ఇంటింటి రామాయణం Nov 20th, 2025 గురువారం ఎపిసోడ్: అందరి ముందు మీనాక్షిని అవమానించిన పల్లవి …!!! మీనాక్షి కి అండగా అవని, అక్షయ్ …!!!
ఎపిసోడ్ ప్రారంభంలో పల్లవి బాగా టెన్షన్‌తో చక్రధర్ దగ్గరకు వచ్చి “డాడ్ ఈ ఇంటిని లాక్కున్నది మనమే అన్న నిజం బయటపడిపోతుంది. కమల్ నన్ను, నిన్ను చంపేస్తాననేంతగా భగ్గుమంటున్నాడు. వాళ్లు ఏ ఆధారాలు వెతుకుతున్నారో అవి దొరికితే మనల్ని వదిలిపెట్టరు. ఏదో చేసి వాళ్లకి దొరక్కుండా తప్పించుకోవాలి డాడ్,” అని భయంతో చెబుతుంది.
చక్రధర్ మాత్రం నిదానంగా “నా గురించి టెన్షన్ పడకు. నా జాగ్రత్తలో నేను ఉంటాను,” అని ధైర్యం చెప్తాడు. కానీ పల్లవి ఇంకా భయపడుతూ, “ఏమో డాడ్. కమల్, అక్షయ్ అవనిలు ఖచ్చితంగా సాక్ష్యాలు సంపాదిస్తారు డాడ్. నువ్వేం చేసినా నా పేరు మాత్రం బయటకు రాకూడదు. ఆ ఫైనాన్షియర్ ని నాలుగు దెబ్బల కొట్టగానే మీ పేరు బయటపెట్టేశాడు. ఇంకో నాలుగు వేస్తే నా పేరు కూడా చెబుతాడు డాడ్! వాడు వాళ్లకి దొరికితే నిజం చెప్పేస్తాడు. వాడ్ని ఏదోటి చేయాలి డాడ్,” అని చెబుతుంది.
చక్రధర్ కోపంగా “అతను నా గురించి చెప్పినప్పటి నుంచే నేను వాడ్ని పట్టుకునే పనిలో ఉన్నాను. నేను ఏమైనా చేస్తాను అనే భయంతో ఫోన్ కూడా ఆపేశాడు. నా మనుషులు వాడి కోసం వెతుకుతున్నారు. వాడు నా చేతిలో పడకుండా తప్పించుకోలేడు. వాడ్ని ఎం చేయాలో నాకు బాగా తెలుసు. నా నిజాలు బయటపడితే, నేను జైలుకి వెళ్లే అవసరం వస్తే ఆ కుటుంబం మొత్తాన్ని నాశనం చేస్తా. అప్పటి వరకూ నిద్రపోను,” అని అంటాడు.
పల్లవి అనుమానంతో “డాడ్ నేను మీనాక్షిని ఆమె భర్త ఎవరో అడిగి అవమానించాను కదా ఆ మీనాక్షే అవని, అక్షయ్‌లను రెచ్చగొడుతుందేమో అనిపిస్తుంది.” అని అంటుంది. చక్రధర్ వెంటనే “ముందుగా ఆ మీనాక్షిని ఆ ఇంట్లో నుంచి బయటకు పంపించు. బయటికి వెళ్తే తిరిగి రాకుండా నేను చూసుకుంటాను.” అని చెప్తాడు. సరే అని పల్లవి అక్కడ నుండి బయలుదేరుతుంది.
అంతలో ఇంట్లో కమల్ బుకింగ్స్ ఎం లేవు ఇపుడు అని హాల్ లో కూర్చుని రాజేంద్ర ప్రసాద్ తో మాట్లాడుతూ ఉంటాడు. మీనాక్షి వంట గదిలో పని చేస్తూ ఉంటుంది. పార్వతి ప్రేమగా, “అయ్యో వదినగారూ ఇవన్నీ మీకెందుకు?” అని అడుగుతుంటే, అవని–అక్షయ్ అపుడే బయట నుంచి వస్తారు. వాళ్ళని ఎక్కడ నుండి వస్తున్నారు అని ఇంట్లో వాళ్ళు అడగడంతో వాళ్ళిద్దరూ “ఆ ఫైనాన్షియర్ కోసం వెళ్ళాము. కానీ వాడు తప్పించుకున్నాడు! వాడు చక్రధర్ బాబాయి పేరు ఎందుకు చెప్పాడో తెలుసుకోవాలనే వెళ్లాం, కానీ ఇంటిని ఖాళీ చేసి పారిపోయాడు.” అని చెప్తుంది అవని.
