కార్తీక దీపం Nov 6th, 2025 గురువారం ఎపిసోడ్ : సీఈఓ పదవి కోసం జ్యోత్స్న పాట్లు … దృఢ నిర్ణయంతో ఇంటి సభ్యులు … !!!
శివన్నారాయణని కాకా పడుతున్న పారిజాతం
పారిజాతం, పాలు తీసుకుని శివన్నారాయణ గదిలోకి వస్తుంది. శివన్నారాయణ ఆశ్చర్యంగా ఆమెను చూస్తూ “నేను పాలు అడగలేదే” అంటాడు. దానికి పారిజాతం వినయంగా “మీరు అన్నీ అడగాలా అండీ? మీకు సేవ చేసే అవకాశం దొరకడం నా అదృష్టం” అని చెబుతుంది.
శివన్నారాయణ కాస్త గంభీరంగా “దయచేసి ‘సేవ’ అనే పదం నా దగ్గర వాడకు పారిజాతం. ఆ మాట వింటే నాకు మళ్లీ గతంలోని ఆ చేదు జ్ఞాపకం ఆ దిక్కుమాలిన రాత్రి గుర్తు వస్తుంది ” అని అంటాడు. పారిజాతం కొంచెం సిగ్గుపడుతూ “అది మధురమైన జ్ఞాపకం అండీ” అని అంటుంది. శివన్నారాయణ “అవును, నా జీవితాన్ని మార్చిన రాత్రి అదే” అని సమాధానమిస్తాడు.
పారిజాతం పొగడ్తలు కొనసాగిస్తూ “మీరు ఎంతో గొప్ప వ్యక్తి. ఉత్తమ తండ్రి, ఉత్తమ తాత, ఉత్తమ యజమాని. దశరథ మీ కుడి చేయి అయితే, సుమిత్ర ఈ ఇంటికి వెలుగు” అని చెబుతుంది. శివన్నారాయణ వ్యంగ్యంగా “అంతా బాగుంది కానీ నీ చేతిలో రెండు చిడతలు ఉంటే, నీ మాటలకు సరిగ్గా సరిపోయేది” అని అంటాడు. దానికి పారిజాతం కొంచెం కోపంగా “అంటే నేను భజన చేస్తున్నానా అంటారా?” అని అడుగుతుంది. శివన్నారాయణ “ఏదో అడగాలని వచ్చి ఏదో మాట్లాడుతున్నావు. నువ్వు అడగేది అడిగేస్తే, నేను నిద్ర పోతాను” అని అంటాడు.
పారిజాతం వినయంగా “అయ్యో మీరు పడుకోండి, నేను మీ కాళ్లు నొక్కుతాను” అని చెబుతుంది. శివన్నారాయణ వెంటనే “వద్దు పారిజాతం. నువ్వు కాళ్లు నొక్కుతాను అంటున్నావు అంటే ఎదో గట్టిగానే అడగాలని ప్లాన్ చేసావు. ఏంటో అది అడుగు” అని అంటాడు.
జ్యోత్స్నని CEOగా రిసైన్ చేయమని చెప్పిన శివన్నారాయణ
శివన్నారాయణ కాస్త ఆలోచనగా చూస్తాడు. జ్యోత్స్న బయట దాగి వింటూ ఆనందంగా “తాత ఏమంటాడో చూడాలి” అనుకుంటుంది.
పారిజాతం జాగ్రత్తగా మాట మొదలుపెడుతుంది — “సుమిత్ర ఇంటికి వచ్చేసింది, దశరథ సుమిత్ర కలవడంతో ఇంట్లో అందరూ సంతోషంగా ఉన్నారండి. కానీ ఒకరు మాత్రం సంతోషంగా లేరు.”
శివన్నారాయణ ప్రశ్నిస్తాడు, “ఎవరో ఆ సంతోషంగా లేని మనిషి?” పారిజాతం శివన్నారాయణతో — “మీరు ఇంటి పరువు, మర్యాద గురించి ఎంతగా ఆలోచిస్తారో నాకు తెలుసండి. మన కుటుంబంలో ఎవరి గౌరవం పోయినా, మీ గౌరవం పోయినట్టే కదండీ . అందుకే రేపటి బోర్డ్ మీటింగ్‌లో జ్యోత్స్ననే CEOగా కొనసాగిస్తున్నామని చెప్పండి” అని అంటుంది.
