బాధ పడినా తప్పదు” అని రాజ్ తేల్చి చెప్తాడు.
ఇదిలాఉంటే, ఆఫీసులో రాహుల్ మాత్రం తన దర్పం ప్రదర్శిస్తూ శృతిని పిలిచి కొంచం అసభ్యంగా మాట్లాడతాడు. శృతి లోపల రాహుల్ ని తిట్టుకుంటుంది. తరువాత శృతిని మేనేజర్ దగ్గర ఉన్న ఫైల్ తెమ్మని ఆదేశిస్తాడు. శృతి రాజ్ చెప్పిన మాటను గుర్తుచేస్తూ, “ఆ ఫైల్ గురించి మీకు అనవసరం” అని చెప్పారు కదా అని అంటుంది. రాహుల్ కొంచం కోపంగా వెళ్లి తీసుకు రమ్మని చెప్తాడు. శృతి మేనేజర్ లేరు రాగానే తెచ్చిస్తా అని చెప్పడంతో స్వయంగా మేనేజర్ రూమ్‌లోకి వెళ్లి తానే ఫైల్ కోసం చెక్ చేస్తుంటాడు.
అదే సమయంలో ‘ఆర్’ అనే కొత్త కంపెనీకి సంబంధించిన ఫైల్ కనిపించడంతో అనుమానం మొదలవుతుంది. రాజ్ తనకు ఒక్క మాట కూడా చెప్పకుండా కొత్త కంపెనీ మొదలుపెడుతున్నాడని రాహుల్, వెంటనే మేనేజర్‌ని అడుగుతాడు. అతను కూడా అదే విషయాన్ని నిర్ధారించడంతో రాహుల్ కంపెనీ గురించి తెలుసుకోవడానికి అక్కడికి బయలుదేరుతాడు.
ఇక ఇంట్లో రాజ్, కావ్య లు అపర్ణ సుభాష్ ల పెళ్లిరోజుకి గిఫ్ట్స్ గురించి మాట్లాడుకుంటారు. రాజ్ ఉత్సాహంగా ఇంత చిన్న గిఫ్ట్స్ కాకుండా ఒక పెద్ద గిఫ్ట్ ఇస్తే వాళ్ళు సంతోషపడతారు అంటాడు. ఏంటి అది అని కావ్య అడుగుతుంది. మన పెళ్లి అనుకోకుండా ఎదో అలా జరిగిపోయింది కదా అందుకే మనం మళ్లీ సాంప్రదాయబద్దంగా వాళ్ళ ముందు పెళ్లి చేసుకుని సరదాగా సంతోషంగా బిందెలో ఉంగరాలు తీస్తే సూపర్ ఉంటుంది అంటూ గాల్లో తేలిపోతుంటాడు. అది విని కావ్య అది ఏం అవసరం లేదు, పెళ్లి ఎలా అయిన నాకు బంగారం లాంటి భర్త దొరికాడు అంటుంది. రాజ్ కూడా నాక్కుడా గొప్ప పెళ్ళాం దొరికింది అంటూ నవ్వుతాడు.
మరో వైపు మరింత సమాచారం కోసం నేరుగా ఆర్ కంపెనీ సైట్‌కి వెళ్లి అక్కడి మేనేజర్‌తో మాట్లాడుతాడు రాహుల్. రాహుల్ ని చూడగానే మేనేజర్ బాగా రిసీవ్ చేసుకోవడంతో రాజ్ తనని పంపించాడని చెప్తాడు రాహుల్. స్వరాజ్ కంపెనీకి దీంట్లో ఎలాంటి సంబంధం ఉండకూడదని, అక్కడి నుంచి ఒక టేబుల్ కూడా రాకూడదని రాజ్ చెప్పాడని అతను చెప్పడంతో రాహుల్ తప్పుగా అర్థం చేసుకుంటాడు. “అంటే అధికారికంగా ఏమి ఆ కంపెనీ నుండి తీసుకు రావడం లేదు కానీ అనధికారికంగా డబ్బు, బంగారం అన్నీ ఇక్కడికే పోతున్నాయన్నమాట” అని అతని మనసులో మరింత బలపడుతుంది. ఇంత వరకు ఏం పనులు జరిగాయి అని అడగడంతో మేనేజర్ “ఇప్పటి వరకు లోగో ఇంకా కొత్త కంపెనీకి కావాల్సిన అన్నీ పనులు అయిపోయాయి. ఇంకా మిగిలిన పనులకి ఒక 10 రోజులు పడుతుంది, రాజ్ సర్ ఇప్పటికే లేట్ అయింది అని తిడుతున్నారు. నేను అన్నీ సర్ కి చెప్పాను” అని వివరిస్తాడు. సరే అని రాహుల్ అక్కడ నుండి బయలుదేరుతాడు.
