చిన్ని Nov 13th, 2025 గురువారం ఎపిసోడ్: వసంతని బురిడీ కొట్టించిన లోహిత … !!! తప్పించుకున్న హాఫ్ టికెట్ … !!! నాగవల్లికి నిజం చెప్పిన దేవా … !!!
ఎపిసోడ్ మొదట్లో దేవేంద్రవర్మ, లోహిత మరియు వరుణ్‌లను తన ఇంటికి తీసుకువస్తాడు. వారు ఇంట్లోకి అడుగు పెట్టగానే లోహిత నమస్కరిస్తూ నాగవల్లి కాళ్లపై పడుతుంది. కానీ నాగవల్లి సీరియస్‌గా “ఇలాంటి ఓవర్ యాక్షన్ నా దగ్గర పనిచేయదు” అంటూ కఠినంగా మాట్లాడుతుంది.
అప్పుడే మహి ముందుకు వచ్చి నాగవల్లిని చూసి “బావని ఇంట్లోకి రానిచ్చినందుకు థ్యాంక్స్ మమ్మీ” అంటూ కృతజ్ఞత తెలిపి సారీ చెబుతాడు. అతను సరదాగా మాట్లాడి, చమత్కారంగా వ్యవహరించి నాగవల్లిని నవ్విస్తాడు.
కొద్దిసేపటికి మహి మధు చెప్పిన మాటలు గుర్తుచేసుకుంటాడు. “మమ్మీ నీ చేతివంట తిని చాలా రోజులయ్యాయి. బాగా ఆకలిగా ఉంది. వంట చేసేయ్ మమ్మీ, నేను ఒక పట్టు పడతాను” అని అంటాడు. ఆ మాట విన్న ఆడవాళ్ళంతా కిచెన్ వైపు వెళ్తారు. దేవేంద్రవర్మ దగ్గరకు వెళ్లి మహి కూడా “థ్యాంక్స్ డాడీ” అని చెబుతాడు. దేవేంద్రవర్మ మనసులో “ఇంకా ఒక నెల రోజుల్లో చిన్ని సమస్య తీరుతుంది” అని అనుకుంటాడు.
ఇక మహి తన గదిలో కూర్చుని చిన్ని ఫోటోలు చూస్తూ “చిన్ని, మళ్లీ నేనూ మా ఇంటికి వచ్చేశా. నా స్నేహితురాలు మధు వల్ల తిరిగి వచ్చేశా” అని తన మనసులో అనుకుంటాడు.
మరోవైపు మధు మాత్రం మహి వాళ్లు ఇంటికి చేరుకున్నారో లేదో అని ఆందోళన చెందుతుంది. మహి “ఇంకా ముప్పై రోజులు మాత్రమే మిగిలాయి” అని ఆలోచిస్తున్నప్పుడే మధు నుంచి ఫోన్ వస్తుంది. మధు అడగగానే మహి “మా అమ్మ చాలా హ్యాపీగా ఉంది” అని చెబుతాడు. దానికి మధు “అది విని నాకు చాలా సంతోషంగా ఉంది మ్యాడీ” అని అంటుంది. ఇద్దరూ కొద్దిసేపు మాట్లాడుకుంటారు. ఆ తర్వాత మహి “రేపు కలుద్దాం మధు, నీకు ఒక ముఖ్యమైన విషయం చెప్పాలి” అని చెబుతాడు. మధు “సరే” అని అంగీకరిస్తుంది.
ఇక లోహిత వరుణ్‌కి “ఇప్పుడు నాకు చాలా సంతోషంగా ఉంది” అని చెబుతుంది. వరుణ్ మాత్రం “మా అత్త కోపం అంత ఈజీగా పోదు, ఇంట్లోకి రానిచ్చింది కాబట్టి కోపం పోయిందనుకోవద్దు” అని హెచ్చరిస్తాడు. దాంతో లోహిత “ఆంటీ కోపం నేను తగ్గిస్తా” అని అంటుంది.
అప్పుడే అక్కడికి శ్రేయ, వసంత వస్తారు. వరుణ్ “అమ్మా, నువ్వే అత్త కోపం తగ్గించాలి” అని అడుగుతాడు. లోహిత వెంటనే వసంత చేతులు పట్టుకుని “మీరు కోపం తగ్గించండి ఆంటీ” అని అంటుంది. వసంత “ఎవరే నీకు ఆంటీ?” అంటూ కోపంగా స్పందిస్తుంది.
