ఇల్లు ఇల్లాలు పిల్లలు Nov 11th, 2025 మంగళవారం ఎపిసోడ్: రివర్స్ అయిన భద్రావతి ప్లాన్ … కన్న తండ్రిని అరెస్ట్ చేయించిన ప్రేమ … !!!!
ఎపిసోడ్ ప్రారంభంలో నర్మదపై ఉన్న లంచం ఆరోపణల కేసులో ఆమెపై ఉన్న అన్ని ఆరోపణలు అబద్ధమని నిరూపణ అవుతుంది. నర్మద నిర్దోషిగా బయటపడుతుంది. ఈ వార్త విన్న వెంటనే వేదవతి చాలా ఆనందంతో ఉప్పొంగిపోతుంది. నా కోడలు నిజం నిరూపించుకుని కడిగిన ముత్యంలా ఇంటికి తిరిగి వస్తుంది అని సంబరపడుతుంది. ప్రేమ కూడా వల్లిని ఉద్దేశించి నర్మద అక్క గురించి తప్పుగా మాట్లాడిన వాళ్ళకి చెప్పుతో కొట్టినట్టు అయింది అని అంటుంది. ఇంట్లో ఉన్నవాళ్లందరూ సంతోషపడతారు. కానీ అక్కడే ఉన్న శ్రీవల్లి మాత్రం షాక్‌లో పడుతుంది. నర్మద జైలుకి పోతుందని ఊహించిన ఆమెకు షాక్ కొట్టినట్టు అవుతుంది.
ఇదిలా ఉండగా భద్రావతి, సేనాపతి ఇద్దరూ ఒకరినొకరు చూసుకుంటారు. తమ చేతిలో ఉన్న సాక్ష్యాలు బలమైనవే అని నమ్మిన వీళ్ళిద్దరూ “ఇంత కచ్చితమైన ప్రణాళిక వేసిన తర్వాత కూడా ఆమె ఎలా బయటపడిందో” అని అనుమానంగా ఫీలవుతారు. మరోవైపు భాగ్యం, ఇడ్లీబాబాయ్ కూడా టీవీలో ఆ వార్త చూస్తూ చర్చిస్తారు. భాగ్యం “ఇడ్లీబాబూ, ఈసారి నర్మద తప్పించుకోదని అనుకున్నా, కానీ మళ్ళీ బయటపడిపోయింది” అని అంటుంది. ఇడ్లీబాబాయ్ నవ్వుతూ “నేను చెప్పానుగా, ఆ చిరుతపులి ఎవరి వల్లో పడదు అని” అంటాడు. దాంతో భాగ్యం కాస్త కోపంగా “ఏంట్రా చిరుతపులీ అంటావా” అని కొడుతోంది.
ఇంతలో వార్తల్లో మరో ముఖ్యమైన విషయం వస్తుంది — నర్మదని లంచం కేసులో ఇరికించిన వారిపై పోలీసులు చర్య తీసుకుంటున్నారని. ఈ వార్త విన్న సేనాపతి కంగారు పడిపోతాడు. భద్రావతి దగ్గరకి వెళ్లి “అక్కా, మనం వేసిన కుట్ర మన మీదే తిరిగొచ్చింది. ఇప్పుడు పోలీసులు మనమీదకే వస్తున్నారు” అని చెబుతాడు. భద్రావతి కూడా అచ్చం అలాగే ఆందోళన చెందుతుంది.
ఇదంతా జరుగుతున్న సమయంలో భాగ్యం, ఇడ్లీబాబాయ్ ఇంట్లోకి పరుగెత్తుకుంటూ వచ్చి వేదవతికి చెబుతారు — “పోలీసులు మీ పుట్టింట్లోకి వెళ్ళారు.” అందరూ ఆశ్చర్యంగా ఒకరినొకరు చూస్తారు. అప్పుడే రామరాజు బయట ఊరి నుండి ఇంటికి వస్తాడు. వేదవతి అతనికి మొత్తం కథ చెబుతుంది. “మా పుట్టింటి వాళ్లు నర్మదని ఇరికించాలనుకున్నారు, కానీ చివరికి ఆమె ఆధారాలు చూపించి వాళ్ల కుట్రని తిప్పికొట్టింది” అని వివరిస్తుంది.
