చిన్ని Nov 20th, 2025 గురువారం ఎపిసోడ్: ఒకరికి ఒకరు తమ ప్రేమని తెలుపుకున్న మధు, మ్యాడీ … !!!
ఎపిసోడ్ ప్రారంభంలో నాగవల్లి దగ్గరకు దేవా వచ్చి మ్యాడీ గురించి అడుగుతాడు. మ్యాడీ ఇంకా చిన్ని కోసం వెతుకుతున్నాడని ఇంకా గడువు ఎక్కువ లేదు కాబట్టి దొరకదు అని ధీమాగా చెప్తుంది నాగవల్లి. అయినా మనం రిలాక్స్ అవ్వకూడదని, ప్రేమ అనే దాంట్లో ఉన్న శక్తి ఎవరినైనా కలుపుతుందని, తన ముందు మాట కూడా మాట్లాడలేని వరుణ్ కూడా ప్రేమ వల్ల పెళ్లి చేసుకున్నాడని ఉదాహరణగా చెప్తాడు దేవా.
దేవా మాట్లాడుతూ “ఇది వరుణ్ గొప్పతనం కాదు, ప్రేమ గొప్పతనం. మ్యాడీ చిన్నిని ఎంతగా ప్రేమిస్తున్నాడో మనకి తెలుసు కదా. ఆ ప్రేమ వాళ్లిద్దర్ని తిరిగి కలుపుతుందేమో అని నా భయం” అని వెల్లడిస్తాడు. అందుకే మ్యాడీ ఎక్కడికెళ్తున్నాడు, ఎవరిని కలుస్తున్నాడు, ఏం చేస్తున్నాడు అన్నింటిని తెలుసుకోవాలని, అతనికి తెలియకుండా మన వాళ్లను ఫాలో అవమని నాగవల్లికి ఆర్డర్ ఇస్తాడు. నాగవల్లి అన్నీ చూసుకుంటానని చెప్పి మ్యాడీకి కాల్ చేస్తుంది, కానీ ఫోన్ కలవదు. తర్వాత PAకి కాల్ చేసి మ్యాడీ ఎక్కడున్నాడో తెలుసుకోమని చెబుతుంది.
ఇదిలా ఉండగా, మ్యాడీ రోడ్డుపై నడుస్తూ రోడ్ పక్కన ఉన్న కళ్లు లేని చిన్న పాప దగ్గరికి వెళ్తాడు. ఆమెకి గతంలో తనతో జరిగిన సీతాకోకచిలుక బొమ్మ సంఘటనని గుర్తు చేస్తూ మాట్లాడతాడు. పాప మ్యాడీ చేతిని తడుముకుని అతన్ని గుర్తుపడుతుంది. ఇంతలో మధు కూడా అక్కడికి వస్తుంది. పాప, “నీ ఫ్రెండ్ చిన్ని కనిపించిందా?” అని అడగ్గా మ్యాడీ బాధగా లేదు అని చెబుతాడు. పాప అతనికి ధైర్యం చెప్పుతూ “బాధ పడొద్దు అన్న. చిన్ని త్వరలోనే కనిపిస్తుంది” అని అంటుంది. అంతలో పాప మధు చేతిని పట్టుకుని గుర్తు పడుతుండగా మధు మాట మార్చేస్తుంది.
మ్యాడీ దూరంగా వెళ్లి నిశ్శబ్దంగా బాధపడతాడు. మధు అతన్ని గమనించి, చిన్ని కనిపించకపోవడం వల్ల మ్యాడీ పడుతున్న బాధను అర్థం చేసుకొని, ఎలా అయినా ఈ బాధ తగ్గించాలని అనుకుంటుంది. మధు హఠాత్తుగా మ్యాడీతో “ఇప్పుడే చిన్ని నీ ముందుకొస్తే నువ్వు ఏం చేస్తావ్?” అని అడుగుతుంది. మ్యాడీ ఆశ్చర్యంగా చూస్తుంటే, మధు “నేనే నీ చిన్ని. ఇన్నాళ్లు కనిపించకుండా ఉన్న చిన్ని నేనే” అని చెబుతుంది. మ్యాడీ ఒక్క క్షణం నిజంగానే నమ్మి “ఏంటి? నువ్వే నా చిన్నినా?” అని ఎమోషనల్ అవుతాడు. కానీ వెంటనే మధు అలా ఊహించుకో అంటూ “చిన్ని నిజంగా నీ ముందుకొస్తే నువ్వు ఏం చెప్తావో నాకు చెప్పు” అని అడుగుతుంది.
