ఇంటింటి రామాయణం Nov 18th, 2025 మంగళవారం ఎపిసోడ్: చక్రధర్ మోసాన్ని తెలుసుకున్న అక్షయ్ … !!! చక్రధర్ విషయంలో అక్షయ్ కి జాగ్రత్తలు చెప్పిన రాజేశ్వరి … !!!
ఎపిసోడ్ ప్రారంభంలో అక్షయ్ ఆఫీస్‌కు బయలుదేరుతుంటే మార్గమధ్యంలో ఒక్కసారిగా తాము కోల్పోయిన ఇంటి విషయంలో కీలక వ్యక్తి అయిన చందు (చంద్ర) కనిపిస్తాడు. అతడిని చూసిన వెంటనే అక్షయ్ క్షణం కూడా ఆలోచించకుండా వెంబడిస్తాడు. చందు కారు ఎక్కబోతుంటే, బైక్‌తో వెళ్లి కారు ముందే బ్లాక్ చేసి నిలబడి, అక్షయ్ అతన్ని దిగమంటూ గట్టిగా అరుస్తాడు. చందు దిగకుండా, “ఏంట్రా బైక్ కారుకి అడ్డంగా పెట్టావు? నువ్వెవడ్రా?” అని ఆగ్రహంతో అడుగుతాడు.
అక్షయ్ మాత్రం ఆ మాటలకు లెక్క చేయకుండా అతని కాలర్ పట్టుకుని కారు బయటకు లాగేస్తాడు. “నా భార్యను దొంగ సంతకాలు పెట్టించుకుని మా ఇంటిని దోచుకున్నావ్! గుర్తులేదా?” అని అడిగినా, చందు తప్పించుకునే సమాధానమే ఇస్తాడు. అక్షయ్ మరింత కోపంతో చెంపలు పగిలేలా వాయిస్తూ, “నిజం చెప్పకపోతే ఇప్పుడే నిన్ను చంపేస్తా!” అని బెదిరిస్తాడు. ఒక పెద్ద రాయి ఎత్తుకుని చందు మీదికి పోతుంటే, భయపడ్డ చందు చివరికి నిజం ఒప్పుకుంటాడు.
చందు, అక్షయ్ తో “మీ మామయ్యే నన్ను బెదిరించాడు. అవని గారి సంతకాలను ఫోర్జరీ చేయించి ఇంటిని లాగేసుకున్నాడు. నేను ఏమి చెయ్యలేదు. మీ మామ చక్రధర్ చేయించాడు” అని నిజం అంతా చెప్పేస్తాడు. అది వినగానే ఆవేశంతో ఊగిపోతూ అక్షయ్ నేరుగా చక్రధర్ ఇంటికి వెళ్తాడు. గేట్లను తన్ని లోపలికి దూసుకెళ్లి అతని కాలర్ పట్టుకుని నిలదీస్తాడు. అక్షయ్ చాలా కోపంతో “నువ్వు మంచివాడివి కాదని తెలుసు, కానీ ఇంత దుర్మార్గుడివని అనుకోలేదు. నా భార్య సంతకాలను ఫోర్జరీ చేసి మా ఇంటిని లాక్కుంటావా?” అని అంటాడు.
చక్రధర్ కూడా కోపంగా అక్షయ్ కాలర్ పట్టుకుని “ఎం మాట్లాడుతున్నావ్ రా? నా ఇంటికి వచ్చి నన్నే బెదిరిస్తున్నావు?” అని గొడవ పడతాడు. అక్షయ్ వెంటనే చంద్ర నిజం చెప్పాడని అరిచి చెప్తాడు. చక్రధర్ మాత్రం దాన్ని పూర్తిగా తిరస్కరిస్తూ, “వాడెవడో ఏదో చెప్పాడని నమ్మేస్తావా? నన్ను నిందించడానికి నీ దగ్గర ఏమైనా ఆధారాలు ఉన్నాయా? ఉంటే చూపించు!” అని సవాలు చేస్తాడు.
