గుండె నిండా గుడి గంటలు Nov 10th, 2025 సోమవారం ఎపిసోడ్: సుశీలమ్మ ఆఖరి కోరిక … !!! బాలు తీర్చగలడా … ???
ఎపిసోడ్ ప్రారంభంలో ప్రభావతి, కామాక్షి మధ్య సంభాషణ జరుగుతుంది. ప్రభావతి, కామాక్షితో మాట్లాడుతూ తన పాత టీవీ కావాలని అడుగుతుంది. దానిని ఇవ్వడానికి కామాక్షి కొద్దిగా సంకోచించినా, చివరికి ఒప్పుకుంటుంది. ప్రభావతి, “టీవీ ఇస్తే మా అత్తయ్య ఇచ్చే రిటర్న్ గిఫ్ట్‌లో సగం నీకు ఇస్తా” అని చెబుతుంది. దానికి కామాక్షి నవ్వుతూ “అలాగే, వద్దంటే ఊరుకుంటావా, తెస్తాను” అని అంగీకరిస్తుంది.
ఇదే సమయంలో మరోవైపు సుమతి, మీనా అడిగింది అని స్మార్ట్ ఫోన్ తీసుకొచ్చి ఇస్తుంది. ఎందుకు ఫోన్ అని అడగగా మీనా అమ్మమ్మ పుట్టినరోజు వేడుకల ఫోటోలు, వీడియోలు తీయడానికి అని సమాధానం ఇస్తుంది. ఫోన్ ఇస్తూ సుమతి, మీనాతో కవరింగ్ నగల విషయాన్ని ప్రస్తావిస్తుంది. “ఇంట్లో గొడవ జరిగిందని విన్నాను. కవరింగ్ నగలు తీసుకెళ్లారట?” అని సుమతి అడుగుతుంది. దానికి మీనా సమాధానం ఇస్తూ, “వాళ్లు కవరింగ్ అని చెప్పారు కానీ అవి అసలు నగలే. పెద్దగా గొడవ ఏమీ జరగలేదు. మీ బావ అవి కవరింగ్ నగలు కాదు అని గట్టిగ చెప్పాడు అంతే” అని చెబుతుంది.
సుమతి మాత్రం అనుమానంగా “బావ గట్టిగా కవరింగ్ కాదని చెప్పాడు. కానీ అవి మీ అత్త దగ్గర ఉన్నాయి కదా అందుకే ఏదో జరిగిందని అనిపిస్తోంది” అని చెబుతుంది. మీనా, “ఇది మా ఇంటి విషయం, నీకు తెలుసుకోవాల్సిన అవసరం లేదు. అమ్మకు కూడా ఏమి చెప్పకు అనవసరంగా కంగారు పడుతుంది. ఫంక్షన్ టైంకి వచ్చేయండి ” అని సుమతిని మందలించి పంపిస్తుంది.
మరోవైపు సుశీలమ్మ తన కొడుకు సత్యం‌తో మాట్లాడుతూ “రేపే ఊరికి వెళ్తాను” అని చెబుతుంది. సత్యం కొద్దిగా నిరుత్సాహపడతాడు. పనులు ఉన్నాయి అని చెప్పడంతో సరే అని ఇద్దరూ హాయిగా మాట్లాడుకుంటున్నప్పుడు మీనా ఫోన్లో కెమెరా ఆన్‌ చేసి వీడియో తీయడం మొదలుపెడుతుంది. సత్యం ఆశ్చర్యంగా “ఏం చేస్తున్నావ్ మీనా?” అని అడుగుతాడు. దానికి మీనా “బామ్మ పుట్టినరోజు వీడియో తీసి ఆమెకు ఒక తీపి గుర్తుగా పంపాలని అనుకుంటున్నా” అని చెబుతుంది.
