ఇల్లు ఇల్లాలు పిల్లలు Nov 12th, 2025 బుధవారం ఎపిసోడ్: ప్రేమని ఆకాశానికి ఎత్తిన నర్మద …. !!! అర్ధం చేసుకోలేని ధీరజ్ … !!! వల్లిని పరుగులు పెట్టించిన ప్రేమ … !!!
ప్రేమ తన తండ్రి సేనాపతి అరెస్టవడంపై బాధపడుతూ ఉంటుంది. “నాన్నను జైలుకి పంపించినది నేనే” అనే బాధ ఆమె మనసును కుదిపేస్తుంది. అప్పుడు నర్మద ఆమె దగ్గరకు వస్తుంది. ప్రేమతో మాట్లాడుతూ “థ్యాంక్స్ ప్రేమా, నువ్వు చేసిన సహాయం వల్లే నేను జైలుకి వెళ్లకుండా బయట పడ్డాను. నా జీవితాంతం నీకు రుణపడి ఉంటాను” అని చెబుతుంది.
ప్రేమ ఆశ్చర్యంగా “ఇంత చిన్న సహాయం చేసినందుకు థ్యాంక్స్ ఎందుకక్కా?” అని అడుగుతుంది. దానికి నర్మద “ఇది చిన్న విషయం కాదు ప్రేమా. నీ స్థానంలో ఇంకెవరైనా ఉంటే తమ తండ్రిని కాపాడుకునే ప్రయత్నం చేస్తారు. కానీ నువ్వు మాత్రం రక్త సంబంధాన్ని పక్కన పెట్టి, ఎనిమిది నెలల పరిచయం ఉన్న నాకోసం నీ తండ్రి జైలుకి వెళ్ళినా సరే అనుకున్నావ్. ఇది చాలా గొప్ప విషయం” అని చెబుతుంది.
ప్రేమ కళ్ళలో నీళ్లతో, “నా వల్ల నాన్న జైలుకి వెళ్లడం బాధాకరమే అక్కా. కానీ నేను అలా చేయకపోతే, నువ్వు చేయని నేరానికి బలి అయ్యేదానివి. రామరాజుగారి కోడలు అవినీతి కేసులో అరెస్టయితే, మామయ్యగారి పరువు పోయేది. నువ్వు జీవితాంతం ‘మామయ్య పరువు తీసిన కోడలు’గా మిగిలిపోయేదానివి. అలా అయితే నీకు, సాగర్ బావకి మధ్య కూడా దూరం రావచ్చు. ఇవన్నీ తెలిసి నేను మా నాన్నకి సపోర్ట్ చేస్తే, అది అత్తింటి మీద ద్రోహం చేసినట్టే అయ్యేది కదా అక్కా” అని చెబుతుంది.
దానికి నర్మద “కానీ మీ ఇంట్లో వాళ్ళకి నువ్వు ఇంకా దూరం అవుతున్నావ్ కదా ” అని బాధగా అంటుంది. ప్రేమ మళ్లీ ఓపికగా చెబుతుంది – “మా వాళ్ల దృష్టిలో నేను ముందే తప్పు చేసిన కూతుర్ని. చెప్పకుండా పెళ్లి చేసుకున్నందుకు ఇప్పటికే నాపై కోపం ఉంది. కానీ ఇప్పుడు అది ద్వేషంగా మారుతుంది, అది నేను భరించగలను. అయినా సరే, నేను చేసినది సరైనదే అని అనుకుంటున్నాను.”
వీరిద్దరి మాటలన్నీ వేదవతి విని నిశ్శబ్దంగా ఆలోచిస్తుంది. “నువ్వు కూడా నా లాంటిదానివే ప్రేమ. ఎంత గొప్పగా ఆలోచిస్తున్నావు. ఈ మేనత్త దృష్టిలో నువ్వు ఆకాశం అంత ఎత్తుకి ఎదిగిపోయావ్” అని మనసులో అనుకుంటుంది.
మరోవైపు, ధీరజ్ మాత్రం ప్రేమ గురించి ఆలోచిస్తూ ఉంటాడు. ప్రేమ తిరిగి ఇంటికి రాగానే, ఆమెను చూసి కఠినంగా మాట్లాడతాడు. “నీది కూడా మీ నాన్న మెంటాలిటీనే. చూశావుగా, ఆయన చేసిన తప్పుకు సిగ్గుపడకుండా మా వదినకి వార్నింగ్ ఇచ్చాడు. నువ్వూ అలాగే ఉన్నావ్” అని అంటాడు. ప్రేమ సైలెంట్‌గా “ఆ విషయాన్ని వదిలేయ్” అని చెబుతుంది. కానీ ధీరజ్ ఆగకుండా, “మీ వాళ్లకి సిగ్గులేదా? మా మీద కుట్రలు చేయడానికే ఉందా మీ కుటుంబం!” అని అంటాడు.
ఆ మాటలతో ప్రేమ చిర్రెత్తిపోతుంది. “ఇంకా ఏమైనా చెబుతావా? మళ్లీ ఇలా మాట్లాడితే నేను నా పుట్టింటికి వెళ్లిపోతా” అని చెబుతుంది. ధీరజ్ “సరే, పద” అంటూ ఆమె చేయి పట్టుకుని బయటకు తీసుకెళ్తాడు. ప్రేమ ఎంత చెప్పినా వినకపోవడంతో ఆమెను గేటు దగ్గరకు తీసుకెళ్లి తోసేస్తాడు.