అక్షయ్ “నువ్వు ఏమి చెయ్యకపోతే వాడు నీ పేరు ఎందుకు చెప్తాడు” అని చక్రధర్ ని నిలదీస్తాడు. చక్రధర్ “నాకు బిజినెస్ లో చాలా మంది శత్రువులు ఉంటారు వాళ్ళు అంతా నా పేరు చెప్తే నువ్వు నిజాలు తెలుసుకోకుండా ఇలా ఇష్టం వచ్చినట్టు ప్రవర్తిస్తావా?” అని అరుస్తాడు. అక్షయ్ కోపంతో గట్టిగా అరుస్తూ “సరే… ఆధారాలతో వస్తాను. అప్పుడు నిన్ను అడగడానికి రాను నీ అంతు తేల్చడానికి వస్తాను” అని వార్నింగ్ ఇచ్చి వెళ్లిపోతాడు.
ఇంటికి వెళ్లగానే అందర్నీ బయటకు పిలిచి, “మన ఇల్లు పోవడానికి కారణం తెలిసింది. అది బయట ఎవరో కాదు మన వాళ్ళే అనుకున్న పల్లవి నాన్న చక్రధర్!” అని అరిచి చెప్తాడు. అది విన్న అందరు షాక్ అవుతారు. నీకు ఎలా తెలుసు అని ఇంట్లో వాళ్ళు అడుగుతారు.
అక్షయ్ జరిగింది చెప్తూ” అవనికి లోన్ ఇచ్చిన వ్యక్తి స్పష్టంగా చక్రధర్ పేరే చెప్పాడు” అని చెప్తాడు. కమల్ వెంటనే ఆవేశంగా “అయితే వాడిని కాలర్ పట్టుకుని లాగి ఆ దుర్మార్గుడ్ని ఈడ్చుకొద్దాం” అని అంటాడు. కానీ అక్షయ్ జరిగిన విషయం చెప్తూ “చక్రధర్ ఆధారాలు కావాలంటూ తప్పించుకున్నాడు” అని చెప్తాడు.
అవని కోపంతో, “అతను చేయకపోతే చక్రధర్ బాబాయి పేరు చెప్పే అవసరం ఏముంది చేసాడు కాబట్టే పేరు చెప్పాడన్నమాట” అని అంటుంది. పల్లవి, భయపడుతూ, “డాడ్ పేరు మాత్రమే చెప్పాడా? నా పేరు కూడా చెప్పాడా?” అని మనసులో అనుకుంటుంది. అంతలో రాజేంద్ర ప్రసాద్ కూడా “వాడు కంపెనీ విషయాల్లో నిజాయితీగా ఉండదు అనుకున్న కానీ అయినా వాళ్ళకి కూడా ఇంత అన్యాయం చేసే నీచుడు అనుకోలేదు ” అని కోపంగా అంటాడు.
అంతలో అవని “మన కంపెనీ నష్టాల పాలు అవడానికి అతనే కారణం. నేను శ్రీకర్ ప్రయత్నించి కూడా సరైన సాక్ష్యాలు సంపాదించలేకపోయాము అందుకే అతని గుట్టు బయట పెట్టలేకపోయాము” అని చెప్పగానే అందరు షాక్ అయిపోతారు.
అక్షయ్ అవని పట్ల తన తప్పు అర్థం చేసుకుని, పల్లవితో “ఇదంతా చేసింది మీ నాన్న అని తెలియక నేను నా భార్యని అనుమానించాను, తన మీద నిందలు వేసాను. తనని దూరం పెట్టాను. ఇప్పటికి నిజం తెలిసింది. ఇప్పటినుంచి ఆధారాలు వెతికే పనిలో పడతాను. నీ నాన్నని దేవుడూ కూడా కాపాడలేడు” అని అంటాడు. కమల్ ఇంకా రెచ్చిపోతూ, “ఇంకా ఆధారాలు ఏంటన్నయ్యా? వాడిని లాకొచ్చేద్దాం” అని అంటాడు.
