ఇల్లు ఇల్లాలు పిల్లలు Nov 21st, 2025 శుక్రవారం ఎపిసోడ్: సాగర్ ని అవమానించిన నర్మద తండ్రి …!!! వేదవతిని ఏమార్చిన శ్రీవల్లి, అమూల్య …!!!
ఎపిసోడ్ మొదలవ్వగానే సాగర్ మిల్లు నుంచి బియ్యం బస్తాలు షాప్‌లకి వేస్తూ ఉంటాడు. పని చేస్తూ ఉన్నా కూడా, మనసులో మాత్రం రిజల్ట్స్ కోసం వెయిట్ చేస్తూ ఈపాటికి రిజల్ట్స్ వచ్చేసి ఉంటాయి, నర్మద ఇంకా ఫోన్ చేయలేదేంటి అని ఆలోచిస్తుంటాడు. అంతలో చేతిలో పేపర్ పట్టుకుని నర్మద తండ్రి అక్కడికి కోపంగా చేరుకుంటాడు. సాగర్ అతన్ని చూసి తాను సెలెక్ట్ అయిన విషయం స్వయంగా చెప్పడానికి వస్తున్నాడు అని ఆశ పడతాడు.
నర్మద తండ్రి సాగర్ ముందు పేపర్ విసిరేస్తూ, “ఇదే నీకు కరెక్ట్ పని. నువ్వు మూటలు మోసుకోవడానికే పనికి వస్తావు. నువ్వు వీఆర్‌ఓ జాబ్‌కు క్వాలిఫై కాలేదు” అని కఠినంగా మాట్లాడతాడు. ఇంకా సాగర్ మరింతగా బాధ పడేలా “గవర్నమెంట్ జాబ్ కొడతానని గొప్పలు చెప్పావ్ కదా? ఇదేనా అది? ఒక అమ్మాయిని లేపుకెళ్లడం తేలిక నాలుగు మాటలు చెప్తే సరిపోతుంది, కానీ గవర్నమెంట్ జాబ్ సాధించడం అంత ఈజీ కాదు. నా కూతురు ఎప్పుడు సరైన నిర్ణయాలే తీసుకుంది కానీ తాను చేసిన సరిదిద్దుకోలేని పెద్ద తప్పు—నిన్ను పెళ్లి చేసుకోవడం. నీవు ఒక చేతకానివాడివి. భర్తగా అసమర్థుడివి” అని మాటలు అనేసి వెళ్తుండగా అతని వెనకే ఉన్న నర్మద అవి అన్నీ వింటుంది. నర్మదని కోపంగా చూస్తూ ఆమె తండ్రి వెళ్ళిపోతాడు. నర్మద కళ్ళ నీళ్లు పెట్టుకున్న సాగర్ ని చూస్తూ ఉండిపోతుంది.
మరోవైపు ఇంట్లో వేదవతి పాలు వేడి చేస్తూ అమూల్య ఎప్పుడు వస్తుందా విశ్వక్ బండి ఎక్కడం గురించి అడుగుదాం అని ఎదురు చూస్తూ ఉంటుంది. అంతలో ప్రేమ అక్కడికి వచ్చి వేదవతిని అడుగుతుంది ఏం ఆలోచిస్తున్నావు అని. వేదవతి “అమూల్య మీ అన్నయ్య విశ్వ బండిపై కనిపించింది” అని చెప్పడంతో ప్రేమ ఆశ్చర్యపోతుంది. కానీ ప్రేమ మీరు పొరపడి ఉంటారు విశ్వ అంటే అమూల్యకి అసలు ఇష్టం లేదు అని అంటుంది. కానీ వేదవతి గట్టిగా డ్రెస్ చూసాను అదే అని చెప్పడంతో ప్రేమ కూడా ఆలోచిస్తుంది. ఈ మాటలు చాటుగా విన్న వల్లీ ఒక్కసారిగా ఆందోళన పడుతుంది.
