ఇంటింటి రామాయణం Nov 6th, 2025 గురువారం ఎపిసోడ్ : అవని తండ్రి గురించి ప్రశ్నించిన పల్లవి …. !!!! పల్లవిని నిలదీసిన కమల్ …. !!!!
అవని తండ్రి గురించి ప్రశ్నించిన పల్లవి
ఎపిసోడ్ ప్రారంభంలో అవని తల్లిదండ్రులను గురించి పల్లవి ప్రశ్నిస్తూ “అందరూ మీ అమ్మ గురించి మాట్లాడుతున్నారు… కానీ మీ నాన్న ఎవరో కూడా చెప్పాలి కదా? అసలు మీ నాన్న ఉన్నారా? ఉంటే ఎక్కడ ఉన్నారు? వస్తారా ? రారా ?” అని కఠువుగా మాట్లాడుతుంది. మీనాక్షి బాధతో “ఇప్పుడు వారి తండ్రి గురించి అడగవద్దు. సమయం రాగానే నేను అన్నీ చెబుతాను.”
కానీ పల్లవి వెనుకడుగు వేయదు. “అడగడం తప్పా? నేను ఎందుకు అడగకూడదు?” అని ప్రశ్నిస్తుంది.
మీనాక్షి శాంతంగా “అడగడం తప్పు కాదు, కానీ చెప్పే పరిస్థితి లేదు” అని చెబుతుంది. ఆమె కళ్లల్లో నీరు చేరుతుంది. “ఇలా అడిగేవారి ముందు నా పిల్లలు తలదించుకోవడం నేను చూడలేను. త్వరలోనే మీ నాన్న ఎవరనేది నేనే చెబుతాను,” అని భరోసా ఇస్తుంది.
ఈ మాటలు విని భరత్ కోపంతో “మా నాన్న ఎవరనేది మీకే కాదు, మాకు కూడా మా అమ్మ చెప్పలేదు. ఆయన వల్లే మాకు ఈ పరిస్థితి వచ్చింది. ఆయనే కారణం. ఆయన ఎవరనేది తెలిస్తే వదలను. నా చేతులతో నేనే చంపేస్తా” అని ఆవేశంతో అంటాడు. అవని వెంటనే ముందుకొచ్చి “రేయ్ భరత్… కోపం తెచ్చుకోకు. అమ్మ చెప్పినప్పుడు చెబుతుంది” అని శాంతపరుస్తుంది.
ఇంతలో పక్కనే ఉన్న కమల్, పల్లవిని చూస్తూ “ఏయ్, ఈ జన్మలో నువ్వు మారవా?” అని అంటాడు. పల్లవి తెగేసి “నేను మారను. ఏ జన్మలో అయినా నేను ఇలాగే నాలానే ఉంటాను” అని సమాధానమిస్తుంది.
అవని, భరత్ కలిసి మీనాక్షిని లోపలికి తీసుకెళ్తారు.
మీనాక్షి, ప్రణతి ల ఆత్మీయత
ఇంట్లోకి వెళ్లిన మీనాక్షి తన బ్యాగ్‌ నుండి ఉంగరం తీసి కోడలైన ప్రణతికి ఇస్తుంది. “నీ అత్తగా నేను నీకు ఇవ్వగలిగేది ఇది ఒక్కటే. అంతకంటే ఎక్కువ ఇవ్వలేకపోతున్నందుకు క్షమించు అమ్మా” అని చెబుతుంది.
ప్రణతి సంతోషంగా “నాకు మీ ప్రేమ చాలు అత్తయ్యా. అదొక్కటే నాకు కావలసినది” అని అంటుంది.