వరుణ్ మధ్యలో మాట్లాడుతూ “అమ్మా, ఎంతైనా తను నీ కోడలు కదా, అలా అనొద్దు” అని చెబుతాడు. దాంతో వసంత “కొడుకు పెళ్లి చేసుకున్నంత మాత్రాన కోడలు అయిపోదురా” అని అంటుంది.
లోహిత కళ్లలో నీళ్లు పెట్టుకుని “మేము ప్రేమించి పెళ్లి చేసుకున్నాం కానీ సంతోషంగా లేము ఆంటీ. మిమ్మల్ని ఎంత బాధ పెట్టానో, దాని వల్ల నేను ఎంత బాధ పడ్డానో మీకు తెలియదు. ఇక మీదట మా వల్ల మీకు ఏ బాధ రాకుండా చూసుకుంటా” అని చెబుతుంది. వసంత ఆ మాటలు విని మౌనంగా ఉంటుంది.
వరుణ్ కూడా “వాళ్ళ అమ్మానాన్నలు కూడా మమ్మల్ని ఆశీర్వదించారు” అని చెబుతాడు. వసంత “కోపం, బాధ ఇవి ఒక్కరోజులో పోవు, కొంత సమయం పడుతుంది” అని సమాధానమిస్తుంది.
వరుణ్ “అయితే వాళ్లను పిలిపిద్దామా?” అని అడగగా, వసంత “సరే” అని చెబుతుంది. కానీ లోహిత వెంటనే “వాళ్లు ఇక్కడ లేరు, ఫారెన్ వెళ్ళిపోయారు” అని చెబుతూ తప్పించుకుంటుంది.
మరో సీన్‌లో, రౌడీలు మందు తాగుతూ కూర్చుంటారు. ఆ సమయంలో ఆఫ్ టికెట్ వాళ్ల కంటికి పడకుండా చేతి కట్లు విప్పుకుని బాలరాజుని కూడా తప్పిస్తాడు. కానీ బాలరాజు బలహీనంగా ఉండటంతో రోడ్డు పక్కన కూలబడిపోతాడు. రౌడీలు వారిని గమనించి వెంటపడతారు.
ఆఫ్ టికెట్ బాలరాజుని లేపుతూ “రా అన్న, మనం తప్పించుకుందాం” అని అంటాడు. కానీ బాలరాజు “నాకింకా శక్తి లేదు. నువ్వు పారిపో, చిన్నిని జాగ్రత్తగా చూసుకో” అని చెబుతాడు. ఆ మాట విని ఆఫ్ టికెట్ పారిపోతాడు. రౌడీలు మళ్లీ వచ్చి బాలరాజును పట్టుకుని తీసుకెళ్తారు.
ఈ విషయం దేవేంద్రవర్మకు తెలిసిన వెంటనే కోపం వస్తుంది. ఆ సమయంలో నాగవల్లి అతని దగ్గరకు వచ్చి “బావ, వరుణ్ వాళ్లని ఇక్కడికి తీసుకురావడం నాకు నచ్చలేదు” అని చెబుతుంది. దేవేంద్రవర్మ ఆమెకు మ్యాడీకి ఇచ్చిన 30 రోజుల గడువు విషయాన్ని వివరిస్తాడు. ఈ సంభాషణను దూరంగా నిల్చొని లోహిత వింటుంది. ఆ విషయం విని ఆమె ఆశ్చర్యపోతుంది. నాగవల్లి మాత్రం ఆ మాటలు విని సంతోషంగా ఫీలవుతుంది.
మరుసటి రోజు ఉదయం మహి మధుని కలవడానికి సిద్ధమవుతాడు. అతను రెడీ అవుతుండగా నాగవల్లి “వెళ్లే ముందు తినేసి వెళ్లు” అని చెబుతుంది. మహి “లేదు మమ్మీ, త్వరగా వెళ్లాలి” అని అంటాడు. నాగవల్లి “నిన్నటి వరకు అక్కడే ఉన్నావ్ కదా, ఇప్పుడే అంత త్వరగా వెళ్లాల్సిన పని ఏమిటి?” అని అడుగుతుంది.
ఆ సన్నివేశంతో నేటి ఎపిసోడ్ ముగుస్తుంది.
Source inspiration: Original story from “చిన్ని” (JioHotstar). This is a personal written recap and interpretation
