ఇల్లు ఇల్లాలు పిల్లలు Nov 13th, 2025 గురువారం ఎపిసోడ్: వేదవతి దగ్గర పచ్చళ్ళు అంటూ 25 లక్షలకి టెండర్ పెట్టిన భాగ్యం, ఇడ్లీ బాబాయ్…!!! శ్రీవల్లిని బ్లాక్ మెయిల్ చేస్తున్న విశ్వ … !!!
ఎపిసోడ్ ప్రారంభంలో వల్లీకి ఒక భయంకరమైన కల వస్తుంది. ప్రేమ తనను కత్తితో తరుముతూ చంపేందుకు వస్తోందని ఆ కలలో కనిపిస్తుంది. ఆమె భయంతో ఒక్కసారిగా మేల్కొని చెమటోడుస్తుంది. అప్పుడు నిజంగానే ప్రేమ బయట నుంచి ఆమె పేరు పిలుస్తుంది. ఆ స్వరం విన్న వల్లీ భయంతో వణికిపోతుంది.
ప్రేమ దగ్గరకు వెళ్లగానే వల్లీ “నాకేం తెలీదు… నాకు ఏం తెలియదు” అంటూ భయంతో వణుకుతూ మాట్లాడుతుంది. ఆమె ప్రవర్తన చూసిన ప్రేమ ఆశ్చర్యపోతుంది. “ఏమైంది వల్లీ అక్కాయి? ఇంత భయంగా ఎందుకు ఉన్నావ్? చలి జ్వరం వచ్చినట్టుగా వణుకుతావ్ ఎందుకు? నీ చూపే ఏదో తప్పు చేశావని చెబుతోంది, నిజం ఏంటి?” అని అడుగుతుంది.
వల్లీ మాత్రం “ఈ లోకంలోనే నన్ను మించి మంచివాళ్లు ఎవరూ ఉండరు” అంటూ తప్పించుకోవడానికి ప్రయత్నిస్తుంది. ప్రేమకు వల్లీ ప్రవర్తనలో ఏదో అనుమానం కలుగుతుంది. “ఇందులో ఏదో తేడా ఉంది, ఇది తెలుసుకోవాలి” అని మనసులో అనుకుంటుంది.
ఇక మరోవైపు, ధీరజ్ తన క్యాబ్‌లో ఓ వృద్ధుడిని ఎక్కించుకుంటాడు. ఆ పెద్దాయన సీట్లో కూర్చుని కారులో ఉన్న డైరీని తిప్పి చూస్తాడు. అందులో “షూ కొనాలి, పోలీస్ ట్రైనింగ్‌ ఇప్పించాలి, హైదరాబాద్ అకాడమీలో చేర్పించాలి” అని రాసి ఉంటుంది. అది చూసిన పెద్దాయన “ఇంతా బాధ్యతలు మోస్తున్నావు, కష్టంగా ఉందేమో?” అని అంటాడు.
దాంతో ధీరజ్ నవ్వుతూ “నా జీవితానికి గ్రహాలు అంతా మీటింగ్ పెట్టి నన్ను బాగానే ముంచేశాయి సార్‌. పెళ్లి అయిపోయింది” అని చెబుతాడు. పెద్దాయన “అయితే నువ్వు క్యాబ్ నడిపి డబ్బు సంపాదిస్తున్నావు కదా, మీ నాన్న ఏం పట్టించుకోవడం లేదా?” అని అడుగుతాడు.
ధీరజ్ సమాధానమిస్తూ “మా నాన్న చాలా పట్టించుకుంటారు సార్‌. జాబ్ నుంచి జీవితం వరకు ఆయన చెప్పినట్టే ఉండాలి. పిల్లల మీద ఆయన ప్రేమ అంతగా ఉంది కాబట్టి ఇంకా బొమ్మరిల్లు సినిమా నాన్నలా మా చేయి వదలడంలేదేమో” అని చెబుతాడు. పెద్దాయన “ఓసారి మీ నాన్నతో మాట్లాడాలి అనిపిస్తోంది” అని చెబుతాడు. దాంతో ధీరజ్ నవ్వుతూ “మా హిట్లర్ నాన్నతో మాట్లాడితే మీరు మారిపోతారు సార్‌, అంత కఠినంగా ఉంటారు” అని సమాధానమిస్తాడు.
ఇక మరోవైపు విశ్వ, శ్రీవల్లికి ఫోన్ కాల్ చేస్తాడు. ఫోన్ రింగవ్వగానే వల్లీ ఒక్కసారిగా కంగారు పడుతుంది. “ఇప్పటికే నర్మదను అవినీతి కేసులో ఇరికించడంలో నా భాగం ఉన్న విషయం బయటపడిపోతుందేమోనని నేను భయంతో ఉన్నాను. ఇక నువ్వు నన్ను ఎందుకు ఇబ్బంది పెడుతున్నావు?” అని కోపంగా అంటుంది.
విశ్వ “అమూల్య విషయం వదిలేయలేను. నేను రెండురోజుల్లో ఆమెను నా వైపుకు తిప్పుకోవాలి. అందుకోసం నువ్వు ఒక్క పని చేయాలి” అని చెబుతాడు. దాంతో వల్లీ “ఇంకా నా జీవితం పూర్తిగా నాశనం అయిపోయింది. నువ్వు చెప్పినట్టు చేస్తే నా కాపురం కూలిపోతుంది. నా నగలు అమ్మేసి అయినా నీ పది లక్షలూ నీకే ఇచ్చేస్తా” అని చెబుతుంది.