మీనాక్షి చిరునవ్వుతో “నిన్ను కోడలిగా పొందటం నా అదృష్టం. గొప్పింటి అమ్మాయి అయినా, నీ మనసు చాలా మంచిది. నువ్వు నా కొడుకుని పెళ్లి చేసుకున్నావంటే నీ మనసు ఎంత గొప్పదో తెలుస్తుంది. నా కూతురు లాంటి మంచి మనసున్న అమ్మాయి నాకు కోడలు అయినందుకు చాలా సంతోషంగా ఉంది” అని అంటుంది.
ప్రణతి “నేను మీరు అనుకున్నంత గొప్పదాన్ని కాదు అత్తయ్యా. అవని వదినే నా ప్రాణాలను కాపాడింది. ఆమె నాకు ఈ కొత్త జీవితాన్ని ఇచ్చింది. నేను ఏం చేసినా, మాట్లాడినా ఆమె దగ్గర నుంచి నేర్చుకున్నదే. అవని నాకు తల్లి లాంటిది” అని గౌరవంగా చెబుతుంది. అవని నవ్వుతూ “పొగడ్తలు చాలు, ఇక భోజనం చేద్దాం రండి” అని అందరినీ డైనింగ్‌ వైపుకి తీసుకువెళ్తుంది.
రాజేశ్వరిని డబ్బులు అడిగిన పల్లవి
ఇంతలో పల్లవి తన గదిలో కోపంగా తిరుగుతూ ఉంటుంది. తన స్నేహితురాలు చేసిన అవమానాలు గుర్తుచేసుకుంటుంది. వెంటనే మొబైల్ తీసి తన తల్లి రాజేశ్వరికి కాల్ చేస్తుంది. రాజేశ్వరి ఫోన్ లిఫ్ట్ చేస్తూ ఆశ్చర్యంతో “ఈ టైమ్‌కి నువ్వు ఫోన్ చేసావ్ పల్లవీ? ఏం అయిందమ్మా?” అని అడుగుతుంది.
పల్లవి బాధగా చెబుతుంది “నాన్న నన్ను పట్టించుకోవడం లేదు. నీకు కూడా నేను అవసరం లేనట్టేనా? నేను చిన్న చిన్న అవసరాలకి కూడా డబ్బుల్లేక ఇబ్బంది పడుతున్నాను. నాన్న కూడా పట్టించుకోరు, నువ్వు కూడా అలాగేనా?” అని వాపోతుంది. రాజేశ్వరి “ఏమిటమ్మా పల్లవి, ఇలా ఎందుకు మాట్లాడుతున్నావు? నేను నీ తల్లినే కదా. నీకు అవసరం ఉన్నప్పుడు నేను దూరంగా ఎలా ఉంటాను? నా దగ్గర కొంత డబ్బు ఉంది. రేపు వచ్చి తీసుకో ” అని చెప్తుంది.
పల్లవి సంతోషంతో — “థాంక్స్ అమ్మా” అని ఫోన్ పెట్టేస్తుంది. రాజేశ్వరి కాస్త విచారంగా “నా కూతురికి ఇప్పుడు తల్లి ప్రేమ అవసరం లేదు, తల్లిగా మాత్రమే నాతో అవసరం ఉంది” అని మనసులో అనుకుంటుంది.
చక్రధర్ గురించి ఆలోచిస్తున్న మీనాక్షి
ఇంతలో మీనాక్షి కిటికీ దగ్గర కూర్చొని పాత జ్ఞాపకాల్లోకి వెళ్తుంది. తన భర్త చక్రధర్ ఆదేశాలు గుర్తుకొస్తాయి.
“మీనాక్షి ఎక్కడ ఉన్నా వెతికి కనుక్కోండి. కనిపించిన వెంటనే ఎవరికి తెలియకుండా చంపేయండి” అని ఆజ్ఞ ఇచ్చిన అతని మాటలు ఆమె చెవుల్లో మళ్లీ మారుమ్రోగుతుంది.
