గుండె నిండా గుడి గంటలు నవంబర్ 25, 2025 మంగళవారం ఎపిసోడ్: మనోజ్ గుట్టు బయట పెట్టడంలో ఫెయిల్ అయిన బాలు …!!! సంజుని రెచ్చగొట్టిన నీలకంఠం …!!!
ఎపిసోడ్ ప్రారంభంలో కార్తీక పౌర్ణమి సందర్భంగా కుటుంబ సభ్యులంతా కలిసి ఉత్సాహంగా పూజా సామగ్రి, నైవేద్యం, కోనేటికి దీపాలు అన్నీ సర్దుకుని ఆలయానికి బయలుదేరుతారు. గుడికి చేరుకోగానే అందరు లోపలి వెళ్తారు. బాలు లోపలికి వస్తూ బయట నిలుచుని అడుక్కుంటున్న ఒక మనిషిని గమనిస్తాడు—అతను తన పాత తాగుబోతు స్నేహితుడు. “ఇలా అడుక్కోవడం ఏంట్రా?” అని బాలు అడగగా, అతడు తన బాధని చెప్తూ, “నా పెళ్లాం కార్తీక పౌర్ణమి అని గుడికి లాక్కుని తీసుకువచ్చింది. తాగక బుర్ర పనిచేయడం లేదు బాస్. ఒక 100 ఇవ్వవా” అని అడుగుతాడు. అప్పుడు బాలు ఓ ప్లాన్ వేస్తాడు. “నేను చెప్పినట్లు చేస్తే వంద కాదు వెయ్యి రూపాయలు ఇస్తా,” అని చెవిలో చెబుతాడు. డబ్బు ఇస్తా అనేసరికి ఆ తాగుబోతు కళ్లలో మెరుపుతో “ఏం చేయమంటే అది చేస్తా బాస్,” అని సిద్ధమవుతాడు. బాలు మనోజ్ గురించి ఆలోచిస్తూ ఇవాళ అందరి ముందు తన నోటి నుంచి నిజం బయటికి లాగాలని నిర్ణయించుకుంటాడు.
ఇక అందరు లోపలి వెళ్లి దండం పెట్టుకుని బయటికి వస్తుండగా దేవుడు పూనినట్లు నటిస్తూ, తూలుతూ ఊగుతూ, మంత్రోచ్చారణ చేస్తున్నట్టు నటిస్తూ ఆ బాలు ఫ్రెండ్ వాళ్ల వద్దకు వచ్చి మనోజ్‌ను పట్టుకుంటాడు. “నీ గురించి అంతా తెలుసు. నీలాంటి వారికీ ఈ గుడిలోకి ప్రవేశం లేదు,” అని బిగ్గరగా అరిచి, అందరి ముందూ మనోజ్ ని అవమానపరుస్తాడు. “ఇంట్లో వారిని మోసం చేశావ్… కన్న తండ్రిని మోసం చేశావ్… కట్టుకున్న దాన్నికూడా మోసం చేశావ్… ఈ మధ్య మరో కొత్త మోసం చేశావని నాకు తెలుసు,” అంటూ ఒక్కో మాటతో మనోజ్‌ను చితకబాదుతాడు. బాలు మీనాతో నెమ్మదిగా నేనే సెట్ చేశాను వాడిని అని చెప్తాడు. ఆలయంలో ఉన్నవాళ్లు అందరు అక్కడికి వచ్చి ఆగుతారు, సత్యం ఆసక్తిగా చూస్తాడు, కానీ ప్రభావతి మాత్రం తన రహస్యాలు బయటపడతాయనే భయంతో వణికిపోతోంది.
ప్రభావతి “ఎవరైనా ఆపండి. నా కొడుకుని చితకబాదేస్తున్నాడు!” అని అరుస్తుంది. కానీ సత్యం మాత్రం, “ఏదో చెప్తున్నాడు కదా. చూద్దాం ఏం చెప్తాడో” అంటూ ఆపేస్తాడు. మనోజ్ తట్టుకోలేక చివరికి తాను తప్పు చేసినట్టు ఒప్పుకుంటున్న క్షణంలోనే, ఆ తాగుబోతు భార్య అక్కడికి చేరి, “కాసేపు తాగొద్దు అని గుడికి తీసుకు వస్తే తాగడానికి డబ్బు కోసం డ్రామా చేస్తున్నావా? ఇంటికి రా!” అంటూ వాడిని లాగి తీసుకెళ్తుంది. ఒక్కసారిగా మనోజ్, ప్రభావతిలకు ప్రాణం తిరిగి వచ్చినట్లవుతుంది. శృతి అనుమానంతో, “ఆ తాగుబోతు మనోజ్‌ని ఎందుకు టార్గెట్ చేశాడు? మనోజ్ ఈ గుడి ముందే అడుక్కున్నాడా?” అని అడుగుతుంది. అప్పుడు మీనా నవ్వుతూ, “అవును నేను అప్పుడు మనోజ్ ని చూసింది ఈ గుడి ముందే” అని అంటుంది.
