కార్తీక దీపం Nov 10th, 2025 సోమవారం ఎపిసోడ్: దీపని సీఈఓగా ప్రతిపాదించిన కార్తీక్, శివన్నారాయణ …. !!!! షాక్ లో జ్యోత్స్న, పారు … !!!
ఎపిసోడ్ ప్రారంభంలో దీప కార్తీక్ కలిసి ఆఫీస్ లో అందరికి భోజనాలు ఏర్పాటు చేస్తుంటారు. పారిజాతం సుమిత్రను వెంట తీసుకుని ఆఫీస్‌కి వస్తుంది. అకస్మాత్తుగా వారి రాక అందరినీ ఆశ్చర్యపరుస్తుంది. ఆఫీస్‌లో అప్పటికే తాత శివన్నారాయణ, దీప, దశరథ్, జ్యోత్స్న, కార్తీక్ కూర్చుని ఉంటారు. సుమిత్రను వెంట తెచ్చిన పారిజాతాన్ని చూసి జ్యోత్స్న మనసులో “అమ్మను ఎందుకు తీసుకొచ్చింది?” అని అయోమయంగా అనుకుంటుంది.
జ్యోత్స్న సుమిత్రని చూసి నువ్వు ఆఫీస్ కి వచ్చావా అని అడుగుతుంది. దానికి పారు దీప వచ్చినపుడు మేము రాకూడదా అని సమాధానం ఇస్తుంది. ఆ సమయంలో దీప భోజనం వడ్డిస్తూ ఉంటుంది. పారు శివన్నారాయణతో “నేను మీతో కొంచం మాట్లాడాలి” అని చెబుతుంది. శివన్నారాయణ “మాట్లాడు” అంటాడు. కానీ పారు “ఇక్కడ కాదు, లోపలకి వెళ్దాం” అని అంటుంది. శివన్నారాయణ దశరథ్‌తో “మీరు భోజనం చేస్తూండండి, నేను వస్తాను” అని చెప్పి వెళ్తాడు. అదే సమయంలో కార్తీక్ కూడా దీపను అక్కడే ఉండమని చెప్పి తాత, పారుల వెనుకే వెళ్తాడు.
లోపలికి వెళ్లిన తర్వాత పారు నేరుగా శివన్నారాయణను అడుగుతుంది – “కొత్త సీఈవో ఎవరు?” అని. శివన్నారాయణ ఆమె ప్రశ్నకు “అది నీకెందుకు?” అని అడుగుతాడు. దానికి పారు “దీపనే సీఈవో చేస్తున్నారు కదా?” అని అంటుంది. శివన్నారాయణ “దీప సీఈవో అవుతుందని నీకు ఎవరు చెప్పారు?” అని ప్రశ్నిస్తాడు. అప్పుడు కార్తీక్ వచ్చి “జ్యోత్స్న ఫోన్ చేసి చెప్పిందా?” అని అడుగుతాడు. వెంటనే వెనుకనుండి జ్యోత్స్న వస్తూ “నేను చెప్పానని నువ్వు చూశావా బావా?” అని కోపంగా అడుగుతుంది.
శివన్నారాయణ పారు వైపు తిరిగి “అయితే నీకు ఎవరు చెప్పారు?” అని అడుగుతాడు. పారు తడబడుతూ “అసలు సుమిత్రే మిమ్మల్ని నిలదీయాలని అనుకుంది కానీ గౌరవంతో ఆగిపోయింది, అందుకే నేను అడుగుతున్నా” అని చెబుతుంది. శివన్నారాయణ “అయితే నీకు నా మీద గౌరవం లేదా?” అని అడుగుతాడు. దానికి పారు “దీప ఒక పనిమనిషి, ఆమెను సీఈవో చేయడం కరెక్ట్ కాదు” అని సమాధానం ఇస్తుంది. కార్తీక్ కావాలనే “దీప సీఈవో కాదు, తాత మనసులో వేరే మనిషి ఉన్నారు” అని చెబుతాడు.
