బ్రహ్మముడి Nov 12th, 2025 బుధవారం ఎపిసోడ్: రాజ్ ని ఒక ఆటాడుకున్న ఇంటి సభ్యులు … !!! మంచివాడిలా కుటుంబాన్ని మోసం చేస్తున్న రాహుల్ … !!!
అర్థరాత్రి కావ్య కోసం చికెన్ మంచూరియా వండుతున్న రాజ్‌ను కుటుంబ సభ్యులందరూ చూసేస్తారు. అందరినీ కావ్య దగ్గరుండి కిచెన్‌లోకి తీసుకెళ్లడంతో రాజ్ షాక్ అవుతాడు. రాజ్ కోపంగా కావ్యను చూసి “ నన్ను ఇరికించావా?” అని అడుగుతాడు. దానికి కావ్య సమాధానమిస్తూ, “భార్య కోసం మీరు చేసిన కష్టం అందరికీ తెలియాలి కదా, మీరు చేసిన వంట రుచి పది మందికి తెలియకపోతే మీ శ్రమకు విలువ ఏంటి?” అని చెబుతుంది. రాజ్ “నన్ను వీళ్లకు బలిచ్చేశావు” అని తలపట్టుకుంటాడు.
ఆ సమయంలో అందరూ ఒక్కొక్కరు ఒక్కో సెటైర్ వేస్తారు. ఇందిరాదేవి “ముసలిదానికి నడుము నొప్పి మందు రాయమంటే ఖాళీగా లేను అంటావు, కానీ పెళ్లానికి చికెన్ మంచూరియా?” అని చెబుతుంది. ధాన్యలక్ష్మీ “అది కూడా అర్థరాత్రి!” అని జోడిస్తుంది. అపర్ణ “కన్నతల్లి తలనొప్పి మందు తెమ్మంటే ముఖం తిప్పుకుంటావు, కానీ పెళ్లానికి మాత్రం సమయం దొరుకుతుంది” అంటుంది. ప్రకాష్, ధాన్యలక్ష్మీ లు కూడా “ఆఫీసుకి, సంతకాలకు, మీటింగులకు బిజీ.. కానీ పెళ్లానికి మాత్రం సమయం ఉంది” అంటూ సరదాగా సెటైర్లు వేస్తారు.
రాజ్ అవాక్కై “మీకు దండం పెడతాను, నా పెళ్లాం ఇలా ట్విస్ట్ ఇస్తుందని ఊహించలేదు” అని చెబుతాడు. కావ్య మాత్రం “వాళ్లు నీ వంటకు రివ్యూ ఇస్తున్నారు” అని నవ్వుతుంది. కోపంగా రాజ్ “వస్తావుగా రా రూమ్ కి ” అని అక్కడి నుంచి వెళ్లిపోతాడు.
తరువాతి రోజు ఉదయం, ఇందిరాదేవి, అపర్ణ, సుభాష్, ధాన్యలక్ష్మీ, ప్రకాష్ అందరు లివింగ్ రూమ్‌లో కూర్చుని రాజ్‌పై పగ తీర్చుకోవాలని ప్లాన్ వేస్తారు. ఇందిరాదేవి “నిన్న రాత్రి అనుకున్నది గుర్తుందా?” అని అడుగుతుంది. అపర్ణ “మర్చిపోను అత్తయ్యా” అని చెబుతుంది. సుభాష్ “మీరు చెప్పాక నేనూ షాక్ అయ్యాను” అని అంటాడు.
తరువాత నిద్రలేచి వచ్చిన రాజ్ అందరిని చూసి “ఏంటి పొద్దున్నే మీటింగ్? ఎవరిని మోసేయడానికి?” అని అడుగుతాడు. ఇందిరాదేవి “ఇప్పుడా లేవడం?” అని తిడుతుంది. సుభాష్ “ఇంట్లో పనులుంటాయని తెలియదా?” అంటాడు. ధాన్యలక్ష్మీ “ఎవరికి ఏం కావాలో చూసుకోవాలని తెలియదా?” అని అంటుంది.
