ఇంటింటి రామాయణం Nov 1st, 2025 శనివారం ఎపిసోడ్ : ప్రమాదంలో ఉన్న మీనాక్షి … !!! అవని తల్లిని కాపాడుకోగలదా…???
మీనాక్షి అవని కోసం వారి పాత ఇంటికి వెళుతుంది. తలుపు తాళం వేసి ఉండటం చూసి ఆందోళన చెందుతుంది. అప్పుడు ఒక వ్యక్తి అక్కడ ఎవరూ ఉండరని, ఇల్లు అమ్మేశారని చెబుతాడు. మీనాక్షికి బాధ తో అవని కోసం బయల్దేరుతుంది. తన దగ్గర ఉన్న ఫోటో మీద ఫోన్ నెంబర్ ఉంది అనుకుంటూ మీనాక్షి, అవని, భరత్ కలిసి ఉన్న ఫోటోని బయటికి తీస్తుంది. ఆమె దగ్గరలో ఉన్నవారిని అడిగి ఆ నంబర్‌కి కాల్ చేయమంటుంది. అప్పుడే ఆ ఫోటో గాలికి ఎగిరిపోతుంది. దాన్ని పట్టుకోవాలని మీనాక్షి పరుగెత్తుతుంది. ఆ ఫోటో చక్రధర్ కారు మీద పడుతుంది.
మీనాక్షి బలహీనంగా ఉండటంతో పరుగెత్తి అలసిపోతుంది, రోడ్డుపక్కన కూర్చుంటుంది. చక్రధర్ ఆ ఫోటో తీసుకుంటాడు. ఆ ఫోటోలో ఉన్నదాన్ని చూసి ఆశ్చర్యపోతాడు. “ఈ ఫోటో ఇక్కడికి ఎలా వచ్చింది? నా మొదటి భార్య మీనాక్షి తిరిగి వచ్చిందా? ఆమె అవని కోసం వెతుకుతుందా? లేక నిజం చెప్పడానికి వచ్చిందా — అవని, భరత్ నా పిల్లలని?” అని ఆలోచించుకుంటాడు. వెంటనే అవని ఇంటి వద్దకు వస్తాడు.
ఇంటి బయట నిలబడి, “మీనాక్షి ఇక్కడికి వచ్చిందా? ఏమైనా చెప్పిందా?” అని తలలో ఆలోచిస్తున్నప్పుడు పల్లవి అతడిని చూసి కోపంగా వస్తుంది. “ఇక్కడికి ఎందుకు వచ్చావు?” అని అడుగుతుంది. చక్రధర్ “నిన్ను చూడాలని వచ్చా” అంటాడు. పల్లవి గట్టిగా సమాధానం ఇస్తుంది — “నేను అవసరం లేదు అన్నారుగా . నా భర్త వ్యాపారం మొదలు పెట్టాలని డబ్బులు అడిగితే అవమానించావు. ఇప్పుడు ఇక్కడికి ఎందుకు వచ్చావు? ఇక ఎప్పుడూ రాకండి” అని అంటుంది.
చక్రధర్ “నిన్ను చూడటానికి వచ్చినా ఇలా పంపించడం సరైనదా?” అంటాడు. ఇంతలో అవని అక్కడికి వస్తుంది. “ఏమిటి పల్లవి, నాన్నతో ఇలా మాట్లాడటం సరైనదా? ఆయన మీ తండ్రి కదా” అని అడుగుతుంది. పల్లవి తిప్పి అంటుంది — “నాకు నీవు నేర్పించాల్సిన అవసరం లేదు!” అవని శాంతంగా చెబుతుంది — “ఆయన మంచివాడో కాదో పక్కనపెడదాం, కానీ ఆయన నీ తండ్రి. పెద్దలను గౌరవించాలి. రండి బాబాయ్ గారు , లోపలకి రండి” అని అంటుంది.
దీనికి పల్లవి కోపంగా — “నేను వెళ్ళమంటే, నువ్వు రమ్మంటావా? ఎవరు నువ్వు?” అని అంటుంది. అవని చెబుతుంది — “ఆయన నాకు బాబాయి అవుతారు. అంటే ఆయన తండ్రి లాంటివారు.” పల్లవి కఠినంగా చెబుతుంది — “తండ్రి లాంటి వారు కానీ నిజంగా కాదు. అది గుర్తుంచుకో.”
పల్లవి మాటలు విని చక్రధర్ మనసులో అనుకుంటాడు — “దేనికి ఇలా మాట్లాడుతుంటే, నిజంగా నేను అవని తండ్రినని తెలిసినప్పుడు ఏం చేస్తుందో?” అని. అంతలో పల్లవి అవనితో — “అయినా నీకు కూడా ఇలాంటి తండ్రి ఉండి నీ గురించి పట్టించుకోకుండా ఉంటే తెలుస్తుంది నా బాధ ఏంటో. అనవసరంగా మా విషయంలో జోక్యం చేసుకోకు” అని గట్టిగా చెప్తుంది. ఆ తరువాత చక్రధర్ ఆలోచించి “నన్ను బాబాయిగారు అంటూ లోపలి పిలుస్తుంది అంటే మీనాక్షి అవనికి నిజం చెప్పలేదనుకుంటా” అని నిర్ధారించుకుంటాడు. “సరే, మీరు చెప్పినట్లే వెళ్తాను” అని చెప్పి వెళ్ళిపోతాడు.
