బ్రహ్మముడి నవంబర్ 24, 2025 సోమవారం ఎపిసోడ్: అపర్ణ-సుభాష్ ల పెళ్లిరోజు వేడుకలు …!!! కొత్త కంపెనీ గురించి ఆధారాలతో రాహుల్, స్వప్న …!!!!
ఎపిసోడ్ ప్రారంభంలో సుభాష్–అపర్ణల పెళ్లి రోజున ఇల్లంతా సంబరాలతో, ఉత్సాహంతో నిండిపోయి ఉంటుంది. వారిద్దరూ ఇంకా హాల్‌లోకి రాకపోవడంతో సీతారామయ్య అసహనం వ్యక్తం చేస్తాడు. ఇందిరా నవ్వుతూ, “ఇంత తొందరేమిటి?” అని అడుగుతుంటే, అతను పిల్లలు త్వరగా వస్తే కేక్ తినొచ్చు అని చెప్తాడు. చివరికి పెళ్లి కొడుకు, పెళ్లి కూతురు ముస్తాబై రావడంతో ఇల్లంతా కోలాహలంగా ఉంటుంది. కావ్య 70 కేజీల బంగారం ఇస్తున్నాము అనగానే సుభాష్ 10 నొక్కేసారా అని అనడంతో అపర్ణ నవ్వుతూ మీరు ఉన్నారుగా 100 కి 100 అనడంతో అందరు నవ్వేస్తారు.
కావ్య మా అమ్మాయిని ఎలా చూసుకుంటారు అని అడగడంతో రాజ్ గొప్పగా కావ్యని ఉద్దేశించి “మా ఇంటికి వచ్చిన ఈ అమ్మాయికి కోపం అనేది రాకుండా చూసుకుంటాను. చెమట అనేది పట్టకుండా వింజామరలా, ఆడుకోవడానికి బొమ్మలా, అలసిపోయినప్పుడు జోలపాటలా మారతాను. తనపై నా ఆశలకు ఎలాంటి హద్దు అనేది లేకుండా చూసుకుంటాను. మీకు ఒక్క మాటలో చెప్పాలంటే, మీ అమ్మాయితో నా ప్రయాణం ఎక్కడ ఆగకుండా ఉండాలి అని కోరుకుంటాను” అని చెబుతుంటే, కళ్యాణ్ నువ్వు కావ్య వదిన గురించి చెప్తున్నట్టు ఉంది అంటాడు. ఇందిరా దేవి వాడు చెప్పింది కావ్య గురించే అని అంటుంది. ప్రకాశం “చూసారా మా రాజ్ ఎంత బాగా చెప్పాడో. మరి మీరు ఎలా చూసుకుంటారు మా అబ్బాయిని” అని అంటాడు.
కావ్య కూడా చిరునవ్వుతో, “దూరాన ఉన్న చంద్రుడిని చూస్తేనే సంబరపడిపోతాము అలాంటిది చంద్రుడు చేతికి అందితే ఆయనకి గుడి కట్టిన తక్కువే అవుతుంది. అందుకే గుండెల్లో పెట్టుకుని చూసుకుంటాను. ఆయన కోపాన్ని దీపంలా, నవ్వులని పువ్వులుగా, ఎండలో ఆయనకి గొడుగుగా, ఆయన అడుగులకి మడుగులు ఒత్తుతూ, ఎపుడు ఆయనకి కలలో కూడా కలత అనేది రాకుండా చూసుకుంటాను” అని రాజ్ గురించి గొప్పగా చెప్తుంది. ఇద్దరు పక్కన వాళ్ళని పట్టించుకోకుండా ఒకరిని ఒకరు చూసుకుంటారు. ధాన్యం మా కావ్య మీకు కరెక్ట్ గా సమాధానం ఇచ్చింది అంటుంది. అలా అందరు సరదాగా ఉంటారు.
అంతలో రుద్రాణి “కవితలు, మాటలేనా? గిఫ్ట్ లు ఇచ్చేది ఏమైనా ఉందా?” అని అడుగుతుంది. అందరూ నవ్వుకుంటూ బహుమతులు ఇస్తూ ఉండగా కావ్య ప్రత్యేకంగా అపర్ణ చేతిలో పెట్టిన గిఫ్ట్ తెరవగానే, చిన్ననాటి ఫోటోలతో నిండిన ఆల్బమ్ కనిపిస్తుంది. కావ్య ప్రతి ఫోటో చూపిస్తూ ఆ ఫోటో గురించి చెప్తుంటుంది. అపర్ణ కళ్లలో నీళ్లతో “నిజంగా ఒక్కసారిగా చిన్నపిల్లలా అనిపిస్తోంది. నా జ్ఞాపకాలు ఇవాళ మళ్లీ నా ముందుకొచ్చాయి. అసలు నాకే దొరకలేదు ఇవి అన్నీ నీకు ఎలా దొరికాయి” అని అడుగుతుంది.