“ఇప్పుడు ఎందుకు వెళ్లడం లేదు? మొన్న ఏదో ఆవేశంగా వెళ్లావుగా… అప్పుడు ఏం చేయడానికి వెళ్లావో చెప్పు” అని ప్రశ్నిస్తాడు. ప్రేమ “ఏం లేదు” అని చెబుతుంది. కానీ ధీరజ్ పట్టుబట్టి “మొన్న ఏం చేశావో చెప్పు, లేకపోతే ఇప్పుడే వెళ్లిపో” అని హెచ్చరిస్తాడు.
ప్రేమ కాసేపు ఆగి, ధైర్యంగా “మన రెండు కుటుంబాలు కలిసిన తర్వాతే నేను ఆ గీత దాటుతాను. అంతవరకూ మా ఇంటి గుమ్మం తొక్కను” అని చెబుతుంది. ధీరజ్ వెంటనే “అది ఈ జన్మలో జరగదు” అని అంటాడు. ప్రేమ మాత్రం నిశ్చయంగా “మనం చిన్నపుడు నుండి తిట్టుకుంటూ కొట్టుకుంటూ పెరిగాము. ఎపుడు అయినా అనుకున్నామా పెళ్లి చేసుకుంటాము అని. అలానే ఇది కూడా అవుతుంది. నేను బలంగా కోరుకుంటున్నాను, అది కచ్చితంగా జరుగుతుంది” అని చెబుతుంది.
ధీరజ్ విసుగ్గా “నువ్వు ఈ కుటుంబాలను కలపడానికి పిచ్చి పనులు చేయకు. దాంతో మరో పాతికేళ్లు గొడవలు పడేలా చేయకు” అని చెబుతాడు. ప్రేమ నిశ్శబ్దంగా నిలబడిపోతుంది. చివరికి ధీరజ్ కోపంగా గేట్లు మూసేస్తాడు. ప్రేమ గేటు బయట నిలబడి నిశ్శబ్దంగా ఉంటుంది.
ఇంతలో, భద్రావతి మరియు విశ్వ లాయర్ దగ్గరకు వెళ్తారు. సేనాపతికి బెయిల్ రావాలనే ఉద్దేశ్యంతో డబ్బు ఇస్తారు. లాయర్ మాత్రం “నర్మదను ఇరికించమని ఎవరూ ఫోన్ చేయలేదు. కేవలం డబ్బు ట్రాన్స్‌ఫర్ విషయమే ఉంది. అందులో అంతా బలమైన సాక్ష్యం ఎం లేదు. ఆ డబ్బు పంపడం అనేదానికి పలు కారణాలు ఉంటాయి కాబట్టి కచ్చితంగా రేపటికి బెయిల్ వస్తుంది” అని చెప్పడంతో వాళ్ళు కూడా కొంచం శాంతపడతారు.
కానీ బయటకు రాగానే భద్రావతి కోపంతో రగిలిపోతుంది. “మన ఇంట్లో పనోడిగా పని చేసిన రామరాజు వల్ల మనం పడిన అవమానం ఇక మళ్లీ జరగకూడదు. మనం అనుభవించిన బాధ అతడు అనుభవించాలి” అని చెబుతుంది. విశ్వని చూసి “ఇది నీ చేతిలో ఉంది. రామరాజు చిన్న కూతురిని నువ్వు పెళ్లి చేసుకో. అదే సరైన ప్రతీకారం” అని ఆదేశిస్తుంది. విశ్వ అంగీకరిస్తూ “అమూల్య ఇప్పటికే నా ట్రాప్‌లో పడిపోయింది. నేను ప్రపోజ్ చేస్తే వాళ్ళ నాన్నకు చెప్పి గొడవ చేయలేదు అంటే నా గురించి ఆలోచించడం మొదలుపెట్టినట్టే ఇక మన లైన్ లోకి వచ్చినట్టే” అని చెబుతాడు.
ఇక ప్రేమ మరోవైపు వల్లీని దగ్గరికి వెళ్తుంది. అప్పటికే వల్లి ప్రేమ వస్తుంది ఏమో అని భయపడుతూ ఉంటుంది. చేతిలో కత్తి పట్టుకుని వస్తుంది. వల్లీ భయంతో వణికిపోతోంది. ప్రేమ కోపంగా “నర్మద అక్కను అవినీతి కేసులో ఇరికించడానికి నీవు కూడా తోడయ్యావని నాకు తెలుసు” అని అంటుంది. వల్లీ భయంతో “నాకేం తెలియదు, అంతా మా అమ్మే చేసింది” అని చెబుతుంది. ప్రేమ “అబద్దం చెప్పకు. మీ అమ్మతో పాటు నువ్వు కూడా ఉన్నావు అని నాకు తెలుసు. నిన్ను చంపేస్తా” అని దూసుకుపోతుంది. వల్లీ ఆ మాట విని పరుగులు పెడుతుంది.”
ఇంతటితో ఆ రోజు ఎపిసోడ్ ముగుస్తుంది.
Source inspiration: Original story from “ఇల్లు ఇల్లాలు పిల్లలు” (JioHotstar). This is a personal written recap and interpretation.
