ఇంటింటి రామాయణం Nov 13th, 2025 గురువారం ఎపిసోడ్: మీనాక్షికి డబ్బులు ఆఫర్ చేసిన చక్రధర్ … !!! తిప్పికొట్టిన అవని …. !!!
ఎపిసోడ్ ఆరంభంలో కమల్ తన పనిలో నిమగ్నమై ఉంటాడు. కరెంట్ వైర్లు చుట్టుకుంటూ ఏదో పని చేస్తూ ఉండటాన్ని పక్కనుండి గమనించిన పల్లవి నిట్టూరుస్తూ వెంటనే అమ్మమ్మ భానుమతి దగ్గరకు వెళ్లి “అమ్మమ్మా, మీరు చెప్పండి. కమల్ ఇంటింటికీ వెళ్లి ఇలాంటివి చేయడం నాకు నచ్చడం లేదు” అని అంటుంది.
భానుమతి మాత్రం సాధారణంగా “చేస్తే ఏమైంది, పని అంటే చిన్నది పెద్దది ఉండదు” అని చెబుతుంది. పల్లవి అంతకంటే సీరియస్‌గా ఆలోచించి “ఇలా చెప్తే వినదు. అమ్మమ్మకు సెంటిమెంట్‌తో చెప్తేనే వింటుంది” అని మనసులో అనుకుంటుంది.
ఆ తర్వాత పల్లవి భానుమతిని చూసి “కమల్ బావ తాతయ్య పోలికలతో పుట్టాడు కదా, అందుకే కదా తాతయ్య పేరు పెట్టావు. అలాంటి వాడు ఇలాంటివి చేస్తే పరువు పోయినట్టే అవుతుంది. తాతయ్యలాగే గౌరవం ఉండాలంటే ఇలాంటివి చేయకూడదు కదా. మీ భర్త ఇలాంటివి చేస్తే మీరు ఒప్పుకునేవారా? కమల్ కూడా ఆ పెద్దమనిషి మనవడే కదా, కాబట్టి మీరు అతనికి ఈ పని మానేయమని చెప్పండి” అని అంటుంది.
భానుమతి ఆ మాటలు విని కమల్ దగ్గరకు వెళ్లి “రేపటి నుంచీ ఈ పని చేయకూడదు. వెంటనే ఈ ఉద్యోగం వదిలేయ్” అని చెబుతుంది. దాంతో కమల్ నవ్వుతూ “ఏంటి బామ్మా, ఇంత తలతిక్కగా మాట్లాడుతున్నావు? నేను పని చూసుకుంటాను, నువ్వు వెళ్లి విశ్రాంతి తీసుకో” అని చెబుతాడు. కానీ భానుమతి సీరియస్‌గా “నీకు నీ తాతయ్య పేరు పెట్టింది ఇలాంటివి చేయమని కాదు. ఆయన పరువుని తీసే పనులు చేయొద్దు” అని గట్టిగా చెబుతుంది.
కమల్ ఆపకుండా “నేను తాతయ్య పరువు తీసే పని కాదు బామ్మా, ఆయన పేరు నిలబెట్టే పని చేశాను. కరెంట్ లేకుండా మనం మాట్లాడితే వెలిగే బల్బ్ తయారు చేశాను. ప్రపంచంలో ఇంతవరకు ఇలాంటి బల్బ్ ఎవరూ చేయలేదు. ఇప్పుడు అందరూ ‘కమలాకర్ మనవడు కమల్ కనిపెట్టాడు’ అని గర్వంగా చెబుతారు” అని వివరిస్తాడు.
భానుమతి ఆశ్చర్యంగా “అలానా! అయితే చూద్దాం. బల్బ్ వెలిగించు” అంటుంది. కమల్ చాకచక్యంగా తన కాలుతో బల్బ్ స్విచ్‌ని నొక్కుతాడు. బల్బ్ వెలగగానే భానుమతి ఆనందంతో “శభాష్ రా మనవడా!” అని సంతోషపడుతుంది. కమల్ ప్రతీసారి ఆమె మాట్లాడినప్పుడు కాలుతో ఆపరేట్ చేసి బల్బ్ వెలిగిస్తూ భానుమతిని మోసం చేస్తాడు. ఆమె మాత్రం నిజంగానే అద్భుతం జరిగిందని నమ్మి “మీ తాతయ్య పేరు నిలబెట్టావ్ రా మనవడా! నువ్వు గ్రేట్!” అని పొంగిపోతుంది.