శివన్నారాయణ పారిజాతం వైపు తిరిగి “ఈ విషయం జ్యోత్స్నే నాతో నేరుగా చెప్పొచ్చు కదా?” అని అడుగుతాడు. పారిజాతం సమాధానమిస్తూ “పాపమండి, ఆ పిచ్చి పిల్ల గదిలో కూర్చుని ఏడుస్తూ ఉంది. నేను దానిని ఓదార్చి, ‘నీ తాత నీకు అన్యాయం చేయడు, నేను వెళ్లి మాట్లాడతాను’ అని చెప్పానండి” అని వివరిస్తుంది. శివన్నారాయణ సీరియస్‌గా “అవునా? పాపం జ్యోత్స్నకు నీ మీద నమ్మకం లేనట్టుంది. నమ్మకం ఉంటే తాను నీ వెనుక వచ్చి మన మాటలు వినేది కాదు” అని అంటాడు.
జ్యోత్స్న అది విని దిగులుగా అక్కడి నుంచి వెళ్లిపోవడానికి ప్రయత్నిస్తుంది. శివన్నారాయణ “జ్యోత్స్నా, ఇలారా!” అని పిలుస్తాడు. పారిజాతం కంగారుగా “అది ఇక్కడ ఎందుకు ఉంటుందండి” అని తడబడుతుంది. శివన్నారాయణ జ్యో వైపు చూపిస్తూ “అదిగో అక్కడ నిలబడి అన్నీ విన్నది” అని చెబుతాడు. పారిజాతం షాక్ అవుతుంది. జ్యోత్స్నా మెల్లగా “తాతా, నేను ఊరికే ఇలా వచ్చాను” అని అంటుంది.
శివన్నారాయణ “నువ్వు ఎలా వచ్చినా, ఎవరితో అడిగించినా సరే, ముందుగా సీఈవో పదవికి రాజీనామా చేసి పెళ్లి చేసుకో” అని చెబుతాడు. జ్యో షాక్ అయి శివన్నారాయణ వైపు చూస్తుంది. పారిజాతం శివన్నారాయణ వైపు తిరిగి “పెళ్లికి, సీఈవో పదవికి సంబంధం లేదు కదండీ” అని చెబుతుంది. శివన్నారాయణ “ఇంక మీరు బయలుదేరొచ్చు” అని అంటారు. శివన్నారాయణ గంభీరంగా “నీ తల్లిదండ్రులకు దూరంగా ఉండు” అని జ్యోత్స్నకు హెచ్చరిస్తాడు. ఇద్దరూ మౌనంగా బయటకు వస్తారు.
కార్తీక్ తో తన భయాన్ని పంచుకున్న దీప
ఇక కార్తీక్ వాళ్ళ ఇంట్లో దీప కంగారు పడుతూ కార్తీక్‌తో మాట్లాడుతుంది. ఆమె “ తాతయ్య సీఈవో నిర్ణయం గురించి ఏమి చెబుతారో తెలియదు. కుటుంబంలో మళ్లీ గొడవలు వస్తాయేమోనని భయంగా ఉంది” అని అంటుంది. కార్తీక్ శాంతంగా “జ్యోత్స్న విషయంలో తాతయ్య నిర్ణయం పూర్తిగా తెలియదు. అయినా ఆ నిర్ణయం మనం స్వీకరించాల్సిందే” అని సమాధానం ఇస్తాడు. దీప “ఏం జరగకూడదని దేవుడికి కొబ్బరికాయ కొట్టి ప్రార్థించాను కానీ అది కుళ్లిపోయింది” అని బాధపడుతుంది. కార్తీక్ “కొబ్బరికాయ కుళ్లిపోవడమేంటి, మన నమ్మకం బలంగా ఉంటే అంతా సరిగ్గా అవుతుంది” అని ఆమెను ఓదార్చుతాడు.
