ఇల్లు ఇల్లాలు పిల్లలు Nov 8th, 2025 శనివారం ఎపిసోడ్: నర్మదని దెప్పి పొడిచిన శ్రీవల్లి … అండగా నిలిచిన వేదవతి …. !!!
ఉద్యోగం పోయిందనే బాధతో నర్మద నెమ్మదిగా నడుస్తూ ఇంటి వైపు వస్తుంది. ఇంటి ముందు గుమ్మం దగ్గరే భద్రావతి, సేనాపతి ఆమె కోసం ఎదురు చూస్తుంటారు. నర్మదను దూరం నుంచి గమనించిన భద్రావతి వ్యంగ్యంగా మాట్లాడుతూ, “ఇదిగో వస్తుంది అవినీతి అధికారి! నిన్నే మన ఆస్తి సీజ్ చేసినప్పుడు ఎంత అహంకారంగా నడిచిందో చూశాం. ఇప్పుడు తలదించుకుని వస్తోంది. లంచం తీసుకుంటూ పట్టుబడిన అధికారికి స్వాగతం సుస్వాగతం!” అని అంటుంది.
సేనాపతి కూడా దానికి వత్తాసు పలుకుతూ, “ఇవ్వాళ వరకు ఈమెను అందరూ లేడీ సింగం అని అనుకున్నారు, కానీ ఇప్పుడు తెలిసింది — అవినీతి తిమింగలం అని! పక్కవారి డబ్బు మీద కన్నేసే అలవాటు రామరాజు కుటుంబానికి సొంతం. మామయ్య గారే నేర్పి ఉంటారు లంచం ఎలా తీసుకోవాలో” అని వ్యంగ్యంగా చెబుతాడు. భద్రావతి నవ్వుతూ, “ఇలాంటి అవమానాల తర్వాత ఎవరికైనా తల ఎత్తి తిరగడానికైనా సిగ్గేస్తుంది, కానీ ఇది గట్టిగుండెతో ఇంటికి వస్తుంది అంటే గట్టి పిండి” అని అంటుంది.
వాళ్లిద్దరూ ఎన్ని మాటలు చెప్పినా నర్మద ఒక్క మాటా అనకుండా నిశ్శబ్దంగా లోపలికి నడుస్తుంది. ఆమె రాక కోసం ఇంట్లో వాళ్లంతా ఎదురుచూస్తుంటారు. ఇంట్లోకి నర్మద అడుగుపెట్టగానే సాగర్ ఆమె దగ్గరికి వెళ్లి, “ఏమైంది నర్మదా? ఈ వార్త టీవీల్లో వచ్చాక మేమంతా కంగారుపడుతున్నాం. నువ్వు లంచం తీసుకున్నావంటున్నారు — అసలు విషయం ఏమిటి?” అని అడుగుతాడు. నర్మద ఏం మాట్లాడకుండా నీళ్లు తాగి కూర్చుంటుంది.
ప్రేమ, ధీరజ్ కూడా దగ్గరికి వచ్చి “ఏమైందీ అక్కా? నువ్వు ఏం తప్పు చేయలేదు కదా?” అని అడుగుతారు. కానీ నర్మద ఒక్క మాట కూడా మాట్లాడదు. ఈ సమయానికి నర్మదపై ఎప్పటి నుంచో అసహనం పెంచుకున్న శ్రీ వల్లి ఆ అవకాశాన్ని వదలదు. “నర్మద మౌనంగా ఉంది అంటే తప్పు చేసింది కదా! లంచం తీసుకోకపోతే ఇలా నిశ్శబ్దంగా కూర్చుంటుందా?” అని అంటుంది.
ఆమె మాటలతో ప్రేమ కోపంగా “తెలియకుండా మాట్లాడకు అక్కా” అని అంటుంది. కానీ శ్రీ వల్లి ఆగదు. “పెళ్లైన తర్వాత భర్త, అత్తమామలకు సేవ చేయడమే కోడలి కర్తవ్యం. ఉద్యోగం చేయాలంటే నిజాయితీగా చేయాలి. కానీ నువ్వు లంచం తీసుకోవడం తప్పు. అత్తారింటి గౌరవం పోయింది” అని తీవ్రంగా విమర్శిస్తుంది.