తర్వాత సీన్ భద్రావతి ఇంట్లోకి మారుతుంది. పోలీసులు లోపలికి వచ్చి సేనాపతిని అరెస్ట్ చేయాలని చెబుతారు. భద్రావతి కోపంగా “నా తమ్ముడిని అరెస్ట్ చేయడానికి మీరు ఎవరు? మీకు అంత ధైర్యం వచ్చిందా?” అని ప్రశ్నిస్తుంది. పోలీసులు ప్రశాంతంగా “అవన్నీ స్టేషన్‌లో మాట్లాడుకుందాం, ఇప్పుడే మాతో రావాలి” అని చెబుతారు. కానీ సేనాపతి వారిని పట్టించుకోకుండా గట్టిగా మాట్లాడతాడు. దాంతో పోలీసులు బలవంతంగా అతన్ని లాక్కెళ్తారు.
అప్పుడే నర్మద అక్కడికి వస్తుంది. ఆమె నేరుగా సేనాపతి దగ్గరకు వెళ్తుంది. “నేను ఆదమరిచి ఉన్నపుడు నా మీద కుట్ర చేసి నా పని అయిపోయింది అనుకున్నారు కదా. కానీ ఒకటి నేను కాసేపు ఆదమరిచి ఉన్నాను ఏమో కానీ అసమర్థురాలిని కాదు. మీకు ప్రభుత్వ భూములను కబ్జా చేసేంత తెలివి ఉంటే, కష్టపడి పరీక్షలు రాసి ప్రభుత్వ ఉద్యోగం తెచ్చుకున్న నాకు ఎన్ని తెలివి ఉంటాయో ఊహించుకోండి. మీరు వేసిన ప్లాన్‌ని నేనే తిప్పికొట్టాను. మీరు ఈ కుట్ర చేయడానికి ఉపయోగించిన డబ్బు ట్రాన్సాక్షన్ డిటైల్స్ మీ ఫోన్‌లో ఉండేవి. అవే ఇప్పుడు నా ఆయుధం అయ్యాయి. అదే మీ అరెస్ట్‌కి కారణమయ్యాయి” అని చెబుతుంది.
సేనాపతి తలవంచి నిలబడిపోతాడు. తన ఫోన్‌లోని వివరాలు నర్మదకి ఎలా తెలిసాయో ఆలోచిస్తూ ఆశ్చర్యపోతాడు. ఈ సమయంలో ఫ్లాష్‌బ్యాక్ వస్తుంది — నర్మద రాత్రి ప్రేమను సంప్రదించి, ప్రేమతో నీ సహాయం కావాలని అడుగుతుంది. ఆ ప్లాన్ లో భాగంగా ప్రేమ ధీరజ్‌తో గొడవపడి పుట్టింటికి వెళ్లిన సమయంలో, తన తండ్రి ఫోన్‌లో ఉన్న ఆ ఫైనాన్షియల్ డేటాను తీసుకుని నర్మదకి పంపుతుంది. ఆ ఆధారాలే ఈ కేసు నుంచి నర్మద బయటపడటానికి ప్రధాన కారణమయ్యాయి.
ఇక రామరాజు ముందుకు వచ్చి సేనాపతిని గట్టిగా నిలదీస్తాడు. “ప్రభుత్వ స్థలాన్ని కబ్జా చేయడమే కాదు, నా కోడల్ని జీవితాంతం జైలుకి పంపాలని చూశావ్. నా భార్య అయితే మీరు ఏం చేసినా వదిలేసేది, కానీ నా కోడళ్ళు మాత్రం అలా కాదు. వాళ్ళు అన్యాయాన్ని సహించరు. ఇకనైనా నీ తప్పులు సరిదిద్దుకో” అని హెచ్చరిస్తాడు.