రాజ్ అయోమయంగా “ఎవరి గురించి మాట్లాడుతున్నారు” అని అడుగుతాడు. ఇందిరాదేవి “నిన్నే అడుగుతున్నాం” అంటుంది. అపర్ణ “మేము చెప్పినవి నువ్వే చేసుకుని తీసుకురావాలి” అని చెబుతుంది. రాజ్ ఆశ్చర్యంగా “నేనేమన్నా హోటల్ సర్వర్‌నా ? లేక ఈ ఇంట్లో సర్వెంట్‌ను అనుకుంటున్నారా? నేను స్వరాజ్ – గ్రేట్ బిజినెస్‌మ్యాన్!” అని అంటాడు.
ఇందిరాదేవి వెంటనే “అయితే నిన్న రాత్రి పెళ్లానికి చికెన్ మంచూరియా చేసిందెవరు?” అని వ్యంగ్యంగా అడుగుతుంది. ధాన్యలక్ష్మీ “బిజినెస్‌మ్యాన్‌లు కూడా పెళ్లాలకు చికెన్ మంచూరియా చేస్తారట అత్తయ్యా” అని అంటుంది. ఇందిరాదేవి “బాబు గారికి పెళ్లాం బెల్లం అయింది, అందుకే రాత్రి అల్లం నూరాడు” అని నవ్వుతుంది. అపర్ణ “మనం కాఫీ అడిగితే మాత్రం కారాలు నూరుతున్నాడు” అంటుంది.
సుభాష్ “చికెన్ అదిరిపోయిందట” అని అనగా, ప్రకాష్ “అబ్బో మామూలుగా కాదు అన్నయ్యా” అంటాడు. ధాన్యలక్ష్మీ “పెళ్లాం కోరిక తీర్చడానికి ఎంత కష్టపడ్డాడో” అని నవ్వుతుంది. అంతలో కావ్య వస్తుంది. “ఏంటి మా ఆయన్ని ఇలా ఆడుకుంటున్నారు?” అని అడిగి, అందరికీ టీ, కాఫీలు అందిస్తుంది. అందరూ ఆశ్చర్యంగా “అబ్బో! మొగుడ్ని వెనుకేసుకొచ్చింది” అని అంటారు.
కావ్య నవ్వుతూ “మా ఆయన నా కోరికల లిస్ట్ తీరుస్తానని మాటిచ్చారు. మొదటి కోరిక వంట చేయడం. ఇకనుంచి ప్రతిరోజు ఒక కోరిక తీరుస్తారు” అని చెబుతుంది. ఆమె ధైర్యంగా సవాల్ విసురుతుంది ” మావయ్యలు మీ కోరికలు ఎప్పుడైనా తీర్చారా?” అని.
ఆ మాటతో అపర్ణ, ధాన్యలక్ష్మీలు సీరియస్ లుక్ ఇస్తారు. కావ్య “మా ఆయన నాతో ఎంత ప్రేమగా ఉంటారో, అదే ప్రేమ మీ భర్తలకి మీ మీద ఉందా?” అని. ఆ ప్రశ్నకు సుభాష్, ప్రకాశం మూగబోతారు.
ఆ మాటలతో సుభాష్, ప్రకాశం పౌరుషంగా “మేమూ వంట చేస్తాం. మా భార్యల మీద మాకు ప్రేమ లేదనుకోకండి” అని అంటారు. ఇందిరా వార్నింగ్ ఇస్తుంది “ఆలోచించకుండా మాట ఇవ్వొద్దు. వంట చేయడం పెద్ద విషయం కాదు” అని. కానీ సుభాష్, ప్రకాశం వినకుండానే కిచెన్ వైపు వెళ్తారు.
