ఇంటింటి రామాయణం Nov 22nd, 2025 శనివారం ఎపిసోడ్: ఇంట్లో మీనాక్షిని తప్పుగా చూపిస్తున్న పల్లవి …!!! మీనాక్షిని మాటలతో బాధపెట్టిన భానుమతి, పార్వతి …!!!
ఎపిసోడ్ ప్రారంభంలో పల్లవి దొంగ కన్నీళ్లతో పరిగెత్తుకుంటూ వెళ్లి భానుమతి కాళ్లపై పడుతూ “అవని నన్ను కొట్టింది అమ్మమ్మ” అని ఏడుస్తుంది. భానుమతి కారణం అడిగితే, పల్లవి తాను అమాయకురాలు అన్నట్టు చూపించుకునే ప్రయత్నంలో “వాళ్ళ అమ్మని తన భర్త గురించి అడిగాను అని కొట్టింది. చిన్నప్పటి నుంచి అమ్మ నాన్న నన్ను ఎంత ప్రేమగా పెంచారు, ఏది అడిగితే అది ఇచ్చి బాగా గారాబంగా చూసుకున్నారు. ఆ ప్రేమ వల్లే నాకు కొంచెం గర్వం వచ్చి ఉండొచ్చు. కానీ అందుకు నేను చెడ్డదాన్ని అయిపోతానా” అంటూ, భానుమతి జాలిపడేలా మాట్లాడుతూ “నేను నీ కూతురు కూతురిని. ఈ ఇంట్లో నాకు నువ్వు తప్ప మరెవరూ లేరు” అని ఏడుస్తూ చెప్పడంతో భానుమతి కూడా ఏమి మాట్లాడలేకపోతుంది.
అక్కడితో ఆగకుండా “అవనికి తండ్రి ఎవరో తెలియదు. అదే విషయం నేను వాళ్ల అమ్మని అడగడం తప్పా? నీ సొంత మనవరాలైన నన్ను కొట్టడం చూస్తూ ఎలా నిశ్శబ్దంగా ఉంటున్నావు? నీకు నా కంటే అవనినే ఎక్కువయిపోయిందా? నా మీద ప్రేమ ఉంటే నువ్వు నావైపు మాట్లాడేదానివి. అవని కొడుతుంటే అడిగేదానివి. అవని అలా నా మీద రెచ్చిపోయేది కాదు” అంటూ, అవనిపై భానుమతిలో అనుమానం వచ్చేలా మాట్లాడుతుంది.
ఇంకా మాట్లాడుతూ “ఆ మీనాక్షికి భర్త ఉన్నాడని చెప్తుంది కానీ మెడలో తాళిబొట్టు లేకపోవడం, భర్త ఎవరో చెప్పకపోవడం ఇవి అన్నీ చూస్తుంటే నీకు ఏమి అనుమానం రావడం లేదా? అంటే అవని అక్రమ సంతానం కాదా?” అని అంటుంది. “మరి ఇలాంటి వాళ్లను మన ఇంట్లో ఉంచితే మన పరువు పోదా? ఇది అత్తయ్యకి తెలియడం లేదు నువ్వు అయిన చెప్పాలి కదా” అని భానుమతిని బాగా రెచ్చగొట్టి పార్వతి దగ్గరికి వెళ్ళడానికి ఉసిగొల్పుతుంది.
ఈ మాటలు విన్న భానుమతి పల్లవి మాటల్ని నిజంలా నమ్మి ఆలోచనలో పడి “నువ్వు అన్నది నిజమే” అని అనడంతో పల్లవి మనసులో సంతోషిస్తుంది. వెంటనే భానుమతి పార్వతి దగ్గరకు వెళ్లి అదే మాటల్ని మళ్లీ చెప్తూ, మీనాక్షి మెడలో తాళిబొట్టు లేకపోవడం, ఎన్ని సార్లు అడిగిన తన భర్త గురించి చెప్పకుండా ఉండడం అనుమానాస్పదమని, అలాంటి వాళ్లను ఇంట్లో ఉంచడం మంచిది కాదని ఒత్తిడి చేయడం మొదలుపెడుతుంది. నాకు వచ్చిన ఆలోచన నీకు ఎందుకు రావడం లేదు ఇపుడు అయిన అలోచించి మీనాక్షి విషయంలో ఒక నిర్ణయం తీసుకోవాలి లేదంటే మనం కూడా అలాంటి వాళ్ళమే అనుకుంటారు ఇరుగు పొరుగు అని చెప్పి అక్కడ నుండి వెళ్ళిపోతుంది భానుమతి. పార్వతి కూడా ఆలోచనలో పడటంతో, దూరంగా చూస్తున్న పల్లవి మనసులోనే, “పడ్డారు బుట్టలో” అని సంతోషిస్తుంది.