విశ్వ నవ్వుతూ “అయితే నువ్వే నాకు, అమూల్యకి మధ్య రాయభారిగా ఉన్నావని మీ ఇంట్లో చెబుతాను” అని బ్లాక్‌మెయిల్ చేస్తాడు. ఈ మాట విన్న వల్లీ కంగారుపడి ఏడుస్తూ “నా జీవితంతో ఆడుకుంటున్నావురా?” అని అంటుంది. విశ్వ “నీ ఏడుపు ఆపు. నేను చెప్పినట్టు చేయి” అని బెదిరిస్తాడు. తన ప్రాణం కాపాడుకునేందుకు “సరే, నువ్వు చెప్పినట్టే చేస్తా” అని తిట్టుకుంటూ వల్లీ అంగీకరిస్తుంది.
అంతలో శ్రీవల్లీ తల్లిదండ్రులు, అంటే భాగ్యం మరియు ఇడ్లీబాబాయ్ మళ్లీ రామరాజు ఇంటికి వస్తారు. వారిని చూసి శ్రీవల్లీ ఆశ్చర్యంగా “రాత్రే వెళ్ళారుగా, ఇంత తెల్లవారగానే తిరిగి ఎందుకు వచ్చారు?” అని అడుగుతుంది.
భాగ్యం “అప్పుల వాళ్లు మమ్మల్ని వదిలిపెట్టడం లేదు. ఇంటి దగ్గర కత్తులు పెట్టి బెదిరిస్తున్నారు. అందుకే పచ్చళ్ళ వ్యాపారం చేయాలనుకున్నాం. దానికి పాతిక లక్షలు కావాలి. మీ మామయ్యగారి దగ్గర నుంచి కొట్టేయాలని వచ్చాం” అని చెబుతుంది.
వల్లీ ఆ మాట విని షాక్ అవుతుంది. నర్మద కూడా పక్కనుంచి వింటుంది. దాంతో వల్లీ “గతసారీ మామయ్య డబ్బులు ఇస్తానన్నప్పుడు నాన్న పొరపాటు చేసాడు. ఈసారి అలాంటిదేమీ జరగకూడదు. ఈసారి అత్తయ్య గారి ద్వారా చెప్పించి, మామయ్యగారి దగ్గర నుంచి డబ్బు తీసుకుందాం రండి” అని చెప్పి వారిని వేదవతి దగ్గరకు తీసుకెళ్తుంది.
వేదవతి ముందుకు చేరగానే భాగ్యం, ఇడ్లీలు కళ్లలో నీరు పెట్టుకుని ఏడవడం మొదలుపెడతారు. వేదవతి “ఏమైంది? ఎందుకింతగా ఏడుస్తున్నారు?” అని అడుగుతుంది. వాళ్లు “ఏం చెప్పాలో కూడా తెలియడం లేదు వదినా” అని నటిస్తూ మాట్లాడుతారు. ఆ సమయానికి నర్మద కూడా ఆ సీన్‌లోకి వస్తుంది. “మీ ప్లాన్‌ ఏంటో చెప్పండి” అని అడుగుతుంది. అప్పుడు భాగ్యం “మా దరిద్రం పోయేలా పచ్చళ్ల వ్యాపారం ప్రారంభించాలని అనుకుంటున్నాం. దానికి కొంచెం సాయం కావాలి” అని చెబుతుంది.
వేదవతి వెంటనే “అయ్యో, ఎందుకు అడుగుతున్నారు! తప్పకుండా సాయం చేస్తాం. ఐదు ఆరు కేజీలు పచ్చడి నేను కొంటాను” అని చెబుతుంది. కానీ భాగ్యం “అది కాదు వదినా, మా వ్యాపారం మీ చేతుల్లోనే ఉంది” అని అంటుంది. వేదవతి “నా చేతుల్లో అంటే? ఆహా, రిబ్బన్ కట్ చేయాలా? అదీ తప్పక చేస్తాను” అని నవ్వుతూ చెబుతుంది. కానీ భాగ్యం “అది కాదు వదినా, మా పికెల్ వ్యాపారానికి మీరు ఆర్థిక సహాయం చేయాలి. అన్నయ్యగారిని అడిగి పాతిక లక్షలు ఇప్పించండి” అని చెబుతుంది.
ఆ మాట విన్న వేదవతి నోరెళ్లబెడుతుంది. “ఏంటి పాతిక లక్షలా?” అని ఆశ్చర్యపడుతుంది. పక్కన నర్మద “వీళ్లంతా పెద్ద స్కెచ్ వేసుకుని వచ్చారు. వీళ్లకి గట్టి షాక్ ఇవ్వాలి” అని మనసులో అనుకుంటుంది. ప్రేమ కూడా అదే ఆలోచనలో ఉంటుంది. “వీళ్లకు మళ్లీ డబ్బు లభించకుండా గట్టి బుద్ధి చెప్పాలి” అని అనుకుంటుంది.
ఇక్కడితో నేటి ఎపిసోడ్ ముగుస్తుంది.
Source inspiration: Original story from “ఇల్లు ఇల్లాలు పిల్లలు” (JioHotstar). This is a personal written recap and interpretation.
