ఇల్లు ఇల్లాలు పిల్లలు Nov 14th, 2025 శుక్రవారం ఎపిసోడ్: వల్లి, భాగ్యం, ఇడ్లీ బాబాయ్ ల పచ్చళ్ళ ప్లాన్ కి చెక్ పెట్టిన నర్మద, ప్రేమ … !!!
ఎపిసోడ్ ప్రారంభంలో భాగ్యం, వల్లీ, ఇడ్లీ బాబాయ్ ముగ్గురు కలిసి “భాగ్యం పికిల్స్” అనే వ్యాపారం మొదలుపెట్టాలని నిర్ణయం తీసుకుంటారు. రెండు తెలుగు రాష్ట్రాల్లో మాత్రమే కాదు, విదేశాల దాకా ఈ పచ్చళ్ళ పేరును తీసుకెళ్లాలని కలలు కంటారు.
ఇంతలో నర్మద, ప్రేమ ఇద్దరూ వచ్చి వీళ్ళ ప్లాన్ వింటూ వెటకారంగా మాట్లాడుతారు. “భాగ్యం పికిల్స్ అంటే రెండు రాష్ట్రాల్లో మారుమోగిపోవాలట!” అంటూ నవ్వుకుంటారు. దాంతో వల్లీ “అంత పెద్ద వ్యాపారం చేయాలంటే పెట్టుబడి కూడా అంతే పెద్దగా పెట్టాలి. పైగా ప్రచారం కోసం కూడా కొన్ని లక్షలు ఖర్చు పెట్టాలి కదా” అని చెబుతుంది.
నర్మద వెంటనే “అది సరే, కానీ మీకు పచ్చళ్ళు పెట్టడం వచ్చా?” అని అడుగుతుంది. అప్పుడు ఇడ్లీ బాబాయ్ “భాగ్యం కళ్ళు మూసుకుని పచ్చళ్ళు పెడుతుంది. ఆ పని ఆమెకు చిన్న వయసులోనే అలవాటు” అని చెబుతాడు. ఇది విన్న ప్రేమ చురకగా “అయితే ఇప్పుడు చూపించండి, కళ్ళు మూసుకుని పచ్చళ్ళు ఎలా పెడతారో” అని సవాలు చేస్తుంది. భాగ్యం “సరే, ఇప్పుడు చేస్తాను” అని అంగీకరిస్తుంది. అలా ముగ్గురూ పచ్చడి తయారీకి సిద్ధమవుతారు.
భాగ్యం, వల్లీ, ఇడ్లీ బాబాయ్ ముగ్గురూ కలిసి పచ్చడి తయారీలో మునిగిపోతారు. పచ్చడి చేస్తూ ఉండగా వల్లీ “రామరాజు దగ్గర మనం తీసుకుంటున్న పాతిక లక్షలలో పది నాకు ఇవ్వు” అని అడుగుతుంది. భాగ్యం అన్ని లక్షలు నీకు ఎందుకే అని కారణం అడగగా వల్లీ “ఆ విశ్వ నన్ను బ్లాక్‌మెయిల్ చేస్తున్నాడు. మా మావయ్య గారికి ఏమైనా చెబితే నా కాపురం కూలిపోతుందేమోనని భయంగా ఉంది. అందుకే ఆ డబ్బులు వాడి మోహన కొట్టి ప్రశాంతంగా ఉంటాను” అని చెబుతుంది.
భాగ్యం “సరే కంగారు పడకు, నీకు పది లక్షలు నేను ఇస్తాను” అని అంగీకరిస్తుంది.
ఇంతలో నర్మద, ప్రేమ అక్కడికి వస్తారు. ప్రేమ వ్యంగ్యంగా “చూస్తుంటే మీరు రామరాజు గారి దగ్గర 25 లక్షలు తీసుకుని భాగ్యం పికిల్స్‌ను రెండు రాష్ట్రాల్లో పాపులర్ చేయబోతున్నారు అనిపిస్తుంది” అని అంటుంది. నర్మద కూడా చమత్కారంగా “అది కాదు, విదేశాల్లో కూడా భాగ్యం పికిల్స్ పానకంలా అమ్ముడవుతాయి. ఆ సంగతి మర్చిపోయావా?” అని అడుగుతుంది.