ఇంతలో కొంతమంది పొరుగింటి వాళ్ళు ఇంట్లోకి వచ్చి, “మా ఇంట్లో సౌభాగ్య లక్ష్మీ వ్రతం చేస్తున్నాం మీ కోడళ్లు తప్పకుండా రావాలి” అని బొట్టు పెట్టి పిలుస్తుంటారు. అంతలో మీనాక్షిని చూసిన ఒకావిడ “ఈమె ఎవరు?” అని అడుగుతుంది. పార్వతి నవ్వుతూ, “మా వదినగారు, అవని అమ్మగారు” అని చెప్పగానే, వారు “మీలాంటి పెద్ద ముతైదువల ఆశీర్వాదం మాకు కావాలి” అని మీనాక్షికీ బొట్టు పెట్టబోతుంటారు.
అప్పుడే బయట నుండి వచ్చిన పల్లవి వారిని ఆపేస్తుంది. పల్లవి “ఆగండి! ఇది సౌభాగ్య లక్ష్మి వ్రతం అన్నారు కదా. అంటే భర్తల కోసం చేసే వ్రతం కదా? కానీ ఈవిడ భర్త ఎవరో మాకు తెలియదు! ఎక్కడున్నాడు, ఏమి చేస్తున్నాడు తెలియదు! మేము అడిగిన ఆవిడా మాకు ఎం చెప్పడం లేదు. తన భర్త గురించి చెప్పుకోలేని వాళ్లు వస్తే అపచారమే కదా? ఆశీర్వాదం కాదు కదా” అని నొచ్చుకునేలా మాట్లాడుతుంది.
ఆ మాటలతో అవని కోపంతో గట్టిగా “వాళ్ళు వచ్చింది పిలవడానికి, భర్తల గురించి అడగడానికి. నీ చెంప పగలకొట్టినా నీకు బుద్ధి రాలేదు పల్లవి! క్షమాపణ చెప్పించుకున్న తరువాత కూడా సిగ్గులేదా?” అని అరుస్తుంది. పల్లవి మాత్రం వెనక్కి తగ్గకుండా “ఇందులో తప్పేం ఉంది? మీ నాన్న ఎవరో చెప్పలేనప్పుడు నేను అడగడం తప్పా? పెద్ద వాళ్లూ నేను అడిగింది తప్పా?” అని వచ్చిన వాళ్ళ వైపు చూస్తుంది. వారంతా కూడా, “తప్పు కాదు భర్త గురించి చెప్పుకోలేని వాళ్లు వ్రతానికి రావడం మాకు కూడా మంచిది కాదు,” అని అంటారు.
పార్వతి వెంటనే వచ్చిన వారితో “బయట వాళ్లకి చెప్పాల్సిన అవసరం లేదు. మీరు వెళ్లండి” అని పంపేస్తుంది. పార్వతి మీనాక్షితో ప్రేమగా “వదినా పల్లవి అడిగిన దాంట్లో తప్పేం లేదు. బయట వాళ్లు ఇలాంటి విషయాల్లో ఎపుడు అయినా ఇలానే ఇబ్బంది పెడతారు. ఇపుడు పల్లవి అడిగిందే వ్రతంలో ఎవరైనా అడిగితే ఏం చేసేవారు? ఇప్పుడు నేనే అడుగుతున్నా మీ భర్త ఉన్నారా?” అని అడుగుతుంది.
మీనాక్షి కన్నీళ్లతో తల వంచి “ఉన్నారు” అని తలాడిస్తుంది. “ఉంటే చెప్పడానికి ఏమైంది? మీకు వచ్చిన ఇబ్బంది ఏమిటి?” అని పార్వతి అడుగుతుండగా, మీనాక్షి బోరున ఏడుస్తూ వెళ్లిపోతుంది. పార్వతి అవనితో “మీ అమ్మగారు చెప్పడానికి ఇబ్బంది పడుతున్నారు నేను అర్ధం చేసుకోగలను. కానీ నువ్వు మా ఇంటి పెద్ద కోడలివి ఎవరైనా ఇలా మాట్లాడటం మాకు కూడాఆ ఇబ్బందే కదా. నువ్వు అయినా చెప్పు” అని అంటుంది.
