కార్తీక దీపం Nov 11th, 2025 మంగళవారం ఎపిసోడ్: దీపని అవమానించిన జ్యోత్స్న … ఓటింగ్ లో నెగ్గి సీఈఓ పోస్ట్ ని రిజెక్ట్ చేసిన దీప …. !!!!
ఎపిసోడ్ ప్రారంభంలో కంపెనీ బోర్డు సమావేశం జరుగుతుంది. కొత్త సీఈఓ గురించి చర్చ మొదలవుతుంది. అందరి ముందు కార్తీక్ లేచి మాట్లాడుతూ, “నేను ఇప్పుడు ఈ కంపెనీలో అధికారికంగా లేకపోయినా, నా మద్దతు, నా సలహాలు ఎప్పటికీ కంపెనీకి ఉంటాయి. కానీ నేను సీఈఓగా కొనసాగను. అందుకే కొత్త సీఈఓగా నా భార్య దీపను ప్రతిపాదిస్తున్నాను” అని చెబుతాడు.
ఆ మాట విన్న వెంటనే దీపా షాక్ అయ్యి లేచి బయటకు వెళ్లిపోతుంది. కార్తీక్ వెంటనే ఆమెను వెంబడిస్తూ వెళ్తాడు. బయట ఆమెతో మాట్లాడతాడు. దీప కొంచెం ఆవేశంగా, “నేను లోపలికి రానని ముందే చెప్పాను బావ. నువ్వేమో నన్ను సీఈఓ పోస్టుకు ప్రతిపాదించావు. నాకు ఇది అసలు ఇష్టం లేదు” అని అంటుంది. దానికి కార్తీక్ ప్రశాంతంగా, “ఇది మన కుటుంబానికి సంబంధించినది. మన ఇంటి పరువుని , మన కంపెనీ ని మనమే కాపాడుకోవాలి. నువ్వు కూడా బలంగా నిలబడాలి. నేనూ నీతోనే ఉన్నాను” అని చెప్పి ఆమెను తిరిగి మీటింగ్ రూమ్‌కి తీసుకువెళ్తాడు.
లోపలికి తిరిగి వచ్చిన తర్వాత, బోర్డు సభ్యులు చర్చను కొనసాగిస్తారు. జ్యోత్స్న లేచి “దీప సీఈఓ కావడానికి అర్హత ఏంటి?” అని ప్రశ్నిస్తుంది. “ఐదో తరగతి కూడా పూర్తిచేయని ఓ పల్లెటూరి మొద్దు ఇంత పెద్ద కంపెనీకి సీఈఓ ఎలా అవుతుంది? ఆమెకు ఇంగ్లీష్ రాదు, ల్యాప్‌టాప్ కూడా ఆపరేట్ చేయలేరు. ఇలాంటి వ్యక్తిని సీఈఓ చేయడం కంపెనీకి నష్టం కాదా?” అని ప్రశ్నిస్తుంది.
జ్యోత్స్న మాట విని కార్తీక్ కోపంగా “నా భార్య గురించి మాట్లాడేటప్పుడు మాటల్ని జాగ్రత్తగా వాడండి” అని చెబుతాడు. దాంతో జ్యోత్స్న “నేను తప్పుగా అనిపించే మాటలు మాట్లాడితే వెనక్కి తీసుకుంటాను” అని అంటుంది.
తర్వాత కార్తీక్ తన మాట మొదలుపెడతాడు. “దీప ముత్యాలగూడెం అనే గ్రామంలో పుట్టింది. ఐదో తరగతి వరకే చదివింది. కానీ అది ఆమెకు చదువు మీద ఇష్టం లేక కాదు — తండ్రి కష్టం చూడలేక చదువు మానేసింది. చిన్నప్పటి నుంచే తన తండ్రి నడిపే హోటల్‌లో పనిచేయడం మొదలుపెట్టింది. ఆ వయసులోనే రకరకాల వంటలు నేర్చుకుంది. చిన్న చిన్న ఆలోచనలతో హోటల్ ఆదాయాన్ని పెంచింది. ఉదాహరణకు — కస్టమర్ల కోసం చిన్న స్కీములు పెట్టి హోటల్‌కి స్థిరమైన కస్టమర్లు తెచ్చుకుంది” అని వివరిస్తాడు.