ఇంకోవైపు మీనాక్షి దగ్గుతూ, బలహీనంగా రోడ్డుపక్కన బస్టాండ్ లో కూర్చుంటుంది. “నా కూతురిని ఎలా కలవడం?” అని బాధపడుతుంది. అదే సమయంలో అవని కూతురు ఆరాధ్య అక్కడికి వస్తుంది. మీనాక్షిని చూసి “అమ్మమ్మ, ఆకలిగా ఉందా? ఇది తినండి” అని పండు ఇస్తుంది.
మీనాక్షి నవ్వుతూ చెబుతుంది — “చిన్న పిల్లవి అయినా, ఆకలితో ఉన్నవారికి అన్నం పెట్టే మనసు ఉంది , దేవుడు నిన్ను చల్లగా చూస్తాడు” అని ఆశీర్వదిస్తుంది. ఆరాధ్య చెబుతుంది — “నిన్ను ఎక్కడో చూసినట్టుంది.” మీనాక్షి నవ్వుతూ — “నాకూ అలాగే అనిపిస్తుంది కానీ వయసు అయ్యింది కదా గుర్తుకు రావడం లేదు” అంటుంది. ఆరాధ్య “సరే అమ్మమ్మ , మా అమ్మ వస్తుంది, నేను వెళ్తా” అని చెబుతుంది. ఆ సమయానికి అవని బైక్‌పై వస్తుంది. “స్నాక్స్ తిన్నావా?” అని అడుగుతుంది. ఆరాధ్య — “ఆ ఆకలితో ఉన్న అమ్మమ్మకి ఇచ్చేశాను” అంటుంది. కానీ అవని ఆ వృద్ధురాలు తన తల్లే అని గుర్తించదు. ఇద్దరూ వెళ్ళిపోతారు.
రాత్రికి ఇంట్లో పల్లవి, అవని ఇద్దరూ బట్టలు ఐరన్ చేయాలని హాల్లోకి వస్తారు. ఇద్దరు నేను ముందు చేసుకుంటాను అంటూ వాదించుకుంటారు. అవని పల్లవితో — “నీకు ఇపుడు అర్జెంటు పని ఎం లేదు కదా రేపు నేను ఆఫీసుకి వెళ్లాలి, ఆరాధ్య స్కూల్‌కి వెళ్లాలి కాబట్టి ముందు నేను చేసుకుంటాను” అని చెబుతుంది. కానీ పల్లవి అంగీకరించదు.కమల్ వచ్చి విషయం అడుగుతాడు. తెలిసాక పల్లవిని ఒప్పించడానికి ప్రయత్నిస్తాడు కానీ ఆమె వినదు. చివరికి అవనిని వదిలేయమని చెబుతాడు. అవని లోపలికి వెళ్తుంది. పల్లవి ఐరన్ చేయడానికి ఐరన్ బాక్స్ పట్టుకోగానే కరెంట్ షాక్ తగులుతుంది. సౌండ్ విని అవని కమల్ వస్తారు. కమల్ వెంటనే చీపురుతో కొట్టి ఆమెను రక్షిస్తాడు. పల్లవి స్పృహ తప్పి కింద పడుతుంది. కమల్ నీళ్లు చల్లి ఆమెను స్పృహలోకి తీసుకొస్తాడు. అప్పుడు నవ్వుతూ — “ఇలా అవుతుంది అని నాకు ముందే తెలుసు, కానీ చెప్తుంటే నువ్వే వినలేదు, ఇప్పుడు బుద్ది వచ్చిందిగా” అంటాడు. ఆ మాటలకి పల్లవి మొహం మాడిపోతుంది.
తర్వాత చక్రధర్ ఒక రౌడీని కలిసి మీనాక్షిని చంపమని ఆజ్ఞాపిస్తాడు. “ఆమె బ్రతికుంటే నా నిజం బయటపడుతుంది. అవని నా కుమార్తె అని అందరికీ తెలిసిపోతుంది. నా ప్రతిష్ట పోతుంది. ఆమెని ఈ లోకంలో ఉండనీయకూడదు” అని అనుకుంటాడు.
మీనాక్షి ప్రాణాలు నిలుస్తాయా? అవని ఆమెను రక్షిస్తుందా? అన్నది మరుసటి ఎపిసోడ్‌లో తెలుస్తుంది.
Source inspiration: Original story from “ఇంటింటి రామాయణం” (JioHotstar). This is a personal written recap and interpretation