అవని కూడా బాధగా తల్లి వద్దకు వచ్చి ఓదార్చుతుంది. మీనాక్షి బాధతో, “నాకోసం కాదు అవని నీకోసం బాధపడుతున్నా. నా వల్ల నువ్వు అవమానాలు పడటం నేను తట్టుకోలేను. నేను ఇక్కడ ఉండలేను వెళ్లిపోతా,” అంటుంది. అవని వెంటనే చేతులు పట్టుకుని, “నువ్వు వెళ్లిపోతే భర్త ఎవరో చెప్పుకోలేని తప్పు చేసినదానిలా మిగిలిపోతావ్ అమ్మా. ఇంకా నువ్వు బయటికి వెళ్లితే నీ భర్తే నిన్ను చంపేస్తాడు!” అంటుంది. మీనాక్షి కన్నీళ్లతో “నన్ను చంపేస్తాడనే భయం లేదు. కానీ మిమ్మల్ని ఏం చేస్తాడో అని భయపడుతున్నా. ఇక దాచలేను ఇప్పుడు నిజం చెబుతాను. మీ నాన్న ఎవరో అందరికీ చెబుతాను!” అని అంటుంది. కానీ వెంటనే అవని షాక్‌తో ఆపేస్తుంది.
“అమ్మా చక్రధర్ నీ భర్త అంటే ఎవరూ నమ్మరు. మన దగ్గర నువ్వు అతని భార్యవి అని మేము అతని పిల్లలు అని ఏమి ఆధారాలు లేవు. కోర్టులో కూడా మన మాటలు నమ్మరు. ఆయనే తన నోటితో అంగీకరించాలి. అందుకే నేను ఇప్పటివరకు నాన్న పేరు ఎవరికీ చెప్పలేదు. అతనితోనే నేను నిజం చెప్పిస్తా. అప్పటి వరకూ నువ్వు కొంచం ఓపిక పట్టమ్మా,” అని బాధతో చెబుతుంది అవని.
ఇంతలో అక్షయ్ లోపలికి వస్తాడు. అక్షయ్ వాళ్ళ మాటలు విన్నాడు ఏమో అని తల్లీకూతుళ్లు కంగారుపడతారు. అతను లోపలికి వచ్చి, మీనాక్షితో “అత్తయ్యా మీరు ఎంత బాధపడుతున్నారో నాకు అర్థమవుతుంది. పల్లవి అంతే అవతల వాళ్ళని బాధ పెట్టి సంతోషపడుతుంది. పట్టించుకోకండి. అయినా కూడా బయట వాళ్లకి మీ గురించి మాట్లాడే అవకాశం మనం ఇవ్వకూడదు. మీ భర్త ఎవరో చెప్పడమే మంచిది. చెప్పడానికి ఎందుకు భయపడుతున్నారు? కారణం నాతో చెప్పండి. మీకు ఎప్పుడు చెప్పాలి అనిపిస్తే అప్పుడు చెప్పండి. మీకోసం నేను ఉన్నాను. మీ అల్లుడిగా ఉన్నాను అని గుర్తు పెట్టుకోండి” అని చెప్పి అక్షయ్ వెళ్లిపోతాడు.
అంతలో గదిలోకి కమల్ బిర్యానీ ప్యాకెట్ తీసుకుని వస్తాడు. ఆ వాసనకి పల్లవి ఎగిరి గంతులేస్తూ కమల్ ని కాకా పడుతూ “ఆ పప్పు పచ్చడై తినలేక మధ్యలోనే వచ్చేసాను బావ. థాంక్స్ బావ బిర్యానీ తెచ్చావు. వేడిగా తింటేనే బాగుంటుంది” అని అనడంతో ప్లేట్ తీసుకు రమ్మని చెప్తాడు కమల్. ప్లేట్ తీసుకు వచ్చి పల్లవి ఆశగా ఎదురు చూస్తుంటే కమల్ ఒక్కడే కూర్చుని తింటూ ఉంటాడు.
అంతటితో ఈ ఎపిసోడ్ ముగుస్తుంది.
Source inspiration: Original story from “ఇంటింటి రామాయణం” (JioHotstar). This is a personal written recap and interpretation