ఇక ఇంట్లో మాత్రం అపర్ణ, సుభాష్ పెళ్లిరోజు వేడుకలు సందడిగా ఉంటాయి. ధాన్యం, కావ్య, అప్పు అపర్ణని ముస్తాబు చేస్తూ ఉంటారు. అపర్ణ ఎంతగా వద్దు అని చెప్పిన వినకుండా చాలా నగలు వేసి రెడీ చేస్తుంటారు. మరో పక్క సుభాష్ దొరక్కుండా తప్పించుకుంటుంటే వెంట పడి మరి ప్రకాశం, రాజ్ ఇంకా కవిగారు బుగ్గన చుక్క పెట్టి పెళ్లికొడుకులా రెడీ చేస్తారు. ఈ హడావిడి అంత చూసి రుద్రాణి ఇందిరాదేవితో ఎదో ఇవాళే పెళ్లి అయినట్టు చాలా ఓవర్ చేస్తున్నారు అంటుంది. ఇందిరాదేవి కళ్ళలో నిప్పులు పోసుకోకుండా ఏదయినా పని చేయమని తిడుతుంది.
అదే సమయంలో రాహుల్ కొంచం విసుగ్గా ఇంటికి వస్తాడు. రుద్రాణి ఏమైంది అని అడుగుతున్నా కూడా పట్టించుకోకుండా లోపలికి వెళ్లిపోతాడు. అది గమనించిన స్వప్న అతని దగ్గరకు వెళ్లి ఆరా తీస్తుంది. చివరకు రాహుల్ తన మనసులో పేరుకున్న అనుమానాలన్నీ ఆమెకు చెబుతాడు—“రాజ్, కావ్య ఇంట్లో ఎవరికీ చెప్పకుండా కొత్త కంపెనీ స్టార్ట్ చేస్తున్నారు. స్వరాజ్ కంపెనీ లాభాలన్నీ రహస్యంగా ఆర్ కంపెనీకి మళ్లిస్తున్నారు. కానీ దాని గురించి ఎవరికీ తెలీదు. మేనేజర్ ని అడిగితే కూడా అతనికి ఏమి తెలీదు అని చెప్పాడు. నేను కంపెనీ బాధ్యతలు తీసుకున్న ఈ టైంలో ఇలా అవుతుంది. ఇది నేను ఎవరికీ చెప్పకపోతే నాదే తప్పు అవుతుంది. లేదంటే పూర్తిగా తెలుసుకోకుండా వెళ్లి అడిగితే రాజ్ హర్ట్ అయ్యే ఛాన్స్ ఉంది. అదే నా టెన్షన్” అని చెప్తాడు.
స్వప్న సలహా ఇస్తూ “మీరు చూసిన ఫైల్ చూపించి అడగండి” అని అంటుంది. రాహుల్ అవి సరిపోవు అని చెప్తూ “లేదు ఇంకా ఆధారాలు దొరకాలి. అవి మాత్రమే సరిపోవు” అనడంతో స్వప్న “అయితే రాజ్ ల్యాప్‌టాప్‌లో ఇంకా ఏమైనా సమాచారం వుంటుంది ఏమో” అని అంటుంది. కానీ రాజ్ ఆ ల్యాప్‌టాప్ మనకి ఎందుకు ఇస్తాడు అని అడగడంతో స్వప్న “అడిగితే ఇవ్వడు కానీ తెలీకుండా నేను వెళ్లి ల్యాప్‌టాప్ తెస్తాను. ఏదయినా ఉంటే వెళ్లి రాజ్ ని నిలదీద్దాం” అని ధైర్యంగా చెప్తూ ల్యాప్‌టాప్ కోసం వెళ్తుంది. రాహుల్ తన ప్లాన్ ఫలిస్తుంది అని నవ్వుకుంటాడు.
అక్కడితో ఈరోజు ఎపిసోడ్ ముగుస్తుంది.
మరుసటి రోజు ఎపిసోడ్ ప్రోమోలో పెళ్లి సంబరాలు జోష్‌లో సాగుతుండగా, స్వప్న ఆవేశంగా ఫ్లవర్ వాజ్ పగలగొట్టి “ఆర్ ఫ్యాక్టరీ అంటే ఏంటీ? స్వరాజ్ కంపెనీకి సంబంధం లేకుండా రహస్యంగా కొత్త కంపెనీ ఎందుకు?” అని గట్టిగా నిలదీస్తుంది. అందరి చూపులు రాజ్ వైపు తిరగడంతో, అతను “స్వప్న చెప్పింది నిజమే” అని అనడంతో అందరు షాక్ అవుతారు.
Source inspiration: Original story from “బ్రహ్మముడి” (JioHotstar). This is a personal written recap and interpretation.