కార్తీక్ ఇంకా చెబుతాడు, “సత్యరాజ్ హోటల్ దివాళా తీసినప్పుడు దాన్ని మళ్లీ నిలబెట్టింది దీపే. మేము ఇద్దరం కలసి తీసుకున్న అవార్డు కూడా ఆమె కృషి వల్లే వచ్చింది. ఈ కంపెనీని ఎలా నడపాలో, కస్టమర్లతో ఎలా ఉండాలో, సిబ్బందితో ఎలా వ్యవహరించాలో దీపకు పూర్తిగా అవగాహన ఉంది. ఇవే ఆమె అర్హతలు.”
జ్యోత్స్న మాత్రం ఒప్పుకోదు. “ఇవి సరిపోవు. దీపను సీఈఓగా నేను అంగీకరించను” అని స్పష్టం చేస్తుంది.
దానికి కార్తీక్ ప్రశాంతంగా “మీరు అన్నీ చదివారుగా. అన్ని హోదాలు మీ దగ్గర ఉన్నాయి. అయినా ఈ కంపెనీని ఈ స్థితికి ఎలా తెచ్చారు? ఒకవేళ అర్హతలతోనే సక్సెస్ వస్తే, మీరు ఈరోజు ఈ పరిస్థితిలో ఉండరేమో” అని సమాధానం ఇస్తాడు. పారు లేచి “నా మనవరాలిని అవమానిస్తున్నాడు” అని అంటుంది. దశరథ “అవమానం కాదు పిన్ని నిజాలు చెప్తున్నాడు ” అని సమాధానం ఇస్తాడు.
చైర్మన్ శివనారాయణ ముందుకు వచ్చి “ఇద్దరి మధ్య ఈ వివాదాన్ని ఓటింగ్ ద్వారా పరిష్కరించుకుందాం. ఎవరికీ ఎక్కువ ఓట్లు వస్తాయో వారు సీఈఓ అవుతారు” అని నిర్ణయం చెబుతాడు.
ఓటింగ్‌కి మొత్తం ఏడుగురు అర్హులు ఉంటారు. శివన్నారాయణ తన ఓటు చివరగా వేస్తాను అని చెప్తాడు. పారు సుమిత్రతో దశరథను జ్యోత్స్నకు ఓటు వేయమని చెప్పమంటుంది. కానీ సుమిత్ర ఎవరికీ వేయాలో ఆయనకు తెలుసు అని సమాధానం ఇస్తుంది. కార్తీక్, దీప, జ్యోత్స్న, సుమిత్ర, పారిజాతం ఓటు వేయరు. మిగిలిన సభ్యులు రహస్యంగా ఓట్లు వేస్తారు.
ఓట్ల లెక్కింపు మొదలవుతుంది. ఒక్కొక్కటీ చదివి శివన్నారాయణ, ప్రతి ఓటు కూడా దీపకే పడిందని ప్రకటిస్తాడు. మొత్తం ఆరు ఓట్లు యూనానిమస్‌గా దీపకే వస్తాయి. అందరూ చప్పట్లు కొడతారు. “దీప జ్యోత్స్న గ్రూప్ ఆఫ్ రెస్టారెంట్స్ కొత్త సీఈఓ” అని అధికారికంగా ప్రకటిస్తాడు శివనారాయణ.
జ్యోత్స్న కోపంగా “డాడీ, నువ్వు కూడా దీపకే ఓటు వేసావు కదా. ఇది నేను ఎప్పటికీ మర్చిపోను” అని తనలో తాను అనుకుంటుంది. పక్కన పారు కూడా “సొంత వాళ్లే మోసం చేశారు” అని మనసులో అనుకుంటుంది.