అప్పుడు సేనాపతి ప్రేమవైపు తిరిగి కోపంగా చేతులు జోడించి “తండ్రికి మంచి మర్యాద చేసావు” అని అంటాడు. దాంతో పోలీసులు అతన్ని తీసుకెళ్తారు. భద్రావతి తన తమ్ముడిని తీసుకెళ్తుంటే కోపంతో రగిలిపోతుంది. ఆమె ముఖంలో ప్రతీకార భావం స్పష్టంగా కనిపిస్తుంది.
తర్వాత నర్మద భాగ్యం, శ్రీవల్లిల దగ్గరకు వెళ్తుంది. వారిని చూసి వ్యంగ్యంగా “హలో జంతర్ మంతర్ ఫ్యామిలీ, ఎలా ఉన్నారు? ఆడపిల్లకి జాబ్ ఎందుకు అన్నారుగా, ఇప్పుడు అర్థమైందా? ఎదుటివాళ్లు ఏమైనా మోసం చేస్తే తిప్పి కొట్టడానికి జాబ్ చేయాలి పిన్ని. మీ మోసాలు కూడా బయట పెడతాను. ఇక మీరే నా తర్వాత టార్గెట్” అని అంటుంది.
తర్వాత శ్రీవల్లిని చూస్తూ “వల్లక్కాయ్, నీ మీద నాకు భయంకరంగా డౌట్ ఉంది. ఏదో విషయంలో నువ్వు ఏదో చేస్తున్నావు. కనిపెట్టేస్తాను. ఇక మీదట ఓ కన్ను నీ మీద కూడా ఉంటుంది” అని హెచ్చరిస్తుంది.
రాత్రికి శ్రీవల్లి వణికిపోతుంది. ఆమె ఏడుస్తూ గదిలోకి కూర్చుని దుప్పటి కప్పుకుంటుంది. ఆ సీన్ చూసి భాగ్యం వెనక్కి వెళ్ళి పిలవగానే శ్రీవల్లి ఏడుస్తూ “నేనేం చేయలేదు, నాకు ఏమీ తెలియదు, మొత్తం మా అమ్మే చేసింది” అని చెబుతుంది.
ఆ మాట విన్న భాగ్యం ఆశ్చర్యపోతుంది ఏమైంది అని అడుగుతుంది. శ్రీవల్లి మనసులో నర్మదను ఉద్యోగం లేకుండా చేయాలని భాగ్యం చెప్పిన కండీషన్ గుర్తుకు వస్తుంది. “ఇప్పుడు నర్మద మనల్ని కూడా అరెస్ట్ చేయిస్తే?” అని భయపడుతుంది. కానీ భాగ్యం “అది ఏమీ కాదు. మనం జాగ్రత్తగా ఉంటే సరిపోతుంది” అని చెబుతుంది. కానీ వల్లి భయంతో “మన గురించి తెలిసినపుడు కూడా నా కాపురం పాడు అవుతుంది అని మన గురించి మామయ్యతో చెప్పలేదు. అలాంటిది ఇపుడు తన ఉద్యోగం పోగొట్టడానికి మనం కూడా కారణం అని తెలిస్తే ఖచ్చితంగా జైలు కి పంపుతుంది” అని వణుకుతూ “తన గురించి తెలిసి కూడా తనతో పెట్టుకుని నా జీవితం నేనే పాడు చేసుకున్నా దేవుడా” అని విలపిస్తుంది.
అంతటితో ఈ రోజు ఎపిసోడ్ ముగుస్తుంది.
Source inspiration: Original story from “ఇల్లు ఇల్లాలు పిల్లలు” (JioHotstar). This is a personal written recap and interpretation.
