బ్రహ్మముడి నవంబర్ 26, 2025 బుధవారం ఎపిసోడ్: కుటుంబాన్ని రోడ్ మీదకి తీసుకు రావడానికి రాహుల్ ప్లాన్ …!!! బుల్లెట్ నడిపి రాజ్ ని భయపెట్టిన కావ్య …!!!
ఎపిసోడ్ ప్రారంభంలో రాహుల్ రాజ్ తో “మీరు నన్ను అర్థం చేసుకుని నా గురించి ఆలోచించారు. కానీ మీ మనసులో నాకు ఇంత గొప్ప స్థానం ఉందని నేను ఎప్పుడూ అనుకోలేదు. మీరు నన్ను నా పేరు మీద ఒక కంపెనీ పెట్టి దానికి చైర్మన్‌ని చేస్తారని నేనెప్పుడూ ఊహించలేదు. చాలా థాంక్స్ రాజ్ ” అని చెప్తాడు.రాజ్ “నువ్వు మారాలి అనుకున్నపుడు కళావతి ఎవరికైనా ఒక అవకాశం ఇవ్వాలి అని చెప్పింది. అందుకే నేను మీకు ఈ అవకాశం ఇచ్చాను. నిన్ను నువ్వు ప్రూవ్ చేసుకో” అని అంటాడు. అపర్ణ గట్టిగా “రుద్రాణి నీకు ఇప్పుడు అర్థమైందా? నా కొడుకు, కోడలు ఎప్పుడూ తప్పు చేయరు. వాళ్లు తప్పులను సరిచేస్తారు” అని అంటుంది. స్వప్న కూడా కావ్యకి థాంక్స్ చెప్తుంది. ఇంకా అందరు మళ్లీ పెళ్లిరోజు వేడుకల్లో పాల్గొంటారు.
తరువాత సీతారామయ్య రాజ్ ఇంకా కావ్యతో మాట్లాడుతూ “ఇలాంటి రోజు వస్తుందని నేనెప్పుడూ అనుకోలేదు. ఇది కేవలం ఇటుకలతో కట్టిన ఇల్లు కాదు. మనసులు, ఆప్యాయతలు, బంధాలతో కలిసి ఉన్న చెట్టు. ఆ చెట్టు నీడలో బ్రతికే ఎవరైనా కష్ట నష్టాలని పంచుకుని, సంతోషాలని పెంచుకోవాలి అనే నియమంతో ఈ చెట్టు పెరిగింది. ఎవరు ఏం చేసినా, ఎంత ఎదిగినా కూడా అది స్వరాజ్ గ్రూప్ ఆఫ్ కంపెనీలో భాగం కావాలని నేను నిర్ణయం తీసుకున్నాను, మీ నాన్న , మీ బాబాయి కూడా దానిని అనుసరించారు. కానీ ఈరోజు, మీ కారణంగా ఈ కుటుంబం ముక్కలవుతుంది. ఈ కుటుంబంలో భాగమైన రాహుల్ ఇప్పుడు మరో దారిలో వెళ్తున్నాడు. ఇప్పుడు ఒకరు వెళ్ళిపోతే, రేపు మరొకరు, తరువాత ఇంకొకరు. దారంలో పువ్వులు రాలిపోయినట్టు, రేపు కుటుంబం చెల్లాచెదురైపోతుంది. మీరు దీని గురించి ఆలోచించారా? ” అని బాధగా అడుగుతాడు.
రాజ్ మాట్లాడుతూ “తాతయ్య, దయచేసి మీకు చెప్పకుండా ఈ నిర్ణయం తీసుకున్నందుకు మమ్మల్ని క్షమించండి. కానీ మేము అన్ని ఆలోచించే చేసాము. మనం రాహుల్‌కి వేరే కంపెనీ పెట్టించకపోతే, కుటుంబంలో గొడవలు వచ్చేవి. రాహుల్ పూర్తిగా దారి తప్పాడు. తనకి సరైన స్థానం ఇవ్వడం లేదు అని అందరిని తప్పుగా అర్థం చేసుకుంటున్నాడు. ఇంకా అత్త మాటలు విని తన జీవితం నాశనం చేసుకుంటున్నాడు. అందుకే అతన్ని తిరిగి తన దారిలోకి తీసుకురావాలి. మీరే చూసారు కదా డబ్బు కోసం ఒక అమ్మాయిని నమ్మి పెళ్లి చేసుకున్న భార్యను వదిలేయాలి అనుకున్నాడు. మనం అతనిని మార్చకపోతే, స్వప్న ఇంకా తన బిడ్డ పరిస్థితి ఏమిటి? మన కంపెనీలోనే పని చేయడానికి అతను ఎవరి కోసం పని చేయడు. పనిచేసినా సంతోషంగా ఉండడు. కాబట్టి అతని జీవితాన్ని బాగుచేయడానికి మేము ఇది చేయాల్సి వచ్చింది” అని అంటాడు.
కావ్య మాట్లాడుతూ “తాతయ్య మీరు నాకు, ఇంకా అప్పుకు ఈ కుటుంబానికి కోడళ్ళుగా గొప్ప స్థానాన్ని ఇచ్చారు. కానీ స్వప్న అక్కకి ఆ గౌరవం దక్కలేదు ఎందుకు అంటే రాహుల్ బాధ్యత లేకుండా ఉండటం వల్ల. రాహుల్ గౌరవం పెరిగితేనే మా అక్కకి కూడా విలువ. తను కూడా మాతో సమానంగా ఉండగలదు” అని చెప్తుంది. చివరగా సీతారామయ్య “నిజంగా అదే జరిగితే నేను సంతోషిస్తాను. కానీ మీ నిర్ణయం వల్ల కుటుంబంలో ఏ సమస్య వచ్చినా నేను సహించలేను” అని చెప్పి వెళ్తాడు.