దీప అందరికీ కృతజ్ఞతలు తెలుపుతుంది. “మీ నమ్మకాన్ని నేను కాపాడతాను. నా బావ లేకుండా నేను లేను. ఆయన నన్ను నమ్మి నాకు ఈ బాధ్యత ఇచ్చారు” అని మాట్లాడుతుండగా పారు కత్తి పట్టుకుని పైకి లేస్తుంది. దీప మాట్లాడుతూ “కానీ నేను ఈ స్థానం అంగీకరించలేను. నా భర్తను రెండుసార్లు అవమానించిన ఈ స్థానంలో నేను కూర్చోలేను” అని చెబుతుంది.
అందరూ షాక్ అవుతారు. జ్యోత్స్న ముఖంలో చిన్న నవ్వు కనిపిస్తుంది. పారు కూడా సంతోషంగా కూర్చుంటుంది. దీప “ఇక్కడ నేను సీఈఓగా ఉంటే నువ్వు ఎక్కడ ఉంటావు బావ” అని అడుగుతుంది.
జ్యోత్స్న వ్యంగ్యంగా “ఇంకా ఎక్కడ నీ భర్త డ్రైవర్ పోస్టులో కూర్చుంటాడు” అని అంటుంది. దానికి దీప “నిన్ను అవమానించిన స్థానంలో నేను ఉండలేను. నాకు ఈ హోదా వద్దు. నాకు నా భర్త చాలు” అని సమాధానం ఇస్తుంది.
శివనారాయణ వెంటనే “బాగా చెప్పింది. అర్హత లేకపోయినా అధికారం కోసం ఆశపడేవాళ్లు ఒకవైపు, అర్హతతో అధికారం వచ్చినా ఆశపడని వాళ్లు మరోవైపు” అని చప్పట్లు కొడతాడు.
ఈ సమయంలో పారిజాతం లేచి “దీప వద్దు అంటుంది కదా జ్యోత్స్న ని సీఈఓ చేయండి” అంటుంది. దానికి శివన్నారాయణ “ఒక్క ఓటు కూడా రాని జ్యోత్స్న ని ఎలా సీఈఓ ని చేస్తాము” అంటాడు. దానికి పారిజాతం “ఇది అంతా నాటకం. దీప ఈ విధంగా నటించి కార్తీక్‌కి తిరిగి సీఈఓ పోస్టు రావాలని చూస్తుంది. వీళ్లిద్దరూ ప్లాన్ చేసుకున్నారు. దీప వద్దంటే కార్తీక్‌కి సీఈఓ పోస్ట్ వస్తుంది కదా” అని ఆరోపిస్తుంది.
శివన్నారాయణ కఠినంగా “ఇంకో మాట మాట్లాడితే బయటికి పంపిస్తా” అని పారుని హెచ్చరిస్తాడు. పారు సైలెంట్‌గా కూర్చుంటుంది.
ఇక చివర్లో జ్యోత్స్న ప్రశ్నిస్తుంది, “అయితే నేను, దీప, బావ కాకుండా సీఈఓ ఎవరు తాత?” అని. శివనారాయణ “ప్రతి ప్రశ్నకు సమాధానం నా దగ్గర ఉంది” అని చెబుతాడు.
అంతా అయోమయంలోకి వెళ్తారు. కార్తీక్ చిన్నగా నవ్వుతాడు. అదే సమయంలో, ఓ కొత్త వ్యక్తి బ్లాక్ సూట్‌లో మీటింగ్ హాల్‌లోకి నడుచుకుంటూ వస్తాడు. అందరి చూపు అతని మీద పడుతుంది.
అక్కడితో ఈరోజు ఎపిసోడ్ ముగుస్తుంది.
Source inspiration: Original story from “కార్తీక దీపం” (JioHotstar). This is a personal written recap and interpretation.