దీప “జ్యోత్స్న సీఈవోగా లేకపోతే మళ్లీ సమస్యలు వస్తాయి” అని చెబుతుంది. కార్తీక్ “అది మన విషయమే కాదు. మనం చేయాల్సింది మన బాధ్యత మాత్రమే” అని చెబుతాడు. దీప ఆందోళనగా “అమ్మ ఇంట్లో నుండి వెళ్ళడానికి కారణం జ్యోత్స్న కానీ అమ్మను మనం మాత్రమే వెతికాం, ఆమె తిరిగి రావడానికి మనమే కారణం అయ్యాం, అది జ్యోత్స్న తట్టుకోలేకపోయింది” అని అంటుంది. కార్తీక్ “మనల్ని బాధపెట్టిన వాళ్లను సరిదిద్దడమే మన లక్ష్యం. ఆ ఇంట్లో సమస్యలు లేని వాతావరణం తీసుకు రావాలి” అని చెబుతాడు.
జ్యోత్స్న కు పారిజాతం సలహా
తర్వాతి ఉదయం, పారిజాతం జ్యోత్స్నను ఉత్సాహపరుస్తూ “జ్యోత్స్న, ఇది మంచి సమయం. మీ నాన్న ఒంటరిగా ఉన్నారు. ఆయన దగ్గరికి వెళ్లి కాళ్ల మీద పడిపో, నువ్వే ఈ ఇంటి వారసురాలు అని గుర్తు చేయి, తాతగారికి నీ గురించి చెప్పమని చెప్పు” అని చెబుతుంది. జ్యోత్స్న వెంటనే “ససేమిరా! నేను అలా చేయను” అని అంటుంది. పారిజాతం “సీఈవోగా ఉండాలంటే ఈ ఇంట్లో వాళ్ల సపోర్ట్ కావాలి” అని చెప్పగా, జ్యోత్స్న “సరే నువ్వు చెప్పినట్లు చేస్తాను కానీ పరిస్థితులు నా కంట్రోల్‌లో లేకపోతే నువ్వు ఎంట్రీ ఇవ్వు” అని చెబుతుంది.
జ్యోత్స్న ధైర్యం తెచ్చుకుని దశరథ దగ్గరకు వెళ్తుంది.
దశరథ్ ఫైల్స్ చూస్తూ ఉంటాడు. జ్యోత్స్న దశరథ దగ్గరకు వెళ్తుంది. “నాన్న, నీకు నేను కాకుండా ఇంకా పిల్లలు ఉన్నారా?” అని ప్రశ్నిస్తుంది. దశరథ ఆశ్చర్యంతో కొంచం కోపంగా “నాకు ఒక్కరే భార్య, ఒక్కతే కూతురు ఉన్నారు” అని సమాధానం ఇస్తాడు. జ్యోత్స్న “అయితే మీ వారసత్వాన్ని కొనసాగించాల్సింది మీ కూతురే కదా? మరి మీ కూతురు సీఈవోగా ఉండాలా లేదా?” అని నిలదీస్తుంది.
బోర్డు మీటింగ్ ముందు దశరథ – శివన్నారాయణ చర్చ
దశరథ కాసేపు నిశ్శబ్దంగా ఉండి “నీ తెలివితేటలు అద్భుతం. నా ఆస్తి మొత్తం నీదే” అని చెబుతాడు. జ్యోత్స్న “నాకు ఆస్తి కాదు, పదవి కావాలి” అని స్పష్టంగా చెబుతుంది. దశరథ “ఆస్తి పోతే నేను మాత్రమే నష్టపోతాను. కానీ కంపెనీ పోతే ఎన్నో కుటుంబాలు రోడ్డున పడతాయి” అని సమాధానం ఇస్తాడు.
దశరథ తీవ్రంగా “కార్తీక్‌ని సీఈవో పదవి నుంచి తీసేసి నిన్ను ఉంచాం, 30 రోజులు సమయం ఇచ్చాం, కానీ నువ్వు నిరూపించుకోలేకపోయావు. ఇప్పుడు కంపెనీ ప్రమాదంలో ఉంది. నీకు సపోర్ట్ చేయలేను” అని జ్యోత్స్నపై కోపంగా అంటాడు. జ్యోత్స్న ఏడుస్తూ “నన్ను సీఈవోగా తీసేస్తే నా పరువు పోతుంది, ఉద్యోగుల ముందు తలెత్తుకోలేను” అని చెబుతుంది.