ఇద్దరూ మాట్లాడే తీరుతో భాగ్యానికి ఏదో అనుమానం వస్తుంది. కానీ నర్మద, ప్రేమ నవ్వుతున్నట్టు నటిస్తూ వాళ్ళు చూడకుండా పచ్చడిలో ఉప్పు వేస్తారు. తర్వాత “ఏమీ కాదు, మేము వెళ్తున్నాం” అని వెళ్లిపోతారు. వాళ్లు వెళ్లిపోయిన తర్వాత భాగ్యం, వల్లీ, ఇడ్లీ బాబాయ్ పచ్చడి చేయడంలో తిరిగి నిమగ్నమవుతారు.
పచ్చడిలో ఉప్పు వేయలేదు అని వాళ్లు మరోసారి ఉప్పు వేస్తారు. భాగ్యం రుచి చూసి ఉప్పు సరిపోయిందో లేదో చూడాలని అనుకుంటుంది. కానీ ఇడ్లీ బాబాయ్ వెంటనే ఆపేస్తాడు. “నువ్వు కళ్ళు మూసుకుని 100 కేజీల పచ్చడి కూడా చేస్తావు. ఇప్పుడు రుచి చూస్తే నీ ప్రతిష్ఠ తగ్గిపోదా?” అని అంటాడు.
భాగ్యం నవ్వుతూ తల ఊపుతుంది. ఇడ్లీ బాబాయ్ ఉత్సాహంగా “ఈ పచ్చడి రామరాజు గారికి నచ్చితే పాతిక లక్షలతో పాటు మరో ఐదు లక్షలు అదనంగా ఇస్తారు” అని ఆశగా అంటాడు. వల్లీ కూడా “అదే నిజం” అని అంగీకరిస్తుంది. ముగ్గురూ సంతోషంగా పని ముగిస్తారు.
రాత్రి భోజన సమయం అవుతుంది. ఇంట్లో అందరూ కూర్చుంటారు. భాగ్యం చేతిలో ఆవకాయ జాడీ పట్టుకుని వస్తుంది. ఆవకాయ వడ్డిస్తూ “మా పచ్చడి రుచి ఒకసారి చూసి చెప్పండి” అని రామరాజును అడుగుతుంది.
రామరాజు ఆశ్చర్యపోయి “ఇప్పుడు ఆవకాయతో భోజనం ఏంటి?” అని అడుగుతాడు. అప్పుడే వేదవతి జరిగిన విషయం మొత్తం వివరంగా చెబుతుంది — పచ్చడి వ్యాపారం, అప్పు సంగతి మొదలైనవి. రామరాజు సంతోషంగా “మంచి ఆలోచన చేశారండి. రుచికరమైన పచ్చళ్ళకు మంచి డిమాండ్ ఉంటుంది” అని చెబుతాడు.
భాగ్యం వెంటనే “అయితే ఆ డబ్బు…” అని అడగగా, ఇడ్లీ బాబాయ్ ధైర్యంగా “మేము ప్రతినెలా కట్టేస్తాం. ఏడాదిలో 20 లక్షల రూపాయలు తిరిగి చెల్లిస్తాం” అని హామీ ఇస్తాడు. అతని మాట విని రామరాజు “మీకు ఇంత నమ్మకం ఉంటే నా రైస్ మిల్లు ష్యూరిటీగా పెట్టి డబ్బు ఇస్తాను” అని చెబుతాడు.