కావ్య నవ్వుతూ, “ఈ థ్యాంక్స్‌లో సగం మీ అబ్బాయికి కూడా చెప్పాలి. మీకు స్పెషల్ గా ఇలా గిఫ్ట్ ఇవ్వాలి అని చెప్పగానే ఈ ఫోటోలలో కొన్ని ఆయనే సంపాదించాడు,” అని అంటుంది. ఆ తర్వాత రాజ్ సుభాష్ కి గిఫ్ట్ ఇస్తాడు.సుభాష్ గిఫ్ట్ ఓపెన్ చేయగానే రాజ్ “మీకు ఇష్టమైన వాచ్ నాన్న. తాతగారు కొన్న తొలి వాచ్ పాడు అయింది అని రిపేర్ చేయించి తెచ్చాను” అని చెప్తాడు. సుభాష్ దాన్ని చేతిలో పట్టుకొని, “ఇది నాకు ఇష్టం కాదు ప్రాణం,” అని అంటూ కళ్ళలో ఆనందంతో చెప్తాడు.
కింద సెలబ్రేషన్స్ జరుగుతుంటే, పై అంతస్తులో మాత్రం స్వప్న రాజ్ గదిలోకి వచ్చిన ల్యాప్‌టాప్ కోసం వెతుకుతుంటే, అప్పుడే కావ్య అక్కడికి వస్తుంది. కావ్యని చూడగానే “స్టిక్కర్‌లు కోసం వచ్చాను. నువ్వు లేకుండా నీ గదిలోకి రాకూడదా నేను” అని నటిస్తుంది. కావ్య మంచిగా, “నీ కోసం అందరితో పోరాడి రాహుల్‌ని ఆఫీసుకు పంపించాను. మరి నువ్వు నా గదిలోకి రాకూడదా?” అని అంటుంది. కావ్య బయటికి వెళ్లగానే, ల్యాప్‌టాప్ తీసుకుని రాహుల్ కి ఇస్తుంది స్వప్న. పాస్‌వర్డ్ ఉంది అని రాహుల్ అనడంతో, స్వప్న వెంటనే “9126 ట్రై చెయ్. అది కావ్య బర్త్ డేట్ అని పాస్‌వర్డ్‌గా పెట్టుకున్నానని రాజ్ ఒకసారి చెప్తుంటే నేను విన్నాను” అని చెప్పడంతో రాహుల్ ఆశ్చర్యపోతాడు.
ల్యాప్‌టాప్ ఓపెన్ కాగానే అందులో కంపెనీకి సంబంధించిన డేటా లేకపోవడంతో ఇద్దరూ నిరాశపడతారు. స్వప్న అనుమానంగా, “ముఖ్యమైనవి ఏవైనా మనకి దగ్గరగా పెట్టుకుంటాము కదా అంటే అసలు రహస్యాలు ఫోన్‌లో ఉండి ఉంటాయి,” అని చెబుతుంటే, రాహుల్ కూడా అవును కానీ ఫోన్ ఎలా చూడటం అని అడుగుతాడు. స్వప్న వెంటనే “రాజ్ ఫోన్ నేనే తెస్తాను,” అని ముందుకు వస్తుంది. రాహుల్ ఆపుతూ, “అప్పుడు రాజ్ నిన్నే అనుమానిస్తాడు, నీకు చెడ్డ పేరు రాకూడదు,” అని చెబుతాడు. అయితే స్వప్న, “నీ కోసం ఏ రిస్క్ అయినా చేస్తా,” అని బయటకు దూసుకుపోతుంది.
ఇక హాల్‌లో మాత్రం అందరు ఆనందగా ఉన్న సమయంలో అపర్ణ–సుభాష్‌లు కేక్ కట్ చేస్తుంటే, రాజ్ ఫోటోలు తీస్తుంటాడు. అదే సమయంలో స్వప్న వచ్చి “నీ ఫోన్ ఇవ్వవా. నా ఫోన్ ఛార్జింగ్ అయిపోయింది. అర్జెంటుగా ఒక కాల్ చేయాలి” అని అడుగుతుంది. రాజ్ చేతిలో కెమెరా ఉండటంతో, కళ్యాణ్‌ని పిలిచి తన ఫోన్ తెప్పించి, స్వప్నకు ఇస్తాడు. స్వప్న వెళ్లి ఫోన్ రాహుల్ కి ఇస్తుంది. రాహుల్ ఫోన్ చూసి “నా అనుమానం నిజమే. కొత్త ‘R’ కంపెనీ కోసం బంగారం, డబ్బు అన్ని ఈ కంపెనీ నుండి ట్రాన్స్ఫర్ చేస్తున్నారు. త్వరలో ఆ కంపెనీ ఓపెన్ కానుంది,” అని అంటాడు.
అక్కడితో ఈరోజు ఎపిసోడ్ ముగుస్తుంది.
Source inspiration: Original story from “బ్రహ్మముడి” (JioHotstar). This is a personal written recap and interpretation.