ఆ తరువాత భానుమతి పల్లవి దగ్గరకు వెళ్లి “ఇదిగో, నా మనవడు మాట్లాడితే వెలిగే బల్బ్ కనిపెట్టాడు. తాతయ్య పరువుని నిలబెట్టాడు. ఇక ఇలాంటి మనవడిని పరువు తీస్తాడని ఎలా చెబుతావు?” అని మందలిస్తుంది.
ఇక మరోవైపు, శ్రియ కొత్త కారు కొనాలనే ఉద్దేశ్యంతో శ్రీకర్‌ని తీసుకుని షోరూంకు వెళ్తుంది. అక్కడ అడ్వాన్స్‌ అమౌంట్‌ చెల్లిస్తుంది. ఆ తర్వాత శ్రీకర్‌కి “ఇది మన వాళ్లకి ఇప్పుడే చెప్పొద్దు. వాళ్లు పడి ఏడుస్తారు” అని చెబుతుంది. శ్రీకర్ తలాడిస్తూ అంగీకరిస్తాడు.
అంతలో మరో సీన్‌లో అవని, మీనాక్షి గుడికి వెళ్తారు. గుడిలో పూజలు ముగించుకుని బయటకు వస్తూ మీనాక్షి “భరత్ కూడా వస్తే బాగుండేది” అని అంటుంది. అప్పుడు అవని “వాడికి ఫోన్ చేద్దాం” అని మొబైల్ తీయబోతుంది. కానీ వెంటనే “అయ్యో, ఫోన్ గుడిలో మర్చిపోయానమ్మా” అని చెబుతూ పరుగెత్తి తిరిగి లోపలికి వెళ్తూ “నువ్వు ఇక్కడే ఉండు అమ్మా, నేను తీసుకువస్తా” అని చెబుతుంది అవని.
అవని వెళ్లిన వెంటనే అదే దారిలో చక్రధర్ వస్తాడు. మీనాక్షిని చూసి ఆగి మాట్లాడడం మొదలుపెడతాడు. “నువ్వు నీ పిల్లల కోసం రాలేదు. నేను నీ భర్తననే నిజం బయటపెట్టాలని వచ్చావు అని నాకు తెలుసు. కానీ ఆ నిజం బయటపడితే నీకేమి లాభం? నేను ఎలాంటి వాడినో నీకు బాగా తెలుసు. ఒక్క హత్య తప్ప మిగిలిన చెడ్డ పనులన్నీ చేశాను. ఆ ఒక్క పని చేయకూడదంటే నువ్వు నా కంటికి కనిపించకూడదు. ఈ ఐదు లక్షలు తీసుకుని ఎక్కడా కనిపించకుండా వెళ్లిపో” అని చెప్పి సూట్‌కేస్‌ ఓపెన్‌ చేస్తాడు.
ఇంతలో అదే దారిలో వస్తున్న పల్లవి ఆ దృశ్యాన్ని చూసి షాక్ అవుతుంది. చక్రధర్ మీనాక్షికి డబ్బు ఇస్తున్నాడని గమనించి అయోమయానికి గురవుతుంది. అప్పుడే అవని కూడా వస్తుంది. చక్రధర్ “ఐదు లక్షలే కాదు, కావాలంటే ఐదు కోట్లు కూడా ఇస్తాను. కానీ ఇక ఎప్పుడూ నా కంటికి కనిపించవద్దు” అని చెబుతాడు.