ప్రేమ నవ్వుతూ “మావయ్య గారు, మీరు పచ్చడి రుచి చూసి చెప్పండి. వీళ్ళు ఎంత మంచి వంటకారులో మీకే తెలుస్తుంది” అని అంటుంది. దాంతో రామరాజు పచ్చడిని అన్నంలో కలిపి తింటాడు. మొదటి ముద్ద తిన్న వెంటనే ఆయన ముఖం మారిపోతుంది. ఉప్పు అధికంగా ఉండటంతో మాట్లాడలేకపోతాడు.
పక్కవాళ్లకూ ఒకో ముద్ద పెడతాడు. వాళ్లు కూడా తిని బయటికి వెళ్లి ఉమ్మేస్తారు.
రామరాజు కోపంగా “ఇది పచ్చడి కాదు, ఉప్పు కుప్ప. ఇంత దారుణంగా పచ్చళ్ళు చేస్తే ఎవరు కొంటారు? ఇంకేదైనా వ్యాపారం ఆలోచించండి” అని చెబుతూ అక్కడినుంచి వెళ్లిపోతాడు.
వాళ్లు వెళ్లిపోయాక భాగ్యం, వల్లీ, ఇడ్లీ బాబాయ్ ముగ్గురూ పచ్చడి రుచి చూస్తారు. ఉప్పు అధికంగా ఉండటంతో వాళ్ళు కూడా తినలేకపోతారు. ఆ సమయానికే నర్మద, ప్రేమ మళ్లీ వస్తారు. వాళ్లు గట్టిగా “ఎదుటివారిని మోసం చేసి డబ్బు సంపాదించాలని చూస్తే దేవుడు క్షమించడు. కష్టపడి బతకడం నేర్చుకోండి. లేకపోతే మీ ప్రతి అడుగులో మేమే అడ్డుపడతాం” అని హెచ్చరిస్తారు.
వారి మాటలు విని భాగ్యం, వల్లీ, ఇడ్లీ బాబాయ్ ముగ్గురూ షాక్‌తో ఒకరినొకరు చూసుకుంటారు.
సీన్ ఇక్కడి నుంచి ప్రేమ వైపుకి మారుతుంది. ప్రేమ రోడ్డుపక్కన ఆటో కోసం ఎదురు చూస్తుంది. ఆ సమయంలో ధీరజ్ కారులో వచ్చి ఆగుతాడు. ప్రేమ మాత్రం అతన్ని పట్టించుకోదు. ధీరజ్ హారన్ కొడతాడు కానీ ప్రేమ వినిపించుకోదు. తర్వాత కారు దిగి దగ్గరికి వచ్చి “ఎక్కు కార్లో, లేకపోతే కిడ్నాప్ చేస్తాను” అని సరదాగా చెబుతాడు.
ప్రేమ నవ్వుతూ “మీరు స్టేషన్‌లో చేసిన చేష్టలు మర్చిపోయారా?” అని గుర్తు చేస్తుంది. ధీరజ్ “ఇది వేరే విషయం, నీకు ఒక సర్ప్రైజ్ ఇవ్వాలి” అని చెబుతాడు. ప్రేమ “నీ సర్ప్రైజ్ కూడా భయపెడుతుంది” అని వెటకారం చేస్తుంది. తర్వాత ధీరజ్ ప్రేమను కారులో కూర్చోబెట్టి ఎక్కడికి తీసుకెళ్తున్నాడో చెప్పడు. “సర్ప్రైజ్ ఇస్తా” అని నవ్వుతాడు.
అంతటితో ఈ ఎపిసోడ్ ముగుస్తుంది.
మరుసటి రోజు ఎపిసోడ్ ప్రోమోలో వాళ్లు షూ షాపుకి వెళ్తారు. అక్కడ ధీరజ్ స్వయంగా ప్రేమకు కొత్త షూలు తొడుగుతాడు. ఆ క్షణంలో ప్రేమ ముఖంలో చిరునవ్వు విరుస్తుంది. ఆమె హృదయంలో కొంచెం సంతోషం మెల్లగా చేరుతుంది.
Source inspiration: Original story from “ఇల్లు ఇల్లాలు పిల్లలు” (JioHotstar). This is a personal written recap and interpretation.
