చిన్ని Nov 8th, 2025 శనివారం ఎపిసోడ్: స్టేజ్ ఆర్టిస్టులతో వచ్చిన చిక్కులు …. !!! లోహిత తల్లిదండ్రులని చూసి షాక్ అయిన మధు, మ్యాడీ … !!!!
లోహిత తల్లిదండ్రులుగా నటించడానికి స్టేజ్ ఆర్టిస్టులును తీసుకు వస్తుంది తన ఫ్రెండ్. లోహిత వాళ్ళతో మీరు చాలా జాగ్రత్తగా మాట్లాడాలి ఎక్సట్రాలు చేయొద్దు అని సూచనలు ఇస్తుంది. అంతలో చిల్లర కింద పడటంతో వాళ్లు ఇద్దరూ దాన్ని తీసుకోవడానికి నాది నాది అని కొట్టుకుంటారు. ఆ దృశ్యం చూసిన లోహిత ఒక్కసారిగా బిత్తరపోతుంది. ఈ పరిస్థితిని గమనించి, “ఏంటే వీళ్ళు. ఇలాంటి వాళ్లని ఎక్కడి నుంచి తెచ్చావ్?” అంటూ తన స్నేహితురాలిని మందలిస్తుంది.
ఇక మరోవైపు మధు గుమ్మం ముందు ముగ్గు వేస్తూ ఉంటుంది. అదే సమయంలో మ్యాడీ ఫోన్‌లో మాట్లాడుతూ వచ్చి, మధు వేసిన ముగ్గుపై తొక్కుకుంటూ వెళ్తాడు. మధు అతన్ని చూసి, అతని వెనకాలే వెళ్లి ఎందుకిలా చేసావ్ అనేలా కోపంగా చూస్తుంది.
దేవా, మ్యాడీని కలవడానికి మధు వాళ్ల ఇంటికి వెళ్లాలని అనుకుంటాడు. నాగవల్లి దేవాను ఆపి, “బావా, అక్కడికి వెళ్లి గొడవ పడకు, మాటలు జాగ్రత్తగా మాట్లాడు. వాడితో అనవసరంగా తగువు పడకు” అని చెబుతుంది. దానికి దేవా “నేను గొడవ కోసం వెళ్ళడం లేదు వల్లీ. నేను ఒక ప్లాన్‌తోనే వెళ్తున్నా. మ్యాడీని తీసుకొచ్చి తీరుతా” అని చెబుతాడు.
ఇక లోహిత తన తల్లిదండ్రులు వచ్చారని వరుణ్, మ్యాడీ, మధు లను బయటకు తీసుకెళ్తుంది. మధు అక్కడ గన్‌మెన్‌లను చూసి, “లోహి, వీళ్లు నిజంగానే నీ తల్లిదండ్రులేనా? మ్యాడీ నాన్న మినిస్టర్ కాబట్టి వాళ్ల దగ్గర గన్‌మెన్ ఉంటారు, కానీ నీ పేరెంట్స్ దగ్గర ఎందుకు?” అని అనుమానం వ్యక్తం చేస్తుంది. దానికి లోహిత చాకచక్యంగా సమాధానమిస్తూ, “మేమూ రిచ్ ఫ్యామిలీ కదా, అందుకే గన్‌మెన్‌లను పెట్టుకున్నాం” అని చెప్పి విషయం కవర్ చేస్తుంది.
తర్వాత లోహిత తన తల్లిదండ్రులుగా వచ్చిన ఆర్టిస్టులను అందరికీ పరిచయం చేస్తుంది. వాళ్లు మాట్లాడేటప్పుడు రాని ఇంగ్లీష్‌తో అనవసరంగా ఎక్కువగా మాట్లాడడంతో అందరికీ అనుమానం కలుగుతుంది. దాన్ని గమనించిన లోహిత, “వాళ్ళకి బాధ కలిగినపుడు కావాలి అని అలా కామెడీ చేస్తుంటారు వీళ్లు” అని సర్ది చెప్తుంది.
తర్వాత వరుణ్‌ను చూపించి, “ఇదిగో ఇతనే నా అల్లుడు” అని చెబుతుంది. కానీ ఆర్టిస్టులు తమ పాత్రలోకి వెళ్లి, “మేం ఇతన్ని అల్లుడిగా అంగీకరించం. మనది 20వ ఫ్లోర్ అయితే వీళ్లది గ్రౌండ్ ఫ్లోర్” అని ఆస్తి, అంతస్తులు గురించి ఇష్టం వచ్చినట్టు మాట్లాడతారు. “అర్థం చేసుకోండి” అని లోహిత చెప్పగానే, వాళ్లు ఒక్కసారిగా లోహిత చెంపల మీద కొడతారు.