శివన్నారాయణ వెంటనే “అవును, నా మనసులో వేరే మనిషి ఉన్నాడు, కానీ పారిజాతం నువ్వు చాలా మంచి సలహా ఇచ్చావ్” అని అంటాడు. పారు ఆశ్చర్యంతో “నేనేం సలహా ఇచ్చాను?” అని అడుగుతుంది. శివన్నారాయణ “దీపను సీఈవో చేయమని నువ్వే చెప్పావ్ కదా” అని అంటాడు. పారు షాక్ అవుతూ “నేను దీపను సీఈవో చేయొద్దు అని చెప్పాను” అని చెప్పినా శివన్నారాయణ నవ్వుతూ “నువ్వే మంచి ఆలోచన చెప్పావ్ పారు, నేను ఆ పనే చేస్తాను” అని అంటాడు. వెంటనే పారు ” పనిమనిషిని సీఈఓ చేస్తారా ” అని అడుగుతుంది. దానికి శివన్నారాయణ ఇపుడు వరకు వంట గది నడిపింది ఇక నుండి రెస్టారంట్ నడుపుతుంది అని అంటూ కార్తీక్ తో నువ్వే దీపని ఒప్పించాలి అని చెబుతూ బయటకు వెళ్తాడు.
శివన్నారాయణ వెళ్ళిపోయిన తర్వాత కార్తీక్ నవ్వుతూ పారిజాతం వైపు తిరిగి “థాంక్స్ పారు, నా భార్య దీపను సీఈవో చేస్తున్నావ్, జ్యోత్స్నా గ్రూప్ సీఈవో దీప — వినడానికి బాగుంది కదా” అని తాను కూడా అక్కడ నుండి వెళ్ళిపోతాడు. జ్యోత్స్న కోపంతో “నేను చెప్పింది ఇప్పుడు అడగాలా? ఇపుడు దీప సీఈఓ కాకుండా ఎలా ఆపుతావు?” అని పారు మీద ఫైర్ అవుతుంది.
అప్పుడు పారు చీరలో దాచుకున్న కత్తిని బయటకు తీసి “దీపను సీఈవో చేయడం గురించి వాళ్ళు ముందే అనుకున్నారు, కానీ నేను అడిగినట్టు నటిస్తున్నారు. సరే, దీపను సీఈవోగా ప్రకటిస్తే, నేను ఈ కత్తితోనే దానిని చంపేస్తాను” అని చెబుతుంది. జ్యోత్స్న ఆశ్చర్యంతో “నిజంగా చంపేస్తావా గ్రానీ?” అని అడుగుతుంది. పారు “నా మనవరాలికి అన్యాయం జరిగితే నేను ఊరుకుంటానా? నా మనవరాలు ఒక పని మనిషి ముందు ఓడిపోతే నేను చూస్తూ ఉండను” అని గట్టిగా అంటుంది. జ్యోత్స్న బయటకు మాములుగా ఉన్నా, మనసులో “దీప చస్తే ఆ స్థానం నాదే” అని అనుకుంటుంది.
ఇంతలో మరోవైపు, కాంచన భోజన చేస్తున్న సమయంలో శ్రీధర్ అక్కడికి వస్తాడు. శ్రీధర్ కాంచనతో నేను కూడా నీతో కలిసి భోంచేస్తా అంటూ తానే ప్లేట్ తెచ్చుకుని వడ్డించుకుని ఆమె పక్కన కూర్చుంటాడు. ఆమెతో పాత జ్ఞాపకాలు గుర్తున్నాయా అని అడుగుతాడు. కాంచన “మీరు జ్ఞాపకాలలో వెనక్కి వెళ్ళారు కానీ నేను మొదటి సంవత్సరం దగ్గరే ఆగిపోయాను” అని చెబుతుంది. శ్రీధర్ “గతం అంటే కేవలం జ్ఞాపకాలు కాదు, మనిద్దరం కలిసి గడిపిన రోజులు” అని చెబుతాడు.
కాంచన “అవన్నీ ఒక అబద్ధాన్ని నిజం అనుకుని మోసపోయిన రోజులే” అని చెబుతుంది. శ్రీధర్ “నేను కార్తీక్ కోసం రాలేదు, నీకోసమే వచ్చాను” అని చెబుతాడు. కాంచన “నేను ఒంటరిగా లేను, నా కోసం ఉన్న మనుషుల కోసం ఎదురు చూస్తున్నాను” అని చెబుతుంది. అప్పుడు శ్రీధర్ ఆమెను “నీ మేడలో మంగళ సూత్రం సరిచేసుకునే అపుడు అయినా దాన్ని కట్టిన వ్యక్తి నీకు గుర్తురావడం లేదా?” అని అడుగుతాడు. కాంచన “దాన్ని కట్టినవాడి చెయ్యి మూడు ముళ్లు కాదు, ఆరు ముడులు వేసింది” అని చెబుతుంది. ఈ మాటలతో శ్రీధర్ నిశ్శబ్దంగా బాధతో ఆమెను చూస్తూ “కొత్త సీఈఓ ఎవరిని చేస్తారు అనుకుంటున్నావు” అని అడుగుతాడు. అది మా నాన్న ఇష్టం సాయంత్రం అయితే తెలుస్తుంది అని కాంచన సమాధానం ఇస్తుంది.