ఆ తరువాత ధాన్యలక్ష్మి గదిలోకి రుద్రాణి వస్తుంది. రుద్రాణి గొప్పగా “10 కిలోల బంగారం కొనడానికి ఎంత ఖర్చవుతుంది” అని అడుగుతుంది. ధాన్యలక్ష్మి ఆశ్చర్యంగా అంత బంగారం ఎందుకు అని ప్రశ్నిస్తుంది. రుద్రాణి రాహుల్ కొత్త కంపెనీకి చైర్మన్ అవుతున్నాడు కదా, ఇక తొందర్లోనే గొప్పవాడు అవుతాడు అని బాగా డబ్బు సంపాదిస్తాడు అని అంటూ తాను కూడా ఇంట్లో అపర్ణ, ధాన్యలక్ష్మి లాగా గొప్ప హోదాలో ఉంటాను అని బిల్డుప్ ఇస్తుంది. దీనిపై ధాన్యలక్ష్మి రాహుల్ కి ఇచ్చింది చిన్న కంపెనీ అని అసలు ఆస్తిలో తనకు హక్కు లేదని, రాజ్–కళ్యాణ్ మాత్రమే 100 కోట్ల ఆస్తికి యజమానులని చెబుతుంది. అలా చెప్పగానే రుద్రాణి విసురుగా అక్కడ నుండి వెళ్ళిపోతుంది.
రుద్రాణి వెళ్లి రాహుల్ తో నిన్ను పిచ్చివాడిని చేసి ఎదో బిస్కెట్ లా ఈ కంపెనీ ఇస్తున్నారు, ఆస్తి అంత వాళ్లే పంచుకుంటారు అని అంటుంది. రాహుల్ మాట్లాడుతూ తనకు ఇచ్చిన ఈ చిన్న కంపెనీని భవిష్యత్తులో స్వరాజ్ గ్రూప్ ఆఫ్ కంపెనీలను స్వాధీనం చేసుకునే అవకాశంగా మార్చుకుంటానని, రాజ్ కి తెలియదు తను నాకు ఏం ఇచ్చాడని, తను నాకు బాధ్యత తెలియాలి అని ఇచ్చిన ఈ కంపెనీ నిజానికి అదే నా చేతిలో ఆయుధమవుతుందని చెబుతాడు. నేనేంటో ఈ కుటుంబానికి తొందరలోనే చూపిస్తాను అని అంటాడు రుద్రాణితో.
మరో వైపు రాజ్ కళావతిని బయటకు తీసుకు వచ్చి ఆమె బకెట్ లిస్టులో ఉన్న “బుల్లెట్ బైక్” కోరికను నెరవేర్చడానికి కొత్త బైక్‌ను చూపిస్తాడు. అది చూసి ఆమె ఆశ్చర్యపోతుంది. కళావతి బైక్ మీద కూర్చుని ఉండగా రాజ్ ఫోటోలు తీస్తాడు. ఇంక నీ కోరిక నెరవేరింది కదా అని రాజ్ అనడంతో కళావతి బైక్ మీద ఫొటోస్ తీసుకోవడం కాదు బులెట్ నడపాలి అని అంటుంది. రాజ్ ఇంక తప్పక సరే అని వెనక ఎక్కి కూర్చుంటాడు. నెమ్మదిగా నడపమని జాగ్రత్తలు చెప్తాడు. కానీ కళావతి బైక్ ని బాగా వేగంగా నడపడంతో రాజ్ భయపడుతూ ఉంటాడు. చివరికి తిరిగి ఇంటికి వచ్చాక రాజ్ ఆమెని ప్రశ్నిస్తాడు బైక్ ఎలా నడిపావు అని. కళావతి అప్పు దగ్గర ముందే నేర్చుకున్నాను అని చెప్పడంతో రాజ్ ఆశ్చర్యపోతాడు. ఇద్దరు నవ్వుకుంటారు.
మరుసటిరోజు ఎపిసోడ్ ప్రోమోలో రాహుల్ ని స్వరాజ్ గ్రూప్ ఆఫ్ కంపెనీలలో భాగం కానవసరం లేదని, తన సొంత కంపెనీపై దృష్టి పెట్టమని చెప్తాడు సుభాష్. అలానే ఇకపై రాజ్ ని ఆఫీసుకు వెళ్ళమని చెప్తాడు. రాజ్ కావ్య కూడా వస్తుంది అని చెప్తాడు. అందరు షాక్ అవుతారు. అలానే కళ్యాణ్ కూడా ఇక తన రైటింగ్ మళ్లీ మొదలు పెడతాను అని అప్పు కూడా తన బాధ్యతలు తిరిగి ప్రారంభిస్తుంది అని చెప్తాడు. ధాన్యలక్ష్మి మాత్రం అప్పు డెలివరీ అయ్యే వరకు అప్పు జాబ్ చేయడానికి వీల్లేదని ఖచ్చితంగా చెప్తుంది.
అంతటితో ఈ ఎపిసోడ్ ముగుస్తుంది.
Source inspiration: Original story from “బ్రహ్మముడి” (JioHotstar). This is a personal written recap and interpretation.