సుశీలమ్మ నవ్వుతూ “నేనేమైనా సినిమా హీరోయిన్‌ని? నా పుట్టినరోజు అయితే ఏమైనా గొప్ప? ఇవన్నీ అవసరమా?” అని అడుగుతుంది. మీనా మాత్రం “మాకు మీరు గొప్పే. 75వ పుట్టినరోజు అంటే మాములు విషయం కాదు” అని చెబుతుంది. సుశీలమ్మ చిరునవ్వుతో “సరే, నీకిష్టమైతే తీసుకో” అని అంగీకరిస్తుంది.
మీనా, “ఏదైనా మాట్లాడండి బామ్మ” అని అడుగుతుంది. సుశీల తన కొడుకు సత్యం గురించి మాట్లాడడం మొదలుపెడుతుంది. అదే సమయంలో ప్రభావతి అక్కడికి వచ్చి వీడియోలో కనిపిస్తుంది. సుశీల కొంచెం విసుగ్గా “పక్కకు జరుగు” అని అంటుంది. దాంతో ప్రభావతి సరదాగా “ఈయన బాహుబలి, మీరు రాజమాత. మీరే తీసుకోండి” అని చెబుతుంది. దానికి సుశీల “నువ్వు దేవసేనవా?” అని తిప్పికొడుతుంది. ఆ సరదా సంభాషణలో మీనా, సత్యం నవ్వుతారు.
తర్వాత మీనా “బామ్మ, మనం పైకెళ్లి వీడియో తీసుకుందాం. కింద డిస్టర్బెన్స్ ఎక్కువగా ఉంది” అని చెబుతుంది. ఇద్దరూ మేడపైకి వెళ్తారు. అక్కడ సుశీలమ్మ ఇటుకలు కుప్పగా ఉన్నట్లు గమనించి “ఇవి ఎందుకు ఇక్కడ?” అని అడుగుతుంది. దాంతో మీనా నిజం చెబుతుంది – “గది కట్టిస్తానని ఆయన శపథం చేశాడు. దాని కోసమే ఈ ఇటుకలు తెచ్చారు” అని చెబుతుంది.
సుశీలమ్మ కాస్త సీరియస్‌గా “నా నగలు అమ్మి సహాయం చేస్తాను” అని చెబుతుంది. కానీ మీనా “అవసరం లేదు బామ్మ. ఆయన కష్టపడి కట్టుకుంటేనే మాకు గౌరవం. ఇప్పటికే మీరు మా కోసం చాల చేసారు” అని సమాధానం ఇస్తుంది. సుశీలమ్మకు మనవరాలి పరిస్థితి అర్థమై బాధతో “ఎప్పుడైనా డబ్బు అవసరమైతే చెప్పు, వెంటనే తీసుకువస్తాను” అని చెబుతుంది. మీనా కృతజ్ఞతతో తల ఊపుతుంది.
ఆ తరువాత మీనా “మీ తీపి జ్ఞాపకాలు చెప్పండి బామ్మ” అని అడుగుతుంది. సుశీలమ్మ చిన్ననాటి స్నేహితుల గురించి చెబుతుంది. తనకు ముగ్గురు స్నేహితులు ఉండేవారని — సుబ్బలక్ష్మి, రాజేశ్వరి, సత్యవతి అని చెబుతుంది. వారంతా తనకు చాలా దగ్గరగా ఉండేవారని, ఇప్పుడు వారిని చూడలేకపోతున్నానని, ఒక్కసారి అయినా కలవాలని తన కోరిక అని చెబుతుంది. “ఇది నా చివరి కోరిక. నా కోరిక తీర్చేవారు ఉన్నారో లేదో తెలియదు” అని భావోద్వేగంగా చెబుతుంది. మీనా ఆమెను ఓదారుస్తుంది.