అంతలో పల్లవి “ఏం మాట్లాడుతున్నారు? మా నాన్నకి కోట్లు ఉన్నాయి. మీ ఇల్లుతో మా నాన్నకి ఏం అవసరం? మా నాన్న చాలా స్టేటస్ ఉన్న మనిషి. ఆయన ఎందుకు ఇలాంటి పనులు చేస్తాడు. మీరు ఆధారాలు లేకుండా మా నాన్న మీద నిందలేసి ఇష్టం వచ్చినట్టు మాట్లాడితే నేను ఊరుకోను” అని అంటుంది.
వెంటనే అక్షయ్ “మీ నాన్న లాంటి వల్లే అక్రమంగా సంపాదిస్తారు. లేని వాడు ఎవడు ఇలాంటి పనులు చేయదు. ఉన్న వాడే ఇంక దోచుకుంటూ ఉంటాడు. అయినా మీ నాన్న ఎలాంటి వాడో మాకు అందరికి బాగా తెలుసు” అని అంటాడు. ఇంకా కమల్ “మీ నాన్న అని రుజువు అయితే నీకు మీ నాన్నకి ఇద్దరికీ గట్టిగా బుడ్డి చెప్తాము” అని అంటాడు.
భయంతో పల్లవి పక్కకు వెళ్లి చక్రధర్‌కి కాల్ చేస్తుంది. చక్రధర్ మాత్రం నిమ్మళంగా “నువ్వు టెన్షన్ పడకు… నేను చూసుకుంటా” అని చెబుతాడు. పల్లవి మాత్రం తండ్రి ఇంత సైలెంట్‌గా ఉండటమే ఆమెకే భయం కలిగిస్తుంది.
ఇదిలా ఉండగా, చక్రధర్ భార్య రాజేశ్వరి రహస్యంగా అక్షయ్ ను కలిసి మాట్లాడుతుంది. రాజేశ్వరి అక్షయ్ తో “నేను ఇవాళ నువ్వు ఆయనతో మాట్లాడటం నేను చూసాను. తప్పు అని అనుకోవడం లేదు. నాకు ఆయన గురించి బాగా తెలుసు. ఇన్ని సంవత్సరాలు దగ్గర ఉండి చూసాను. అతడు దుర్మార్గుడు అని తెలియక ప్రేమలో పొరబడి పెళ్లి చేసుకున్నా. ఇపుడు నేను నీ మంచి కోసమే చెప్తున్నా. ఎలాంటి సాక్ష్యం లేకుండా మాత్రం నువ్వు మళ్లీ ఇంకోసారి ఆవేశపడొద్దు. నా భర్త నీ మీద పోలీస్ కేసు పెట్టె అవకాశం కూడా ఉంది. ఎం చేసిన సమస్యా పెద్దది కాకుండా పరిష్కారం అయ్యేలా చెయ్యి. ఆధారాలు దొరికి నా భర్త తప్పు చేసాడు అని తెలిస్తే నేనే క్షమించను” అని చెప్తుంది. అక్షయ్ అది విని సరే అని చెప్పి తన అత్త మాటలకి ఆమెని చూసి గర్వపడతాడు.
రాత్రికి గదిలో అక్షయ్ ఒంటరిగా కూర్చుని జరిగిన దాని గురించి ఆలోచిస్తుండగా అవని వస్తుంది. వచ్చి “దాని గురించి అలోచించి ఆవేశపడొద్దు. మనం కలిసి ఆధారాలు సేకరిద్దాం” అని ధైర్యం చెప్తుంది. అక్షయ్ తాను దాని గురించి ఆలోచించడం లేదు అని ఆఫీసులో తన పనికి ఇంక్రిమెంట్ వచ్చింది అని చెప్తాడు. అది విని అవని మరి ఇంట్లో అందరికి ఏమైనా గిఫ్టుగా తేవలసింది అని అంటుంది. తెచ్చాను అని చెప్పి అక్షయ్ అవని కళ్ళు మూసుకోమని చెప్పి ఆ గిఫ్ట్ ని అవని చేతుల్లో పెడతాడు.
అంతటితో ఈ ఎపిసోడ్ ముగుస్తుంది.
Source inspiration: Original story from “ఇంటింటి రామాయణం” (JioHotstar). This is a personal written recap and interpretation.