ఆ వెంటనే శ్రీ వల్లి తల్లి భాగ్యం కూడా ఆ విషయాన్ని పట్టుకుని, “డబ్బు నేడు ఉంటుంది రేపు ఉండదు కానీ నిజాయితీ శాశ్వతం. మా ఆస్తి మొత్తం పోయినా మేము తప్పు చేయలేదు. నిజాయితీగా ఉన్నాం” అని చెప్పడం మొదలుపెడుతుంది. ఆమె మాటలకు ఆమె భర్త కూడా మద్దతు ఇస్తాడు. ప్రేమ మాత్రం చిరాకు పడి, “మీ నిజాయితీ గురించి నేను చెప్పాలా?” అని అంటుంది.
కానీ శ్రీ వల్లి ఆగకుండా మాట్లాడుతూనే ఉంటుంది. “నువ్వు లంచం తీసుకున్నావు. నీ వల్ల మామయ్య గారి పరువు పోయింది. ఆయన పరువుకు ప్రాణం ఇచ్చే మనిషి. ఊర్లో ఎవరైనా అడిగితే ఆయన ఏం అవుతారు? ఆ రోజు దసరా పండగ రోజున కలెక్టర్ గారు నీ గురించి మెచ్చుకున్నారు అని ఆయనా ఎంతో గర్వించారు. ఇపుడు ఇదేనా ఆయన గర్వించాల్సిన కారణం?” అని ప్రశ్నిస్తుంది.
“మా ఇంటి దీపం అని అనుకున్నాం, కానీ నువ్వు మాత్రం ఆ దీపం ఆర్పేశావు. మంచి కోడలు అన్న పేరుతో ఇంటి పరువు మట్టికరిపించావు. ఉద్యోగం చేస్తా అని బయల్దేరి వెళ్లి ఇంటి గౌరవాన్ని నేలమట్టం చేసావు” అని తీవ్రంగా అంటుంది.
వాళ్లందరి మాటలు విన్న నర్మద చాలా ప్రశాంతంగా “ఇప్పుడు హ్యాపీనా? నాకు నిద్ర వస్తోంది, నేను పడుకుంటాను” అని చెబుతుంది. ఆ సమాధానం విని అందరూ ఆశ్చర్యపోతారు. శ్రీ వల్లి తన తల్లిదండ్రులు దగ్గర మండిపడుతూ “ఉద్యోగం పోయిందని బాధపడుతుందనుకున్నాం, కానీ ఏ మాత్రం పశ్చాత్తాపం లేదు. అదే గర్వం, అదే ధైర్యం” అని అంటుంది. “పులి దెబ్బ తిన్న పులి లానే ఉంటుంది. ధైర్యం కోల్పోదు” అని అంటాడు ఇడ్లీ.
ఈ మాటల తరువాత నర్మద ఒంటరిగా కూర్చొని ఆలోచిస్తూ కన్నీళ్లు పెట్టుకుంటుంది. ఆమె మనసులో భద్రావతి, శ్రీ వల్లి మాటలు తిరుగుతూనే ఉంటాయి. ఇంతలో అత్త వేదవతి ఆమె దగ్గరికి వస్తుంది. కూర్చుని, “నర్మద, ఎందుకిలా చేశావ్?” అని ప్రశ్నిస్తుంది.
నర్మద మనసులో “అంటే అత్తయ్య కూడా నేను లంచం తీసుకున్నానని నమ్ముతున్నారా?” అని ఆలోచిస్తుంది. కానీ బయటకి ఏమీ మాట్లాడదు. వేదవతి ఆమె సమాధానం రాకపోయినా మాట్లాడుతూనే ఉంటుంది. “నా కోడలు ఏంటో నాకు తెలుసు. ప్రాణం పోయినా తప్పు చేయదు. పరాయి డబ్బుకి ఆశపడదు. కానీ నీ మీద ఇంత పెద్ద నింద వేసారు, అయినా నువ్వు మౌనంగా ఉన్నావ్ — ఎందుకు? మా కోసమే కదా?” అని అడుగుతుంది.