ఇక మరోవైపు మౌనిక గుడికి వెళ్ళేందుకు సిద్ధమవుతుంది. ఆమె వెళ్ళబోతుంటే భర్త సంజు ఆపుతాడు. “గుడికి వెళ్ళడానికి ముందు భర్త అనుమతి తీసుకోవాలని ఇంట్లో నేర్పించలేదా?” అని కోపంగా అడుగుతాడు. మౌనిక “వెంటనే వెళ్ళి వచ్చేస్తా” అని సమాధానం ఇస్తుంది. ఆ సమయంలో సంజు తల్లి అక్కడికి వచ్చి పరిస్థితిని సర్దుతుంది. సంజు మాత్రం కోపంగా “నువ్వే నీ కోడలిని చెడగొడుతున్నావు” అని తన తల్లిపై కోపం చూపుతాడు. చివరికి “రాత్రి రాను, ఫార్మ్ హౌస్‌కి వెళ్తున్నా” అని చెప్పి బయటకి వెళ్తాడు.
ఇంతలో సత్యం, బాలు ఇంకా ఇంటికి రాకపోవడంతో కంగారుపడుతాడు. మీనాకు కాల్ చేయమని చెబుతాడు. కానీ బాలు కాల్ లిఫ్ట్ చేయడు. ఇంతలో ప్రభావతి వచ్చి “అతను నానమ్మ పేరు చెప్పి తాగి తిరుగుతూ ఉంటాడు, రేపు ఉదయాన్నే తూలుతూ వస్తాడు చూడు” అని వ్యంగ్యంగా చెబుతుంది. సత్యం కోపంతో “అనవసరంగా జోక్యం చేసుకోకు” అని మందలిస్తాడు. కానీ ఆమె వెళ్ళిపోయిన తర్వాత సత్యం కూడా బాలు తాగాడేమోనని అనుమానపడతాడు. మీనా కూడా “బామ్మ కోసం బంగారు గొలుసు కొనలేకపోయాము అనే బాధతో తాగుతారు ఏమో అని ” ఆందోళన చెందుతుంది.
ఇంకా బాలు వేరే చోట రాజేష్‌తో కలిసి ఎవరినో వెతుకుతూ ఉంటాడు. మీనా ఫోన్ చేసినా తీయకుండా రాజేష్ తో , “పని అయ్యాకే మాట్లాడతా” అని చెబుతాడు.
ఇదిలా ఉండగా గుడిలో రవి, శ్రుతి ఉన్నారు. అక్కడ మౌనికను చూసి వారు సంతోషిస్తారు. “ఇంట్లో బామ్మ పుట్టినరోజు ఉంది, నువ్వూ రా” అని చెబుతారు. మౌనిక మొదట పని ఉందని చెప్పి నిరాకరిస్తుంది. కానీ రవి, శ్రుతి ఇద్దరూ “ఒక్కసారి రా, ఇది సర్‌ప్రైజ్ అవుతుంది బామ్మకు” అని బతిమిలాడుతారు. పక్కనే ఉన్న సంజు తల్లి కూడా “నువ్వు వెళ్లి రామ్మా, నేను పంపిస్తా” అని చెబుతుంది. మౌనిక కొద్దిగా సంకోచించి చివరికి అంగీకరిస్తుంది.
మరుసటి రోజు ఎపిసోడ్ ప్రోమో లో సుశీలమ్మ పుట్టినరోజు వేడుకలు ఇంట్లో ప్రారంభమవుతాయి. పూజ కార్యక్రమాలు జరుగుతాయి. అందరూ సంతోషంగా ఉంటారు. కానీ మీనా మెడలో బంగారు నగలు లేకపోవడంతో సుశీల “వేసుకుని రా” అని చెబుతుంది. మీనా నగలు వేసుకోవడానికి వెళ్తుంది. కానీ ఆ నగలు అసలుకి డూప్లికేట్‌ అవ్వడంతో మనోజ్, ప్రభావతి ఇద్దరూ “నానమ్మ గమనిస్తే నిజం బయటపడిపోతుంది” అని భయపడతారు.
ఇక్కడితో ఈరోజు ఎపిసోడ్ ముగుస్తుంది.
Source inspiration: Original story from “గుండె నిండా గుడి గంటలు” (JioHotstar). This is a personal written recap and interpretation.