వాళ్ల వెనకనే వారి భార్యలు కూడా వెళ్తారు. ఇద్దరూ కలిసి వంట చేయాలని నిర్ణయించుకుంటారు. మొదట సులువుగా అనిపించే ఉప్మా చేయాలని నిర్ణయిస్తారు. కానీ తీరా చేసిన తర్వాత ఉప్మా రుచి చూసిన అపర్ణా, ధాన్యలక్ష్మి షాక్ అవుతారు. ఆ రుచి అంతా దారుణంగా ఉంటుంది. “మిమ్మల్ని వంట చేయమన్నందుకు మాకు బుద్ధి లేదు” అని అంటారు. ఇందిర దేవి నవ్వకుండా ఉండలేకపోతుంది.
మరోవైపు, ఆ సమయానికి రాహుల్‌కు ఒక వ్యక్తి ఫోన్ చేస్తాడు. “ఒక డీల్ ఉంది, నీకు లాభం వస్తుంది” అని చెబుతాడు. కానీ రాహుల్ వెంటనే “నాకు ఇలాంటి డీల్స్ వద్దు” అని తిరస్కరిస్తాడు. ఆ వ్యక్తి ఇంటి బయటకే వస్తాడు. “నువ్వు ఫోన్ తీయట్లేదు కాబట్టి వచ్చా. ఫారిన్‌ నుంచి 10 కేజీల గోల్డ్ వచ్చింది. మనం దాన్ని మీ కంపెనీ ద్వారా మార్కెట్‌లో చేర్చగలిగితే నీకు 20 లక్షలు వస్తాయి” అని ఆఫర్ చేస్తాడు.
రాహుల్ మాత్రం గట్టిగా “చేయను. కోటి రూపాయలు ఇచ్చినా ఇలాంటి పని చేయను. ఇకపై నాకు కాల్ చేయకు” అని చెబుతాడు. ఆ వ్యక్తి “ఇంత మారిపోయావేంట్రా?” అని అడుగుతాడు. రాహుల్ ప్రశాంతంగా “తప్పుకి, ఆశకి మధ్య తేడా నేర్చుకున్నాను. ఇక మనిషిగా మారాలి అనిపిస్తోంది” అని చెబుతాడు.
అది వినిపించేలా రుద్రాణి దగ్గరే ఉంటుంది. వెంటనే వచ్చి “నువ్వు పిచ్చివాడివా? ఇంత పెద్ద డీల్ వదిలేస్తావా?” అని తిడుతుంది. రాహుల్ ప్రశాంతంగా “ఈజీ మనీ కోసం చేసిన పనుల వల్లనే ఈ ఇంట్లో నా మీద నమ్మకం పోయింది. ఇక నేను అలాంటి దారిలో వెళ్లను” అని సమాధానం ఇస్తాడు.
రుద్రాణి ఆగకుండా “రాజ్ చెప్పిన మాటలకు కరిగిపోయావా? వాళ్లు నిన్ను బానిసలా చేస్తారు” అని చెబుతుంది. రాహుల్ “ఇన్నాళ్లు నీ మాటలు విని తప్పు చేశాను. ఇప్పుడు మంచివాడిగా, నిజాయితీగా బ్రతకాలని ఉంది” అని చెబుతాడు.
ఆ మాటలన్నీ విన్న స్వప్న బయటకు వస్తుంది. “ఇప్పటి వరకు నీ మార్పు మీద నాకు ఎక్కడో అనుమానం ఉండేది, కానీ ఇప్పుడు నమ్మకం వచ్చింది” అని చెబుతుంది. ఆమె రుద్రాణిని చూసి “నీ కొడుకు చివరికి మంచి దారికి వచ్చాడు, దానిని చెడగొట్టొద్దు” అని హెచ్చరిస్తుంది.
ఇంతటితో ఈ రోజు ఎపిసోడ్ ముగుస్తుంది.
Source inspiration: Original story from “బ్రహ్మముడి” (JioHotstar). This is a personal written recap and interpretation.