ఇంతలో శివన్నారాయణ వస్తాడు. “ఏం జరుగుతోంది?” అని అడుగుతాడు. దశరథ “జ్యోత్స్న తన పదవి కొనసాగించమని కోరుతోంది” అని వివరిస్తాడు. శివన్నారాయణ శాంతంగా “ఈ నిర్ణయం నేనో మీ నాన్నో తీసుకునేది కాదు. బోర్డు సభ్యులు నిర్ణయిస్తారు” అని చెబుతాడు. “నేను ప్రతిపాదించినప్పుడు ఎవ్వరూ వ్యతిరేకించలేదు కాబట్టి నువ్వు ఇన్ని రోజులు సీఈవోగా ఉన్నావు. కానీ ఇప్పుడు ఆ కుర్చీకి సమర్థవంతమైన నాయకత్వం కావాలి” అని అంటాడు.
ఇంతలో కార్తీక్, దీప అక్కడికి వస్తారు. పారిజాతం “మీ మనవరాలు అయిన జ్యోత్స్న కంటే ఎక్కువ అర్హత ఎవరికీ ఉంటుంది?” అని అడుగుతుంది. శివన్నారాయణ “నా మనవరాలి కోసం నేను 50 లక్షల కార్ కొనిస్తాను, కానీ కంపెనీ నిర్ణయాలు వేరే అంశాలు” అని సమాధానం ఇస్తాడు. దశరథ గంభీరంగా “బలమైన నిర్ణయాలు తీసుకోవడానికి తెలివితేటలు కావాలి, కానీ అవి నీ దగ్గర లేవు అని నువ్వు నిరూపించుకున్నావు” అని అంటాడు.
జ్యోత్స్న కార్తీక్ వైపు కోపంగా చూస్తుంది.
సుమిత్ర నిర్ణయం
పారిజాతం “ఈ ఇంట్లో ఎప్పుడూ మగవాళ్లే నిర్ణయం తీసుకుంటారా? ఆడవాళ్లకి అధికారం లేదా?” అని ప్రశ్నిస్తుంది. శివన్నారాయణ “నీకు అర్థం కాలేదనుకుంటాను” అని చెబుతాడు. పారిజాతం “నేను సుమిత్ర గురించి మాట్లాడుతున్నాను” అని స్పష్టం చేస్తుంది.
“దశరథ విజయాల్లో సుమిత్రకూ భాగం ఉంది, ఆమె కూడా ఒక నిర్ణయం చెప్పాలి” అని అంటుంది.
శివన్నారాయణ ఆలోచించి “సుమిత్ర ఈ ఇంటి మహాలక్ష్మి, ఆమెను బాధపెట్టే నిర్ణయం తీసుకోవడం సరికాదు. మన నిర్ణయాల్లో ఆమెకూ భాగం ఉండాలి” అని అంగీకరిస్తాడు.
శివన్నారాయణ “నా కొడుకు, బోర్డు సభ్యులు నా మాట కాదనరు. ఎవరైనా కాదంటే వారిని ఒప్పించడానికి నా పక్కన ఒకడు ఉన్నాడు. నీ నిర్ణయం చెప్పు సుమిత్రా — నీ కూతురు సీఈవోగా ఉండాలా?” అని అడుగుతాడు. పారిజాతం, జ్యోత్స్న ఇద్దరూ సుమిత్రపై ఒత్తిడి తెస్తారు. “ఈ ఇంటి వారసురాలే సీఈవోగా ఉండాలని చెప్పు” అని కోరుతారు.
దశరథ సుతిమెత్తగా “నీ కూతురి గురించి నువ్వేం అనుకుంటున్నావో చెప్పు” అని అడుగుతాడు.
సుమిత్ర కాసేపు నిశ్శబ్దంగా ఆలోచించి, “నా కూతురిని పెళ్లికూతురిగా చూడాలని అనుకుంటున్నాను” అని చెబుతుంది.
ఆ మాట విని జ్యోత్స్న, పారిజాతం ఇద్దరూ ఆశ్చర్యంతో ఒకరినొకరు చూస్తారు.
అంతటితో ఈ ఎపిసోడ్ ముగుస్తుంది.
Source inspiration: Original story from “కార్తీక దీపం” (JioHotstar). This is a personal written recap and interpretation.