ఆ దృశ్యం చూసిన మధు, మ్యాడీ, వరుణ్ ముగ్గురూ షాక్ అవుతారు. మ్యాడీ వెంటనే “ఏంటి ఇది, ఆడపిల్లని ఇలా కొడతారా?” అని అడుగుతాడు. మ్యాడీ కోపంగా ముందుకు వచ్చి, “మా బావ గ్రౌండ్ ఫ్లోర్ కాదు. తను మినిస్టర్ మేనల్లుడు. నేను కూడా మినిస్టర్ కొడుకుని. కొన్ని కారణాల వల్ల మిమ్మల్ని ఇక్కడకు పిలిచాం. కానీ ఆడపిల్లని కొట్టడం సరైంది కాదు తాను ఏం చిన్న పిల్ల కాదు” అని అంటాడు. మ్యాడీ మాటలకి వాళ్ళు భయపడిపోతారు.
మ్యాడీ మాట్లాడబోతుండగా మధు అతన్ని ఆపి, “వాళ్లకి స్టోరీ చెప్తా” అని జరిగింది అంతా చెబుతుంది. ఆ సమయంలో లోహిత ఆర్టిస్టుల దగ్గరికి వెళ్లి, “ఇంకా ఎక్కువ లాగకండి, తెగిపోతుంది” అని హెచ్చరిస్తుంది. వెంటనే వాళ్లు “మేము అల్లుడిని అంగీకరిస్తున్నాం అమ్మా” అని చెబుతారు.
తర్వాత నల్లపూసల కార్యక్రమానికి అందరూ రెడీ అవుతారు. వరుణ్, లోహిత ఇద్దరూ పూజలో కూర్చుంటారు. పక్కనే మధు, మ్యాడీ చూస్తూ ఉంటారు. లోహిత తండ్రిగా నటిస్తున్న ఆర్టిస్ట్ పూజ మధ్యలో పక్కనే ఉన్న గన్‌మెన్ జేబులోంచి డబ్బు తీసుకోవడానికి ప్రయత్నిస్తాడు. మధు అది గమనించి ఆశ్చర్యపోతుంది.
అతను తర్వాత మరో గన్‌మెన్ దగ్గర ఫోన్ దొంగిలిస్తాడు. ఆ దృశ్యం మధుతో పాటు లోహిత కూడా గమనిస్తుంది. మధూ చూడటం లోహిత కూడా చూస్తుంది. అంతలో లోహిత తనను గమనిస్తున్నట్లు అతనికి తెలిసిపోతుంది. వెంటనే అతను విషయం కవర్ చేయడానికి “మీరు నాకు గన్‌మెన్‌లుగా నాకు సెక్యూరిటీగా వచ్చారు కానీ మీ దగ్గర వస్తువులకు జాగ్రత్త లేకుండా పోతుంది, ఇదిగో మీ ఫోన్” అంటూ ఇవ్వడం ప్రారంభిస్తాడు.
లోహిత అతన్ని సీరియస్‌గా హెచ్చరిస్తూ, “ఇంకోసారి చేస్తే చంపేస్తా” అని వార్నింగ్ ఇస్తుంది.
పూజ సమయంలో లోహిత కొబ్బరికాయ కొడుతుంది. ఆ కొబ్బరి చిప్ప నేలపై పడగానే ఆర్టిస్టులు ఇద్దరూ దానికోసం “నాది” – “నాదే” అంటూ తగువులాడుతారు. అందరూ బిత్తరపోతారు. వెంటనే వాళ్లు కవర్ చేస్తూ, “కొబ్బరి చిప్ప నేల మీద పడకూడదు కాబట్టి తీసుకున్నాం” అని అంటారు.
తర్వాత వరుణ్ లోహిత నుదుటిపై బొట్టు పెట్టి నల్లపూసలు వేస్తాడు. ఆ దృశ్యం మధు చూసి ప్రేమగా మ్యాడీని చూస్తుంది. లోహిత వరుణ్ ఆశీర్వాదం తీసుకుంటుంది. ఆ తర్వాత ఇద్దరూ లోహిత తల్లిదండ్రులుగా వచ్చిన ఆర్టిస్టుల ఆశీర్వాదం తీసుకుంటారు.
వాళ్లు “చిల్లర, కొబ్బరి చిప్పల ప్రాప్తి రస్తు” అంటూ ఆశీర్వదిస్తారు. ఆ మాట విని అందరూ నోరెళ్లబెడతారు. మధు “చిల్లర ఏంటి అండీ” అని అడుగుతుంది. వెంటనే అది కవర్ చేసుకుంటూ “చిల్లర కాదు చిరంజీవి సుఖీభవ అన్నాము” అని అంటారు. మ్యాడీ మరి కొబ్బరిచిప్ప అన్నారు కదా అని అడుగుతాడు. దానికి “మీ ఇంట్లో ప్రతి రోజు పూజలు జరుగుతూ ఉండాలి, కొబ్బరికాయలు కొట్టి కొబ్బరి చిప్పలు నైవేద్యంగా పెట్టాలి అని అర్ధం” అని కవర్ చేస్తారు. ఇంకా పూజ అయిపోయింది కదా అని అనగానే అయితే “షాట్ ఓకే ఇట్స్ స్టిల్ టైం” అంటూ యాక్టింగ్ భాషలో మాట్లాడతారు. అందరు షాక్ అవుతారు.
ఆ సన్నివేశంతో ఈరోజు ఎపిసోడ్ ముగుస్తుంది.
Source inspiration: Original story from “చిన్ని” (JioHotstar). This is a personal written recap and interpretation.