మీనాక్షి నిశ్శబ్దంగా అనుకుంటుంది “వాడు నా కోసం వెతుకుతున్నాడంటే, నేను కనిపిస్తే చంపేస్తాడు. నాకు చావు భయం లేదు. కానీ నా పిల్లలకు ప్రమాదం కలగకూడదు. అందుకే వాళ్లకు వారి తండ్రి గురించి నేను చెప్పలేదు.” అంతలో అవని లోపలికి వచ్చి, సున్నితంగా తల్లిని చూసి “అమ్మా, నువ్వు మా నాన్న గురించి చెప్పకపోతే దానికి ఏదో కారణం ఉంటుంది. కానీ నేను అడగకుండా ఉండలేను. మా నాన్న ఎవరు అమ్మా?” అని అడుగుతుంది.
మీనాక్షి నిట్టూర్చి “ఇప్పుడు దాని గురించి నేను ఏమీ చెప్పలేను అమ్మా” అని సమాధానం ఇస్తుంది.
అవని అర్ధం చేసుకుని “పర్లేదు అమ్మా. నిన్ను ఇబ్బంది పెట్టదలచుకోలేదు. నీకు చెప్పాలని అనిపించినప్పుడు చెబుతావు. ఆ నిజం చెప్పడానికి నీకు ఎలాంటి ఇబ్బంది రాకుండా చూసుకోవడం నా బాధ్యత. సరే ఇపుడు రెస్ట్ తీసుకో కాసేపట్లో భోజనం వడ్డిస్తాను” అని ప్రేమతో చెబుతుంది.
పల్లవిని నిలదీసిన కమల్
భోజనాలు అయ్యాక గదిలో పల్లవి రాజేశ్వరి డబ్బులు ఇస్తాను అన్నందుకు సంతోషంతో ఉంటుంది. కమల్ వచ్చి అవనిని బాధ పెట్టేలా మాట్లాడినందుకు పల్లవితో గొడవపడి తిట్టి గది నుండి బయటికి పంపుతాడు. పల్లవి చేసేది ఏం లేక హాల్లోనే పడుకుంటుంది.
తరువాతి ఉదయం కమల్ బయట పనికి వెళ్ళడానికి సిద్ధమవుతుంటాడు. పల్లవి తన భర్త వైపు తిరిగి కోపంగా మాట్లాడుతుంది “నా ఫ్రెండ్స్ నన్ను ‘కరెంట్ పని చేసుకునే వాడి భార్య’ అంటుంటే సిగ్గుగా ఉంది.” కమల్ చల్లగా “సిగ్గు పడకు. పని ఏదైనా సిగ్గు కాదు” అని అంటాడు. కానీ పల్లవి అహంకారంగా “నేను చక్రధర్ కూతురిని” అని చెబుతుంది.
మీనాక్షి ఆ మాట విని ఒక్కసారిగా ఆశ్చర్యపోతుంది “పల్లవి తండ్రి చక్రధరా?” అని తనలో తాను అనుకుంటుంది.
పల్లవి మాత్రం “అవును, నేను చక్రధర్ కూతురిగానే ఉంటాను. నా ఖర్చుల కోసం మా వాళ్ల దగ్గర నుంచి డబ్బు తీసుకుంటాను” అని గర్వంగా అంటుంది. కమల్ తిరిగి “అయితే వెళ్లి మీ నాన్న చక్రధర్ ఇచ్చిన డబ్బుతో ఎంజాయ్ చేయి. కానీ మీ నాన్న నీకు రూపాయి కూడా ఇవ్వడని నాకు తెలుసు” అని చెబుతాడు.
మీనాక్షి పక్కనే నిలబడి వారిద్దరి మాటలు వింటుంది. ఆమె మనసులో కలత “నా భర్త చక్రధర్… పల్లవి తండ్రి చక్రధర్ ఒకరేనా?” అని అనుకుంటుంది.
అంతటితో ఈ ఎపిసోడ్ ముగుస్తుంది.
Source inspiration: Original story from “ఇంటింటి రామాయణం” (JioHotstar). This is a personal written recap and interpretation.