వేదవతి, ప్రేమ బయట అమూల్య కోసం వెయిట్ చేస్తుంటారు. అమూల్య ఇంట్లోకి అడుగుపెట్టగానే వల్లీ పరుగెత్తుకుంటూ వెళ్లి, ఆమెను పక్కకి తీసుకు వెళ్లి “నీ పని అయిపోయింది. నువ్వు విశ్వ బండి మీద వెళ్లడం మీ అమ్మ చూసేసింది. డ్రెస్ చూసింది అంట. నువ్వా కాదా అని కొంచం డౌట్ లో ఉంది” అని భయపెడుతుంది. అమూల్య భయపడటంతో వల్లి మరో చున్నీ ఇచ్చి ఇది వేసుకుని వెళ్లు అని పంపిస్తుంది.
వేదవతి అమూల్యని చూసి చున్నీ మారడం గురించి అడగ్గా అమూల్య లేదు ఇదే వేసుకు వెళ్ళాను అని అబద్దం చెప్తుంది. వేదవతి డ్రెస్ కూడా ఇదే చూసాను నువ్వు విశ్వక్ బండి మీద వెళ్ళావా అని అడుగుతుంది. అమూల్య ఇలాంటి డ్రెస్ లు చాలా మంది వేసుకుంటారు అని చెప్తుండగా వల్లీ వచ్చి “అవును నేను కూడా చూసాను” అని కన్విన్స్ చేస్తుంది. వేదవతి, ప్రేమ మళ్లీ విశ్వక్ గురించి అడగడంతో వల్లి అమూల్యను ఏడవమని సైగ చేస్తుంది. అమూల్య నన్ను నమ్మడం లేదు అని ఏడుపు నటిస్తుంది. వల్లి అమూల్యని అక్కడ నుండి తీసుకు వెళ్తుంది.
రాత్రికి సాగర్ ఉదయం జరిగిన విషయం గుర్తుచేసుకుని బాధపడుతూ ఉంటాడు. నర్మద వచ్చి, “ఇదొక ఎగ్జామ్ మాత్రమే సాగర్ మళ్లీ రాయొచ్చు. ఫస్ట్ అటెంప్ట్‌లో ఎవరికీ జాబ్ రాదు కదా? నీకు ఏజ్ కూడా అయిపోలేదు. ఇంకా చాలా సార్లు రాయొచ్చు” అని ఓదారుస్తుంది. కానీ సాగర్ తనను తాను నిందించుకుంటూ, “నిజంగా చెప్పాలంటే మీ నాన్న అన్న మాటలన్నీ నిజం నర్మద. నేను నిజంగానే చేతకాని వాడిని. నువ్వు నాకోసం నీ కుటుంబాన్ని వదిలి వచ్చావు. కానీ నేను మాత్రం నీకు వాళ్ల ప్రేమను తిరిగి ఇవ్వలేకపోతున్నా. నేను జాబ్ కొట్టుంటే, ఈరోజు మీ నాన్న నన్ను అల్లుడిగా అంగీకరించేవారు. నువ్వు గర్వంతో వాళ్ల ముందు తలెత్తుకునేదానివి” అంటూ కన్నీళ్లు పెట్టుకుంటాడు.
ఈ మాటలన్నీ దూరంగా విన్న శ్రీవల్లి వెంటనే తనలో తాను “అంటే నర్మద మామయ్యకి తెలియకుండా మొగుడిని గవర్నమెంట్ జాబ్ చేయించాలని చూస్తుందా? ఇది బయట పెట్టాలి అంటే సాక్ష్యంగా హాల్‌టికెట్ ఉంటే చాలు!” అని అనుకుంటూ గదిలో వెతుకుతుంది. చివరకు ఆ హాల్‌టికెట్ దొరుకుతుంది. ఆమె కళ్లల్లో ఆనందంతో “దీనితో మామయ్య ముందు వీళ్ల అసలు డ్రామా బయటపెట్టేస్తా” అని అనుకుంటుంది.
అక్కడితో ఈ ఎపిసోడ్ ముగుస్తుంది.
Source inspiration: Original story from “ఇల్లు ఇల్లాలు పిల్లలు” (JioHotstar). This is a personal written recap and interpretation.