ఇక మళ్లీ ఆఫీస్‌లోకి వస్తే, అందరూ భోజనానికి కూర్చుంటారు. శివన్నారాయణ, దశరథ్, జ్యోత్స్నతో పాటు పారు, సుమిత్ర కూడా కూర్చుంటారు దీప వడ్డిస్తుంటుంది. శివన్నారాయణ కార్తీక్, దీపలను కూడా కూర్చోమని చెబుతాడు. దశరథ్ దీప చేసిన వంటను మెచ్చుకుంటాడు. సుమిత్ర జ్యోత్స్నకు దగ్గరగా వెళ్లి “ఇక్కడ ఉన్న అందరికీ ఎవరో ఒకరు జంటగా ఉన్నారు. నీకూ నీ కోసం ఆలోచించే మనిషి ఉండాలి. జీవితంలో ఒంటరితనం ఉండకూడదు. నా మాట విని పెళ్లి చేసుకో ” అని చెబుతుంది.
జ్యోత్స్న మనసులో “దీప చస్తే బావ పక్కన స్థానం నాదే” అని అనుకుంటుంది. పారు “అదృష్టం అంటే దీపదే, నిలబడి వడ్డించే స్థాయి నుంచి అందిరితో కూర్చొని భోజనం చేసే స్థాయికి చేరుకుంది” అని వెటకారంగా అంటుంది. దానికి దశరథ “దీప మనతో కలిసి చాలాసార్లు భోజనం చేసింది” అని అంటాడు. “కానీ ఆఫీసులో ఇదే మొదటిసారి కదా ” అని అంటుంది పారు. అంతలో కార్తీక్ “ఇక నుంచి దీప కూడా మాతో కలిసి ప్రతిరోజూ భోజనం చేస్తుంది” అని చెప్పగానే పారు, జ్యోత్స్న ఇద్దరూ ఆశ్చర్యపోతారు.
భోజనం తర్వాత బోర్డ్ మీటింగ్ జరుగుతుంది. బోర్డ్ సభ్యులు శివన్నారాయణ వైపు చూసి “మేమంతా మీ నిర్ణయం కోసం ఎదురుచూస్తున్నాం” అని చెబుతారు. వారు కార్తీక్‌నే సీఈవోగా అవుతాడని అనుకున్నామని, కానీ ఇపుడు ఎవరు ఉంటారు అని అంటారు. పారు వెంటనే “ఇంకా ఎవరు ఆయన వారసులే ఉంటారు” అని అంటుంది. శివన్నారాయణ “సీఈవో అవ్వడానికి రక్త సంబంధం కాదు, సమర్థత అవసరం” అని చెబుతాడు. సుమిత్ర “ఈ రెస్టారెంట్ నీడలో ఎంతో మంది బతుకుతున్నారు. వాళ్లను నడిపించే శక్తి ఉన్నవారే నాయకులు కావాలి” అని చెబుతుంది.
శివన్నారాయణ ఆమె మాటలతో సంతోషించి “నా కోడలు బాగా ఆలోచించింది” అని అభినందిస్తాడు. పారు, జ్యోత్స్న మాత్రం షాక్ అవుతారు. కార్తీక్ లేచి “నేను ఈ సంస్థలో లేకపోయినా పరోక్షంగా నా సేవలు సంస్థకి అందుతూనే ఉంటాయి. కానీ నేను సీఈవో అవ్వడానికి సరైన వ్యక్తిని కాదనుకుంటున్నాను. అందుకే కొత్త సీఈవోగా నా భార్య దీపను ప్రతిపాదిస్తున్నాను” అని చెబుతాడు.
అతని మాట విని అందరూ కొంత ఆశ్చర్యంతో కొంత అంగీకారంతో ఒకరినొకరు చూస్తారు. దీప షాక్ అవుతుంది. శివన్నారాయణ తల ఊపుతూ సమ్మతం తెలుపుతాడు. పారు మాత్రం తన చీరలో దాచుకున్న కత్తిని గట్టిగా పట్టుకుని సీరియస్‌గా ఉంటుంది.
ఇక్కడితో ఈరోజు ఎపిసోడ్ ముగుస్తుంది.
Source inspiration: Original story from “కార్తీక దీపం” (JioHotstar). This is a personal written recap and interpretation.
