ఇల్లు ఇల్లాలు పిల్లలు Nov 20th, 2025 గురువారం ఎపిసోడ్: విశ్వక్ మాయలో పడిన అమూల్య … !!! సాగర్ ప్రేమ గురించి గొప్పగా చెప్పిన నర్మద …!!!
ఎపిసోడ్ ప్రారంభంలో వీఆర్వో ఎగ్జామ్ రిజల్ట్ రోజు కావడంతో సాగర్ ని తీసుకుని రహస్యంగా గుడికి వెళ్తుంటుంది నర్మద. మరోవైపు ప్రేమని పోలీస్ చేయాలి అనే ఉద్దేశ్యంతో ఇంట్లో ఎవరికీ తెలియకుండా రన్నింగ్ కోసం గ్రౌండ్‌కి తీసుకుని వెళ్తుంటాడు ధీరజ్. శ్రీవల్లి ఉదయాన్నే లేచి వాకిట్లో ముగ్గువేస్తూ ఉంటుంది. ఇంతలో రామరాజు, తిరుపతిలు వస్తారు.
అది చూసి తిరుపతి ” తెల్లవారకముందే కోడి కూయకముందే ఇంటి ముందు ముగ్గుపెట్టే కోడల్ని ఏరికోరి తీసుకొచ్చావ్. నువ్వు సూపర్ బావా” అని తెగ పొగిడేస్తుంటాడు. దానికి శ్రీవల్లి తెగ మురిసిపోతుంటుంది. వాళ్ళని చూసి ప్రేమ “ఇక మనం వెళ్లినట్టే కానీ లోపలికి వెళ్దాం పదా” అని అంటుంది. ధీరాజ్ మాత్రం “లేదు ఏది ఏమైనాసరే నువ్వు ఈరోజు నుంచి గ్రౌండ్‌కి వెళ్లాల్సిందే” అని అంటాడు. ప్రేమ వెంటనే “ఈ డ్రెస్‌తో మామయ్యకి కనిపిస్తే ఇంకా అంతే. నట్టింట్లో బీభత్సం చేసేస్తారు. ఇది ఏం వద్దు పదా” అని అంటుంది. ధీరజ్ ఆలోచించి “ఐడియా. పద చెప్తాను” అంటూ ప్రేమను లోపలికి తీసుకుని వెళ్తాడు ధీరజ్.
ఇక రామరాజుని చూసిన సాగర్ ‘వామ్మో నాన్న ఇక్కడే ఉన్నారు. ఆయన చూశారంటే ఎక్కడికి ఏంటి అని అడుగుతారు. ఆ కంగారులో నేను వీఆర్వో ఎగ్జామ్ రిజల్ట్ అని చెప్పినా చెప్పేస్తాను. అప్పుడు ఇది ఏమి చెప్పకుండా ఎగ్జామ్ రాసాను అని నా తాట తీస్తారు. ఎందుకొచ్చిన గొడవ నర్మదా వెళ్ళిపోదాం పదా’ అని అంటాడు సాగర్. నర్మదా వినకుండా “లేదు. నీ రిజల్ట్ కోసం ఈరోజు మనం గుడికి వెళ్లి పూజ చేయించుకోవాల్సిందే” అని అంటుంది.
ఇటు ధీరజ్ ప్రేమని ఇంట్లోకి తీసుకుని వచ్చి అక్కడ ఉన్న చీరని ఇచ్చి కట్టుకోమంటాడు. ప్రేమ ఎందుకు ఏమిటి? అని అడగడంతో ధీరజ్ చీరని చుట్టేస్తుంటాడు. ప్రేమ చీరని చుట్టేసుకుని ధీరజ్ తో కలిసి బయటికి వెళ్తుంది. అది చూసిన రామరాజు ఎక్కడికి వెళ్తున్నారు అని అడుగుతాడు. ధీరజ్ కొంచం భయంగా గుడికి వెళ్తున్నాం అని చెప్తాడు. రామరాజు అనుమానంగా “నీది అసలు గుడికి వెళ్లే మొహం కాదు కదా మరి ఇంత ఉదయాన్నే గుడికి ఏంట్రా?” అని అడుగుతాడు. వెంటనే పక్కన ఉన్న తిరుపతి దేవుడు మీద నమ్మకం లేదు అనే వాళ్ళకే ఇలా భక్తి ఎక్కువవుతుంది బావ అని అనడంతో రామరాజు “సరేలే వెళ్ళండి” అని అంటాడు.
అక్కడే ఉన్న శ్రీవల్లికి అనుమానంతో ప్రేమని కిందనుంచి పై వరకూ చూస్తుంది. అయితే ప్రేమ చీరకట్టు చూసి “ఏంటి ప్రేమ చీరను కట్టుకోవడం మానేసి చుట్టేసుకున్నావ్. నాకు ఏదో తేడా కొడుతుంది’ అని అంటుంది. అది విన్న రామరాజు ‘తేడా ఏం లేదులే. గుడికి వెళ్తున్నాం అని చెప్తున్నారు కదా వెళ్లనివ్వు’ అని అంటాడు. ఇక ఇటువైపు “ప్రేమ ధీరజ్ గుడికి అని చెప్పారు కదా మళ్లీ అదే చెప్తే అందరం దొరికిపోతాము”అని నర్మద సాగర్ ని తీసుకుని వెనక వైపుకి వెళ్తుంది. అక్కడ సాగర్ నర్మదలు గోడ దూకి వెళ్లడానికి ప్రయత్నించగా శ్రీవల్లి వాళ్లని పట్టేసుకుంటుంది.