అవని దగ్గరకు వచ్చి ఆ డబ్బు చూస్తుంది. వెంటనే తన పర్స్‌లో ఉన్న నోట్లను తీసి “ఇదిగో, నువ్వు ఇచ్చిన డబ్బుకి వంద రూపాయలు కలిపి నేనే నీకు ఇస్తున్నా. కానీ నువ్వు మా ఇంటికి వచ్చి అందరి ముందు మా అమ్మను నీ భార్యగా ఒప్పుకో” అని చెబుతుంది.
చక్రధర్ “అది ఎప్పటికీ జరగదు” అని గట్టిగా చెబుతాడు. అవని “అయితే నువ్వు అనుకున్నదీ జరగదు. కానీ నువ్వు ఊహించని విషయం మాత్రం తప్పకుండా జరుగుతుంది. నీ నోటితోనే మా అమ్మ నీ భార్య అని చెప్పిస్తా” అని హెచ్చరిస్తుంది.
చక్రధర్ కోపంతో అక్కడి నుంచి వెళ్లిపోతాడు. దూరం నుంచి అన్నీ గమనించిన పల్లవి ఆశ్చర్యపోతూ “డాడీ ఎందుకు డబ్బు ఇచ్చారు? వీళ్లు ఎందుకు తిరస్కరించారు? ఈ విషయం వెనుక ఏం ఉందో తెలుసుకోవాలి” అని ఆలోచిస్తుంది.
కొద్దిసేపటికి ఆమె అవని, మీనాక్షిల దగ్గరకు వెళ్లి “మా డాడీతో మాట్లాడటానికి ఏం అవసరం? ఆయనతో ఏం మాట్లాడారు?” అని నిలదీస్తుంది. అవని మాత్రం ప్రశాంతంగా “అది నేను చెప్తే బాగోదు. మీ డాడీ చెప్పినప్పుడు మజా వస్తుంది. వెళ్లి ఆయననే అడుగు” అని చెబుతుంది.
దాంతో పల్లవి మనసులో “డాడ్ ఏదో దాస్తున్నారు. నా తరపున వచ్చి నాతోనే క్షమాపణ చెప్పించారు, ఇప్పుడు డబ్బులు ఇస్తున్నారు. వీళ్లకి డాడ్‌కి మధ్య ఏదో రహస్యం ఉంది. అది నేను కనుక్కోవాలి” అని ఆలోచిస్తుంది.
అంతలో ఇంట్లో అందరూ ఉండగా శ్రీకర్, శ్రీధర్ అపుడే ఇంట్లోకి వస్తారు. ఇంట్లో వాళ్ళు ఎక్కడ నుండి అని అడగ్గా కోర్ట్ నుండి అని అబద్దం చెప్తాడు శ్రీకర్. ఆరాధ్య “పిన్ని కూడా వచ్చిందా?” అని అడుగుతుంది. కమల్ కరెక్ట్ గా అడిగావు అని ఆరాధ్యని మెచ్చుకుంటూ అబధ్ధం సరిగా చెప్పాల్సింది అని శ్రీకర్ ని వ్యంగ్యంగా అంటాడు. శ్రేయ అన్ని మీతో చెప్పాలా అని కసురుకుంటూ లోపలకి వెళ్తుండగా శ్రీకర్ జేబు నుండి కార్ బుక్ చేసిన రెసెప్ట్ కింద పడుతుంది. అది చూసి ఆరాధ్య మీరు కార్ కొంటున్నారా బాబాయ్ అని అడుగుతుంది. అందరు ఆశ్చర్యంగా చూస్తారు .
అంతటితో ఈ ఎపిసోడ్ ముగుస్తుంది.
రేపటి ఎపిసోడ్ ప్రోమోలో ఒక అనామకుడు ఇంటికి వచ్చి ‘నేనే మీనాక్షి భర్త’ అని చెబుతాడు. దాంతో అవని షాక్ అవుతుంది. ఈ కొత్త వ్యక్తి ఎవరు?” అన్న సస్పెన్స్‌తో ఎపిసోడ్ ముగుస్తుంది.
Source inspiration: Original story from “ఇంటింటి రామాయణం” (JioHotstar). This is a personal written recap and interpretation.