ఇక మరోవైపు మౌనిక కూడా గుడికి వెళ్లడానికి సిద్ధమవుతుంది. కానీ సంజు అడ్డంగా నిలబడి, “గుడికి వెళ్ళామా, దర్శనం అయ్యిందా… అన్నట్టు ఉండాలి. లేదంటే నా చేతలే చెప్తాయి” అని కఠినంగా హెచ్చరిస్తాడు. సంజు తల్లి వెంటనే జోక్యం చేసుకుని, “నువ్వు మౌనికను ఇబ్బంది పెట్టకు, ఆమెకి ఎలా నడుచుకోవాలో తెలుసు, తాను మంచి కుటుంబంలో పద్దతిగా పెరిగిన అమ్మాయి” అని అంటుంది. సంజు కోపంతో ఉన్నా, మౌనికను పంపిస్తాడు. మౌనిక వెళ్ళగానే సంజు తల్లి సంజుని మీ నాన్నలా తయారవుతున్నావు కొంచం మారు అని అంటుండగా నీలకంఠం ఎంట్రీ ఇచ్చి, భార్యని తిడతాడు. అలానే సంజుకి భార్యని అలా వదిలేయకూడదు అంటూ క్లాస్ తీసుకుంటాడు. సంజుతో “భార్యను ఎలా కంట్రోల్ పెట్టుకోవాలో నేర్పిస్తాను,” అంటూ అతను తన పెళ్లి జీవితంలోని డామినేషన్ గురించి ఓపెన్‌గా చెప్పేస్తాడు. సంజు కూడా తన గురించి అలానే గొప్పగా చెప్పుకుంటాడు.
అప్పుడు నీలకంఠం అసలు బాంబ్ పేలుస్తాడు. “నీ పెళ్లాం నీకు తెలియకుండా బయటకు ఎన్నోసార్లు వెళ్ళింది. గుడి అని చెప్పి పుట్టింటికి వెళ్లి తన కుటుంబాన్ని కలిసింది,” అంటూ అతనికి బామ్మ పుట్టినరోజు వేడుకల ఫోటోలు చూపిస్తాడు. సంజుకి ఒక్కసారిగా కోపం కట్టలు తెచ్చుకుంటుంది. బాగా ఆవేశంతో తన తల్లిని నిలదీయడంతో ముందు చెప్పకపోయినా చివరికి నిజం చెప్తుంది. సంజు కోపంతో “నా భార్య నన్ను మోసం చేసింది… దీనికి గుణపాఠం నేర్పిస్తాను” అంటూ వెంటనే గుడికి బయలుదేరతాడు.
ఇక గుడిలో మౌనిక అక్కడికి చేరగానే అనుకోకుండా తన కుటుంబ సభ్యులు కనిపిస్తారు. మౌనికని చూసి అందరు ఆనందిస్తారు. అందరూ కలిసి కోనేటిలో దీపాలు వదిలి పూజ చేస్తారు. అప్పుడు ప్రభావతి ఆనందంగా, “కార్తీక పౌర్ణమి నాడు ముత్తైదుకు వాయనం ఇవ్వడం సంప్రదాయం. ఎవరికి ఇద్దామా అనుకుంటున్నా. ఇంకా నీకే ఇస్తాము ఈసారి మా ఇంటి మహాలక్ష్మి నువ్వే,” అంటూ మౌనికకు వాయనం ఇవ్వడానికి సిద్ధమవుతుంది. మీనాను పిలిచి తాంబూలం తీసుకురమ్మని చెబుతుంది. మౌనికకి వాయనం ఇస్తుండగా సంజు ఆగ్రహంతో అక్కడికి చేరి, అందరి మధ్య వాయనాన్ని కిందపడేస్తాడు.
అందరు ఒక్క నిమిషం షాక్ అవుతారు. అందరి ముందే తిడుతూ, “ఇదేనా నువ్వు చేసే పని? గుడి పేరు చెప్పి నన్ను మోసం చేస్తోన్నావా?” అంటూ మౌనికను అవమానపరుస్తాడు. మౌనిక ఏడుస్తూ, “నాకు నిజంగా వాళ్ళు వస్తున్నారు అని తెలియదండి… ఇక్కడికి వచ్చిన తర్వాత కలిశారు,” అని చెబుతుంటే, సంజు వినడానికే సిద్ధంగా ఉండడు. ప్రభావతి, సత్యం చెప్పడానికి ప్రయత్నించినా కూడా వినకుండా “ఇది ఒక్కసారి కాదు… బామ్మ పుట్టినరోజు కూడా గుడికి అని అబద్దం చెప్పి మీ ఇంటికి వచ్చింది. చాలా సార్లు గుడికి అని బయటికి వెళ్తుంది. మీ ఇంటికే వస్తుందా ఇంకా ఎవరి ఇంటికైనా వెళ్తుందా” అంటూ మౌనిక పై నిందలు వేస్తాడు. చివరకు ఆవేశంతో మౌనికపై చేయి చేసుకోబోతుండగా బాలు ఆవేశంగా వచ్చి సంజుని కొడతాడు. కుటుంబ సభ్యులు అడ్డుకునే ప్రయత్నం చేసినప్పటికీ గుడిలో గొడవకు దారితీస్తుంది.
అంతటితో ఈ ఎపిసోడ్ ముగుస్తుంది.
Source inspiration: Original story from “గుండె నిండా గుడి గంటలు” (JioHotstar). This is a personal written recap and interpretation.