శ్రీవల్లి వాళ్ళని చూసి “మీరు ఇక్కడ ఏం చేస్తున్నారూ” అని అనుమానంగా అడుగుతుంది. చల్లగాలి కోసం వచ్చాం లే అని అంటుంది నర్మద. వెళ్లి వెంటనే “మరిది గారు సూర్యుడు ఇంట్లోకి వస్తే కానీ నిద్ర లేవరు. అలాంటిది ఇంత ఉదయాన్నే లేచి రెడీ అయ్యారంటే నాకెక్కడో తేడా కొడుతుంది శీనా?” అని అంటుంది. నర్మద వెంటనే కవర్ చేస్తూ “తేడా లేదూ గీడా లేదూ. మామయ్య గారు పిలుస్తున్నారు వెళ్లు. ఇందాక పొగిడారు కదా మళ్లీ వెళ్లకపోతే పొగరు అనుకుంటారు”అని శ్రీవల్లిని బురిడీ కొట్టి పంపించేస్తుంది నర్మద. ఆ తరువాత గోడ దూకి జంప్ అవుతారు.
ఇక సాగర్‌ని తీసుకుని గుడికి వెళ్లిన నర్మద “మా ఆయన వీఆర్వో పోస్ట్ కోసం ఎగ్జామ్ రాశారు పంతులుగారూ. ఈరోజు రిజల్ట్స్ వస్తున్నాయి. అంతా మంచే జరగాలి అని పూజ చేయండి” అని అంటుంది. పూజ అయ్యాక నర్మద సాగర్ తో “ఎన్నో రోజులుగా ఎదురుచూస్తున్న సంతోషం ఇప్పుడు రాబోతుంది. ఇంకో రెండు మూడు గంటల్లో రిజల్ట్ వస్తుంది. నువ్వు ఖచ్చితంగా ఎగ్జామ్‌లో క్వాలిఫై అవుతావు’ అని అంటుంది నర్మద. ఆ మాటతో సాగర్ “నేను క్వాలిఫై అయితే నా కంటే ఎక్కువగా నీకోసం సంతోషపడతాను. నేను రైస్ మిల్ లో పని చేయడం వల్లనే కదా మీ నాన్న నన్ను అల్లుడుగా అంగీకరించలేదు. ఇప్పుడు నాకు జాబ్ వస్తే నీ పుట్టింటిని నీకు దగ్గర చేసిన వాడ్ని అవుతాను. అప్పుడు నేను నీ భర్తగా గెలిచినట్టే కదా” అని అంటాడు.
నర్మద “నువ్వు చూపించే ఈ ప్రేమే నీ కోసం అందర్నీ వదిలేసుకుని వచ్చేట్టు చేసింది. నా కన్నీళ్లు తుడవడం కాదు అసలు కన్నీళ్లు రాకుండా చూసుకుంటావు. ఆ నమ్మకంతోనే నీతో ఏడడుగులు నడిచాను’ అంటూ ఎమోషనల్ అవుతుంది నర్మద. అంతలో సాగర్ “అయ్యో ఇవాళ కొన్ని డెలివరీలు ఉన్నాయి. నిన్ను ఇంట్లో వదిలేసి నేను మిల్లుకి వెళ్తాను పదా” అని అంటాడు. నేను ఆటోలో వెళ్తానులే నువ్వు వెళ్లు రిజల్ట్ రాగానే నేనే నీ దగ్గరకు వస్తాను అంటూ సాగర్‌కి ఆల్ ది బెస్ట్ చెప్తుంది నర్మద.
ఇక మరోవైపు అమూల్య కాలేజీకి వెళ్లడం చూసి విశ్వక్ ప్లాన్ తో బైక్ వేసుకుని అమూల్య వద్దకు వచ్చి నేను డ్రాప్ చేస్తాను ఎక్కు అని ఒత్తిడి చేస్తాడు. అమూల్య ముందు వద్దు అంటుంది కానీ తరువాత ఒప్పుకుంటుంది. అదే సమయంలో అమూల్య మెడలో తాను ఇచ్చిన చైన్ చూస్తాడు విశ్వక్. ఇక అముల్య కూడా విశ్వక్ అంటే ఇష్టం ఉన్నట్టే సిగ్గు పడుతూ బైక్ ఎక్కుతుంది. వాళ్ళు బైక్ మీద వెళ్తుండగా ఎదురుగా రామరాజుతో బైక్ మీద వస్తున్న వేదవతి అమూల్యని చూస్తుంది. అమూల్య చున్నీ కప్పుకుని కవర్ చేసుకుంటుంది కానీ వేదవతి గుర్తు పడుతుంది.
అంతటితో ఈ ఎపిసోడ్ ముగుస్తుంది.
Source inspiration: Original story from “ఇల్లు ఇల్లాలు పిల్లలు” (JioHotstar). This is a personal written recap and interpretation.