ఇంకోవైపు అవని, అక్షయ్‌లు పోలీస్ స్టేషన్‌కి వెళ్లడానికి రెడీ అవుతుండగా ఆరాధ్య వచ్చి ఎక్కడికి అని అడుగుతుంది. ఒక ముఖ్యమైన పని మీద వెళ్తున్నాము అని అవని చెప్పడంతో అయితే ఆ పని మంచిగా జరుగుతుంది అని కోరుకుంటుంది ఆరాధ్య. సరే అని ఇంట్లో వాళ్ళకి చెప్పి బయలుదేరుతుండగా అప్పుడే ఎదురుగా మీనాక్షి రావడంతో భానుమతి ఆపేసి, “బయటికి వెళ్ళేటపుడు ఎవరు పడితే వాళ్లు ఎదురు రాకూడదు. ఎవరు ఎదురు వచ్చారో చూసుకుని వెళ్ళాలి” అని అనడంతో అవని నవ్వుతూ “మా అమ్మే కదా ఎదురు వచ్చింది” అని చెప్పినా, భానుమతి “నేను నా కొడుకు బయటికి వెళ్లినా ఎదురు వెళ్ళను ఎందుకు అంటే నేను భర్త లేని విధవరాలు కాబట్టి. అలానే మీ అమ్మకి కూడా భర్త లేడు కదా” అని తన పాత నమ్మకాన్ని బయటపెడుతూ దాన్ని అపశకునంగా పేర్కొంటూ, కాసేపు వెళ్లొద్దని అంటుంది.
అప్పుడే పల్లవి అక్కడికి వచ్చి వాళ్ళని పోలీస్ స్టేషన్ కి వెళ్లకుండా ఆపాలి అనే ఉద్దేశ్యంతో “అమ్మమ్మ చెప్తుంది కదా ఇపుడే వెళ్లకపోతే ఏమైంది మళ్లీ వెళ్లొచ్చులే” అని అంటుంది. అవని తనని మాట్లాడొద్దని చెప్పడంతో, శ్రియ కూడా పల్లవికి మద్దతుగా మాట్లాడుతుంది. అవని మాత్రం శాంతంగా స్పందిస్తూ, “తల్లి ఎప్పుడు చెడు కోరుకోదు. అమ్మ ఎదురు రావడం అదృష్టమే. అయిన ఇవి అన్నీ నమ్మే అవసరం లేదు” అని చెబుతుంది. కానీ పల్లవి “ఇంట్లో ఎప్పుడు మా ఎదురు మంచి కాదని నిన్నే ఎదురు రమ్మని చెప్తారు కదా. అంటే మేము చెడ్డ నువ్వు మంచి అనే కదా. మరి మీ అమ్మ ఎదురు మంచిదెలా అవుతుంది?” అని వాదిస్తుంది. అక్షయ్ పట్టించుకోకుండా మాకు లేట్ అవుతుంది వెళ్తాము అని అంటాడు.
వెంటనే పార్వతి కలగచేసుకుని పెద్దవాళ్ల నమ్మకాలు ఏదో కారణంతోనే ఉన్నాయని గుర్తు చేస్తూ, కొంత సేపు ఆగమని చెప్పగా, రాజేంద్ర ప్రసాద్ మాత్రం ముందుకు వచ్చి “నమ్మకాలు ఉండటంలో తప్పులేదు, కానీ అవి ఎదుటివాళ్లను అవమానించేలా, అడ్డుకునేలా మారితే అది నమ్మకం కాదు, మూర్ఖత్వం అవుతుంది. మనసు మంచిదిగా ఉంటే ఏదీ అపశకునం కాదు. మీరు బయల్దేరండి” అని స్పష్టం చేస్తాడు. అతని మాటలు నచ్చకపోయినా పార్వతి, భానుమతి సైలెంట్ అవుతారు. పల్లవి మాత్రం ప్లాన్ ఫెయిల్ అయింది అని చిరాకుపడుతుంది.
అవని, అక్షయ్‌లు బయటికి వెళ్తారు. పల్లవి చక్రధర్ కి ఫోన్ చేసి విషయం చెప్పడంతో చక్రధర్ రౌడీలని పురమాయించి అవని, అక్షయ్ లను అడ్డుకోమని చెప్తాడు. అవని, అక్షయ్ లు స్కూటీ మీద వెళ్తుండగా రౌడీలు ఎదురు వచ్చి గుద్దుతారు. అక్షయ్, అవని కిందపడతారు. వాళ్ళని రౌడీలు చుట్టుముడతారు.
అక్కడితో ఈరోజు ఎపిసోడ్ ముగుస్తుంది.
Source inspiration: Original story from “ఇంటింటి రామాయణం” (JioHotstar). This is a personal written recap and interpretation