వేదవతి భావోద్వేగంగా చెబుతూ, “నిన్ను లంచం కేసులో ఇరికించింది మా పుట్టింటి వాళ్లే కదా? వాళ్ల పరువు పోతుందేమో అని నువ్వు మౌనంగా ఉన్నావ్. మా కోసమే ఈ అవమానాన్ని భరిస్తున్నావ్ కదా?” అని అంటుంది.
నర్మద కన్నీళ్లతో నిశ్శబ్దంగా ఉంటుంది. వెళ్ళిపోవడానికి లేస్తే వేదవతి ఆమెను పట్టుకుని కౌగిలించుకుంటుంది. “నువ్వు ఎంత గొప్ప కోడలివో నాకు తెలుసు. మేం బాధపడకూడదని నువ్వు ఈ నింద భరిస్తున్నావ్. కానీ ఇక మౌనంగా ఉండకూడదు. నిన్ను ఇరికించిన వాళ్లను బయటకు లాగు. నా కోడలు చేయని తప్పుకి దోషిగా నిలబడకూడదు. నీ నిజాయితీ నిరూపించు” అని చెబుతుంది.
వేదవతి మాటలు విన్న నర్మద కళ్లలో ధైర్యం తిరిగి వస్తుంది. “అత్తయ్యా, నేను నా వ్యక్తిత్వాన్ని ఎప్పుడూ చంపుకోలేదు. నా నిజాయితీ మీద నింద వస్తే ఊరుకోలేను. కానీ మీరు, ప్రేమ నా మనసులో ఉన్నందుకే మౌనంగా ఉన్నాను. మీరు నన్ను దూరం పెట్టినా, చెల్లి లాంటి ప్రేమ నా పక్కన లేకపోయినా నేను తట్టుకోలేను. అందుకే నింద భరిస్తున్నాను” అని చెబుతుంది.
వేదవతి ఆత్మవిశ్వాసంతో “ఇప్పుడు నువ్వు మళ్లీ నర్మదలా నిలబడు. నిన్ను ఇరికించిన వాళ్లను బయటపెట్టు. నువ్వు చేయని తప్పుకి నిందను మోసే అమ్మాయివి కాదని అందరికీ చూపించు” అని ప్రోత్సహిస్తుంది.
ఈ సమయంలో ప్రేమ అక్కడికి వచ్చి, “అక్కా, నువ్వు ఇలా మౌనంగా ఉండడం మాకు కూడా బాధే. నువ్వు చేయని తప్పుకి నింద మోస్తే మేము సైలెంట్‌గా ఉండం. నీ నిజాయితీకి మచ్చ రాకుండా చూసుకుంటాం” అని చెబుతుంది.
మరోవైపు ధీరజ్ ఆలోచిస్తూ, ప్రేమ పుట్టింటి వాళ్లే ఈ కుట్ర వెనుక ఉన్నారని అర్థం చేసుకుంటాడు. కోపంతో ఉండగా ప్రేమ వచ్చి మాట్లాడుతుంది. కానీ ఆమె మాటలతో అతనికి మరింత కోపం వస్తుంది. దానితో ధీరజ్ ప్రేమతో గొడవ పడటంతో చివరికి ఆమె పుట్టింటికి వెళ్లిపోతుంది. ఇది అంతా శ్రీవల్లి తల్లిదండ్రులు చాటుగా చూస్తూ ఉంటారు.
ఇక్కడితో ఈరోజు ఎపిసోడ్ ముగుస్తుంది.
Source inspiration: Original story from “ఇల్లు ఇల్లాలు పిల్లలు” (JioHotstar). This is a personal written recap and interpretation.