అప్పుడే మ్యాడీ కొద్దీ దూరం వెళ్లి తిరిగి పరుగెత్తుకుంటూ వచ్చి, ఎమోషనల్ గా “చిన్నీ చిన్నీ నన్ను గుర్తుపట్టలేదా? నేను నీ మహి” అని అంటాడు. మ్యాడీ చిన్నప్పుడు తాను, చిన్ని, లోహి, చందు కలిసి ఉన్న రోజుల్ని గుర్తు చేస్తూ, చిన్ని చెప్పకుండా అకస్మాత్తుగా వెళ్లిపోయినందుకు ఎంత బాధ పడ్డాడో, ఎంత టెన్షన్ పడ్డాడో చెప్తూ, అప్పటినుంచి ఇప్పటి వరకూ చిన్నిని మర్చిపోయే ఒక్క క్షణం కూడా తన జీవితంలో లేదని చెబుతాడు.
మ్యాడీ మాట్లాడుతూ “అలా నువ్వు నా ప్రాణం అయ్యావు చిన్ని. చిన్నప్పుడు అది ప్రేమో స్నేహమో తెలీదు కానీ తరువాత అర్థమైంది మనిద్దరి మధ్య ఉన్నది స్నేహం మాత్రమే కాదు ప్రేమ అని” అని చెబుతాడు. ఇంకా తన అమ్మానాన్నల తర్వాత తన జీవితంలో మొదటి స్థానం చిన్నిదే అని, ఆమె కోసం చాలా తిరిగానని, కలలు కన్నానని చెప్పి చివరికి “నేను నిన్ను ప్రేమిస్తున్నా చిన్ని. చాలా ప్రేమిస్తున్నా” అని మనస్ఫూర్తిగా చెప్తాడు. ఇది అంతా వాళ్ళకి తెలియకుండా మధు ఫ్రెండ్ ఫోన్ లో వీడియో తీస్తూ ఉంటుంది.
మ్యాడీ మాటలు విన్న మధు లోపల చాలా సంతోషపడుతుంది. ఆపై చిన్నిలా నటిస్తున్నట్టుగా, “నువ్వు నన్ను ప్రేమిస్తున్నావని చెబితే నేను ఎలా నమ్మాలి? నీ లాంటి డబ్బున్న ప్రేమని నమ్మొచ్చా?” అని ప్రశ్నిస్తుంది. మ్యాడీ మాత్రం వెంటనే “నా ఆస్తి మొత్తం అనాథాశ్రమానికి రాసి ఇచ్చేసి చెప్తే నమ్ముతావా?” అని చెప్పి తన ప్రేమ ఎంత నిజమో చెప్తాడు . మధు “నేను నీకు అసలు కనిపించకపోతే ఏం చేసేవాడివి?నాకు పెళ్లి అయిపోయి ఉంటే? లేదంటే నేను చనిపోయి ఉంటే నువ్వు నన్ను మర్చిపోయి మీ ఇంట్లో వాళ్లు చెప్పిన అమ్మాయిని పెళ్లి చేసుకునేవాడివి కదా?” అని అడుగుతుంది. మ్యాడీ మాత్రం “అది నేను ఉంటే కదా చిన్ని. నువ్వు లేకుండా నీ మహి ప్రాణాలతో ఎలా ఉంటాడు” అని అంటూ ఏడుస్తాడు.
మధు ఆనందంతో వెనక నుండి మ్యాడీని హత్తుకుని “ఐ లవ్ యు మహీ. I love you” అని ఎమోషనల్ గా చెప్తుంది. మ్యాడీ ఓ క్షణం నిజంగానే ఇది చిన్ని అనుకుని కళ్లుమూసుకొని ఆ ఆనందంలో తేలిపోతాడు. కొద్ది సేపటి తర్వాత మధు తేరుకుని పక్కకి జరిగి “చిన్ని నిజంగా నీ ముందుకొస్తే ఇలానే రియాక్ట్ అవుతుంది మ్యాడీ. చిన్ని చాలా అదృష్టవంతురాలు. చిన్నిని నీ ముందుకు తీసుకురావడం నా బాధ్యత. అది త్వరలోనే జరుగుతుంది. నేను ప్రామిస్ చేస్తున్నా” అని చెప్తుంది.
అప్పుడు దేవా ఫోన్ రావడంతో మ్యాడీ అక్కడినుంచి వెళ్తాడు. వెంటనే స్వప్నని చూసి మధు, “ఎప్పుడొచ్చావ్?” అని అడగ్గా స్వప్న “నీకు మ్యాడీ లవ్ ప్రపోజ్ చేసినప్పుడు వచ్చా” అని నవ్వుతూ చెబుతుంది. అదే సమయంలో లోహిత వాళ్ల మాటల్ని విని షాక్ అవుతుంది. మధు స్వప్నకి “త్వరలోనే నేను చిన్ని అని మ్యాడీకి చెబుతా” అని చెబుతుంది. స్వప్న వెంటనే “అయితే ఇప్పుడే చెప్పు” అని అంటుంది. కానీ మధు “రేపు చెబుతా” అని చెప్పడంతో లోహిత మరింత షాక్ అవుతుంది.
అంతటితో ఈ ఎపిసోడ్ ముగుస్తుంది.
Source inspiration: Original story from “చిన్ని” (JioHotstar). This is a personal written recap and interpretation
